5 خطوات للتعامل مع الشخص العدواني

ريهام محمود

في

9201

يوميا في حياتنا تقريبا بنقابل كل نوعيات الشخصيات وبنبقى ساعات مجبرين اننا نتعامل معاهم ومن ضمن الشخصيات دي هي الشخص العدواني اكيد كتير مننا بيقابل منهم كتير وده الشخص اللي بيكون دايما في صراع مع اللي حواليه ومستعد يعمل اي حاجة على حساب الاخرين, وطبعا النوعية دي مش سهل التعامل معاها ابدا, عشان كده النهاردة هنقولكم على خمس خطوات للتعامل مع الشخص العدواني وازاي اننا نتفادى الصدام معاهم في اي موقف ونخلي الامور تعدي بسلام من غير صراعات.

– تعالوا نعرف الاول ازاي نتعرف على الشخص العدواني:

1- النوعية دي من الشخصيات هتلاقيه بيقاطعك وانتي بتتكلمي, وبيتكلم بصوت عالي عشان يخليكي متكمليش كلامك.

2- مش بيسمح لك انك تعرضي وجهة نظرك في اي حاجة او تعترضي على كلامه.

3- في اوقات كتير خلال كلامكم هتلاقيه بينبهك او بيحذرك انك اتجاوزتي حدودك معاه في الكلام.

4- هتلاقي نفسك دايما متوترة في اي نقاش بتدخليه معاه ودايما في حالة ضغط على اعصابك.

5- هتحسي بعد المناقشة معاه في اي حاجة انك استنفذتي كل طاقتك ونشاطك.

دي تقريبا اكتر الحاجات اللي ممكن توضح لنا ان الشخص ده عدواني بس للأسف طبعا اننا مش هنقدر نتجنب التعامل مع النوعية دي من الاشخاص لان احيانا بنكون مضطرين نتعامل معاهم في مجال الشغل او الجامعة او غيره في حياتنا اليومية عشان كده انسب حاجة اننا نتعلم ازاي نتعامل معاهم ونعمل توازن ما بين اننا نحافظ على شخصيتنا واننا نتعامل معاهم من خلال 5 خطوات.

– 5 خطوات للتعامل مع الشخص العدواني:

1- حافظي على هدوئك:

طبعا مينفعش اننا نتعامل مع الشخص العدواني بعدوانية زيه لان ده هيعمل مشكلة اكبر وهيشعل الموقف اكتر لما تلاقي نفسك في موقف زي ده عشان متتعصبيش وتتعاملي بعدوانية

– خدي نفس عميق.
– حاولي تشربي مية او تمسكي تليفونك تعملي فيه اي حاجة تخليكي تتفادي الصدام معاه.
– فكري انك ممكن في اللحظة دي لو اتعاملتي معاه بعدوانية انك ممكن تعملي اي حاجة تندمي عليها بعدين وتقولي كلام مش محسوب ساعة الغضب, وطبعا ده بيجي بالتمرين اننا نمرن نفسنا دايما على التحكم في اعصابنا.

2- متبينيش انك منزعجة او متضايقة:

خلال حديثك معاه متبينيش انك متضايقة او منزعجة منه بس في نفس الوقت نبهيه انك بيتعامل بعدوانية من غير ما تخليه يتعصب اكتر او تزودي المشكلة, يعني مثلا حاولي تتجنبي في خلال كلامك توجهي له كلمة “انت/ انتي” لكن ممكن تستخدمي كلام زي

– “مافيش داعي للتوتر / هنحل الموضوع / هنلاقي طريقة / هنخلي الموضوع يتحل من غير مشاكل” يعني حاولي تستخدمي الكلمات اللي تهدي وتلطف الجو.

– ممكن تطلبي منه بهدوء انه يوطي صوته وانه مافيش داعي للانفعال.

– قوليله مثلا انا اسفة ممكن اقترح او اقول حل ممكن يساعد في حل الموضوع يعني حسسيه انك بتاخدي رايه مش بتفرضي رايك عليه.

– ممكن تقوليله انا متفهمة موقفك وعارفة انك منزعج او متضايق.

– لو اتعاملتي معاه بالاسلوب ده هتمتصي غضبه وتتجنبي المشاكل معاه, ومش بس كده انتي هتخليه يتقبل رايك ويبقى منفتح اكتر في تقبل اراء اللي حواليه.

3- اتعاطفي معاه:

دايما في اي موقف بنتحط فيه نحاول نحط نفسنا مكان الشخص اللي قدامنا ونشوف كده لو احنا حصل معانا نفس الموقف هنتصرف زيه ولا لا ونحاول نفهم الاسباب اللي وصلته انه يكون عدواني, لان زي ما قولنا العدوانية هي رد فعل للدفاع عن النفس او مطالبة بحاجة معينة.

– نحاول بقى في الحالة دي نبص للشخص العداوني ده هو ليه بيتصرف كده ممكن مثلا يكون هيخسر حاجة كبيرة في حياتة لو مدافعش عنها زي اهله او وضعه الاجتماعي او سمعته او شغله او وقت او فلوس يعني في اسباب كتير ممكن توصله انه يتصرف بعدوانية.

– فكري لو انتي في مكانه هتتصرفي ازاي ؟

– فكري دايما انه ممكن تكون في حياة الشخص ده حاجة انتي متعرفيهاش هي اللي بتخلي دايما ردود افعاله عدوانية وبيتعصب بسرعة.

4- خليكي حازمة:

ممكن تشوفي ان ده بيتناقض مع نقطة التعاطف معاه لكن بالعكس هما الاتنين بيكملوا بعض يعني محاولة فهمك لموقف الشخص اللي قدامك مش معناها انك كده بتخليه عدواني, لكن انتي بتحاولي تفهمي موقفه وتتعاملي معاه بحزم ولكن بهدوء عشان كده

– حافظي دايما على صوتك يكون واطي في كلامك معاه وبنبره ثابتة لان ده هيديه انطباع انك واثقة في نفسك وفي كلامك وبالتالي مش هيحاول يعلي صوته او يقاطعك.

– حاولي على قد ما تقدري انك متخليش الشخص ده ياخد الحديث او يحتكر المناقشة من غير ما تقولي رايك, لازم تعبري عن رايك ولكن بهدوء زي ما قولنا.

– اتكلمي معاه بأسلوب فيه احترام وبالتالي هو هيعاملك بنفس الاسلوب.

– لو لقيتي النقاش احتد اوي وانه عدوانيته زادت اوي بيني له في المقابل قوة موقفك وحزمك وان مساحة التسامح عندك بدأت تقل.

5- التركيز:

الشخص العداوني دايما خلال حدة المناقشة والغضب هتلاقيه هو نسي اصلا ايه اللي كان معصبه من البداية ! والامور بتدخل في موضوعات وحاجات كتير عشان كده حاولي تكوني انتي مركزة في الحوار وحاولي تمسكي النقط المهمة في المناقشة اللي ممكن تساعد الشخص ده انه يفكر بالمنطق وبعقلانية اكتر.