اسهل 10 افكار لرسم ضوافرك بالمانيكير
النهاردة جايبين لكل بنات حوا 10 افكار لرسم الضوافر بالمانيكير من اسهل الافكار يعني لو كنتي مبتدئة في رسم الضوافر او بترسمي تصاميم كويس الافكار دي هتناسبك لان سهل تنفيذها جدا وبسيطة وفي نفس الوقت شكلها حلو اوي.
10 افكار لرسم الضوافر بالمانيكير:
1- جليتر:
من ابسط التصاميم اللي ممكن تتعمل للضوافر بسيطة وسهلة جدا, اختاري لون مانيكيرك المفضل وممكن تختاري لون باستيل عشان اللوك يطلع هادي, وحطي الجليتر على صوباع واحد بس, وكده يبقى عندك تصميم في منتهى السهولة مش هياخد منك اي وقت وفي نفس الوقت هيدي شكل حلو للضوافر.
2- اسود ودهبي:
اللونين الاسود والدهبي من الالوان اللي بتطلع تحفة اوي مع بعض, ممكن تحطي اللون الاسود الاول على الضوافر كلها ولما ينشف خالص حطي اللون الدهبي على الجزء اللي تحت بس من الضوفر وممكن نستخدم سوليتب نلزقه على الجزء اللي فوق واحنا بنرسم الدهبي عشان ميتلخبطش ويطلع مظبوط معانا, ممكن مع التصميم ده تلبسي اكسسوريز دهبي عشان تكملي اللوك.
3- ابيض وبرونزي:
في التصيم ده هنستخدم تلات الوان البرونزي, الابيض, الاسود, حطي الطبقة الاساسية الاول باللون الابيض ولما تنشف قسمي الضوافر بميل وارسمي اللون البرونزي وممكن تعملي كل الصوابع بميل وصوباع واحد تقسميه نصين بخط مستقيم يعني حسب ما تفضلوا اكتر ولما ينشف حددوا الخط اللي في النص اللي بين اللونين الابيض والبرونزي باللون الاسود, وطبعا ممكن تعملوا التصميم ده باي تلات الوان تانيين تختاروهم يكونوا متناسقين مع بعض.
4- اطراف الضوافر بالاسود:
دي من اسهل التصاميم اللي ممكن تعمليها وخصوصا لو مستعجلة وفي نفس الوقت مش عايزة تخرجي من غير ما ترسمي ضوافرك فالتصميم ده هيكون انسب حاجة ليكي, طبعا مش لازم بالاسود ممكن تختاروا اي لون تاني تفضلوه, هترسموا بس اطراف الضوافر باللون اللي هتختاروه.
5- ماربيل مانيكيراو مانيكير المية:
ماربيل مانيكير او مانيكير المية احنا اتكلمنا عليه قبل كده بالتفصيل وازاي نعمله وشوفنا تصاميم مختلفة ممكن نعملها بيه, ممكن تشوفوا من هنا طريقة عمل مانيكير المية بالصور والفيديو.
6- تصميم السنبلة:
التصميم ده هنستخدم فيه اللونين الاسود, والبينك الباستيل او البيبي بينك, عشان اللوك يطلع رقيق, حطي الطبقة الاساسية باللون البينك على الضوافر كلها ولما تنشف ارسمي على الضوفر من تحت شكل مثلث باللون الاسود.
7- تصميم المونو جروم Monochrome:
اللون الاسود والابيض يعتبروا من اكتر الالوان اللي بتتحط مع بعض في تصاميم المانيكير, ارسمي ضوافرك باللون الابيض واستني لما تنشف وبعدين ارسمي عليها خطوط تحت بعض باللون الاسود زي الصورة كده, وممكن تعكسوا الالوان يعني حطوا اللون الاسود الاول وارسموا الخطوط باللون الابيض حسب اللي تفضلوه اكتر.
8- تصميم النقط:
التصميم ده سهل اوي هنستخدم فيه لونين, اي لون فاتح طبيعي او لون باستيل, حطي اللون الباستيل على الضوافر كلها ولما ينشف خالص حطي نقطة باللون الاسود على كل ضوفر من تحت.
9- تصميم الـ Half Moons:
اختاري اي لونين مانيكير تفضليهم, حطي لون منهم على الضوافر كلها واستني لما ينشف وبعدين ارسمي باللون التاني تصميم الـ Half Moons على الضوافر من تحت.
10- تصميم خط مايل:
ده كمان من اسهل التصاميم اللي ممكن تعمليها لو انتي بتكسلي ترسمي ضوافرك او تعملي تصاميم صعبة او مستعجلة وعايزة تصميم مياخدش وقت,اختاري اي لون مانيكير تفضليه وارسمي بيه خط مايل على الضوافر.
شوفي كمان المانيكير الفرو وازاي تعمليه لنفسك بالصور والفيديو
