10 وصفات اصناف حلو بالشيكولاته تحضريهم فى 10 دقايق بس

بقلمآية حسان فيحلويات visibility3836

عشاق الشيكولاتة كتير جدا و تقريبا مفيش حد فينا مابيحبهاش، فلو كنتى من عشاق الشيكولاتة و بتدورى على وصفات جديدة تجربيها، يبقى انتى جيتى المكان المناسب.. فى المقال ده بنات حوا هتقولك على 10 وصفات اصناف حلو بالشيكولاته تحضريهم فى 10 دقايق بس و بخطوات سهلة و بسيطة جدا ..

10 وصفات اصناف حلو بالشيكولاته تحضريهم فى 10 دقايق بس

الوصفة الاولى: مج المافن muffin in a mug :

المقادير : 

 معلقتين اكل من الكاكاو.
3 معالق اكل من الدقيق. 
معلقة اكل من القهوة سريعة التحضير .
معلقتين و نص اكل من السكر .
ربع معلقة اكل من البيكنج صودا.
معلقتين اكل من اللبن .
بيضة .
معلقتين اكل زيت نباتى .
نص معقة اكل من الفانيليا.

طريقة التحضير : 

1- امزجى الدقيق مع القهوة و الكاكاو و السكر و الباكينج صودا فى طبق واخلطيهم كويس اوى . 
2- ضيفى اللبن و البيض و الزيت والفانيليا، و اضربيهم كلم مع بعض باستخدام شوكة لحد ما يكونوا مزيج تقيل .
3- صبى الخليط ده كله فى مج مدهون بالزبدة و حطيه فى المايكروويف على اعلى درجة حرارة لمدة 90 ثانية.
ممكن تقدميه مع ايس كريم الفانيليا.

مافن المج
مافن المج

الوصفة الثانية : براونيز الشوكولاتة chocolate brownies : 

المقادير : 

150 جرام زبدة.
65 جرام كاكاو خام بدون سكر.
200 جرام سكر.
بيضتين.
معلقة اكل من خلاصة الفانيليا.
100 جرام دقيق.

طريقة التحضير : 

1- سيحى الزبدة فى المايكروويف حوالى 30 ثانية و بعدين ضيفى السكر، بودرة الكاكاو و الفانيليا واضربيهممع بعض كويس اوى .
2- ضيفى البيضتين واحده ورا التانية و بعدين اضربيهم و ضيفى الدقيق و اضربى تانى .
3- ادهنى القالب الخاص بالمايكروويف بالزبدة و حطى فيه الخليط بتاعك و دخليه المايكروويف على اعلى درجة حرارة من 4 لـ 5 دقايق.

براونيز الشيكولاتة
براونيز الشيكولاتة

الوصفة الثالثة : كيك الشوكولاتة chocolate cake : 

المقادير: 

100جرام دقيق.
100 جرام شوكولاتة.
100جرام سكر.
50 جرام زبدة .
3 بيضات .
معلقة اكل من البيكنج صزدا.
علبة نوتيلا .

طريقة التحضير :

1- سيحى الزبدة و الشوكولاتة وامزجيهم مع بعض .
2- اضربي البيضة مع السكر لحد ما يكونوا مزيج ناعم.
3- صبى الدقيق فى خليط البيض و السكر مع استمرار الصرب لحد ما يبقى المزيج خفيف .
4- اول ما تبرد الشوكولاتة صبيها على خليط الدقيق و اضربيهم مع بعض ، و بعد كده ضيفى البيكنج صودا ، وحطيه فى المايكروويف على اعلى درجة حرارة 5 دقايق.
5- لما الكيك يبرد قطعيه 3 اجزاء و صبى عليه النوتيلا و ممكن ترشي عليه شوكولاتة مبشورة.

كيك الشوكولاتة
كيك الشوكولاتة

الوصفة الرابعة : كرات الشوكولاتة chocolate balls :

المقادير : 

300 جرام من بسكوت الشوكولاتة.
3/2 كوباية من اللبن المكثف.
100 جرام زبدة .
3 معالق اكل من الكاكاو.

طريقة التحضير :

1- كسرى البسكوت باستخدام الخلاط او الكبة.
2- فى بولة امزجى بودرة الكاكاو مع اللبن المكثف و الزبدة .
3- لما المزيج يبقى كريمى ضيفى البسكوت المكسر و فى الاول امزجيهم مع بعض بمعلقة و بعد كده بايدك.
4- اعملى من المزيج كرات صغيرة وممكن تحطيهمم فى التلاجة شوية علشان تتماسك،  بكده تبقى جاهزة للتقديم .

كرات الشيكولاتة
كرات الشيكولاتة

 

الوصفة الخامسة : فوندو الشيكولاتة chocolate fondue :

الفوندو بيعتبر من اسهل الطرق اللى ممكن تعملى بيها   اصناف حلو بالشيكولاته ، شوفى معانا المقادير و الطريقة 

المقادير : 

200 جرام من الشوكولاتة.
100 جرام كريمة.
فواكه متنوعة.

طريقة التحضير :

1- سيحى الشوكولاتة و ضيفيلها الكريمة وامزجيهم مع بعض.
2- صبى الخليط فى اكتر من بولى صغيرة و حطى فيه الفاكهه باستخدام الشوكة.
3- ارجعى سخنى الشوكولاتة لو احتاجتى.

فوندو الشيكولاتة
فوندو الشيكولاتة

الوصفة السادسة : فطيرة الشيكولاتة chocolate pie :

المقادير : 

4/3 كوباة من الدقيق.
2/1 كوباية سكر.
4/1 معلقة ملح.
معلقة من البيكنج بودر.
3/1 كوباية من الكاكاو.
50 جرام من السمنة.
بيضة.
4 معالق اكل من اللبن.
معلقة من خلاصة الفانيليا.

لصوص الشيكولاتة : 

2/1 كوباية من السكر البنى.
3/1 كوباية من بودرة الكاكاو.
150 مل مية.

طريقة التحضير :

1- امزجى الدقيق مع البيكنج بودر ، السكر، الملح و الكاكاو . بعد كده ضيفى السمنة ، البيض، اللبن و الفانيليا و اخلطيهم مع بعض كويس و بعد كده حطى المزيج كله فى بولة وحطيه فى بولة ينفع تستخدميها فى المايكروويف، البولة لازم يكون طولها على الاقل 5 سم .
2- فى بولة تانية امزجى المية، السكر البنى و الكاكاو وحطيها على وش العجينة اللى حضرناها .
3- سخنى شوية مية لحوالى 30 ثانية و بالراحة اوى صبيها على وش العجينة ، و استخدمى شوكة فى انك ترمى العجينة علشان تسمحى للمية تدخل جواها لحد ما تشوفيها نزلت فى اخر البولة.
4- حطى الخليط كله فى المايكروويف على اعلى درجة حرارة لمدة 5 دقايق ، يفضل تقدميها مع الايس كريم.

فطيرة الشوكولاتة
فطيرة الشوكولاتة

الوصفة السابعة : كيك الشيكولاتة السريع alternative chocolate cake :

المقادير: 

40 جرام زبدة.
2/1 كوباية سكر.
بيضة.
معلقة اكل فانيليا.
4/1 كوباية لبن.
2/1 كوباية من الدقيق. 
معلقتين اكل من الكاكاو.
4/1 معلقة من البيكنج صودا.
شوبة ملح صغيرين.

طريقة التحضير :

1- ادهنى بولة ممكن تستخدميها فى المايكروويف بشوية زيت صغيرين.
2- امزجى الزبدةمع السكر و البيض ، الفانيليا و اللبن و اضربيهم كويس اوى مع بعض، بعد كده ضيفى الدقيق و بودرة الكاكاو و البيكنج صودا و الملح لحد مايكونوا عجينة، و بعدين حطيهم فى البولة.
3- غطى البولة و حطيها فى المايكروويف على اعلى درجة حرارة من 2 لـ 3 دقايق لحد ما ا تبقى الكيكة بتلسع لما تلمسيها .
4- سيبيى الكيك يبرد و بعد كده غطيها بطبق و اقلبيها .

كيك الشيكولاتة سريع التحضر
كيك الشيكولاتة سريع التحضير

الوصفة الثامنة : بسكويت الشيكولاتة chocolate cookies : 

المقادير : 

كوباية من الكاجو، او اى نوع مكسرات تفضليه.
4/3 كوباية من التمر.
4/1 كوباية من ألشوفان.
100 جرام من الشكوكولاتة الغامقة.
شوية ملح صغيرين .

طريقة التحضير : 

1- اطحنى المكسرات لقطع صغيرة باستخدام الخلاط او الكبة و ضيفيلها الشوفان و التمر وامزجهم مع بعض كويس.
2- كسرى الشوكولاتة وضيفيها للمزيج و حطى عليها ذرة ملح صغيرة ، و اضربيهم كلهم مع بعض كويس اوى.
3- بلى ايدك على خفيف و كونى كرات من المزيج ده، وبكده تبقى جاهزة.

بسكويت الشيكولاتة
بسكويت الشيكولاتة

الوصفة التاسعة : كيك الشيكولاتة الجاهز ready to eat chocolate cake : 

المقادير: 

300 جرام من بسكوت الشوكولاتة.
150 جرام زبدة.
3 او 4 معالق اكل من الكاكاو.
250 جرام من الجبنة الكريمى.
50 – 100 جرام من السكر البودرة.
200 جرام شوكولاتة.
100 جرام كريمة.

طريقة التحضير : 

1- علشان نعمل الاساس الاسفنجى للكيك ، سيحى الزبدة على خفيف واطحنى البسكوت باستخدام الخلاط او الكبة.
2- حطى البسكوت على ورقة فويل و اقفلى عليه و باستخدام كوباية اطحنيه لحد ما يكون طبقة متماسكة ، كررى الخطوة دى لحد ما تكونى اكتر من طبقة و بعدين حطيهم فى التلاجة علشان يتماسكوا.
3- للحشوة: اضربي الجينة الكريمى و ضيفى السكر على فترات.
4- اضربي خليط السكر و الجبنة مرة كمان ، سخنى الشوكولاتة لحد ما تسيح و سيبيها تبرد شوية و بعدين امزجيها مع الجبنة الكريمى.
5- اضربي الكريمة فى بولة منفصلة لحد ما تبقى خفيفة وهشة.
6- ضيفى الكريمة للمزيج و اضربيهم كلهم مع بعض باستخدام معلقة صغيرة و حاولى تحافظى على القوام الهش.
7- اول ما المزيج يبقى جاهز و قوامه متماسك، طلعى طبقات البسكوت من الترجة و افردى عليها مزيج الشوكولاتة و الجبنة الكريمى وباقى المكونات، وحطيها فى الترجة من 4 لـ 5 ساعات ، بعد كده رشى عليها شوية من بودرة الكاكو او زينيها بالفاكهه.

كيك الشيكولاتة الجاهزة
p كيك الشيكولاتة الجاهزة

الوصفة العاشرة : فادج الشيكولاتة chocolate fudge : 

المقادير : 

معلقة زبدة ” علشان تفرديها فى الصينية”.
علبة لبن مكثف.
معلقة اكل من خلاصة الفانيليا.
240 جرام من رقائق الشوكولاتة، او شوكولاتة مبشورة.
كوباية نوتيلا.
3 معالق اكر زبدة.
2/1 معلقة ملح.

طريقة التحضير : 

1- ادهنى صينية مقاس 20*20 بالزبدة وافرشي فيها ورقة زبدة و سيبيىحوالى 5 سم ورق زيادة من كل جنب.
2-امزجى اللبن المكثف و خلاصة الفانيليا و رقائق الشيكولاتة و النوتيلا و قطع الزبدة مع بعض فى بولة حجمها متوسط.
3-حطى البولة فوق حمام مية مغلية على خفيف ، حاولى انه كمية المية ماتبقاش لامسة البولة من تحت ، كملى تقليب فى المزيج فوق حمام المية لحد ما الشوكولاتة تسيح و يبق المزيج ناعم ، الخطوة دى هتاخد حوالى من 5 لـ 7 دقايق.
4- صبى المزيج كله فى صينية الاكل .
5- استخدمى سكينة علشان تفردى المزيج على الصينية، رشي الملح و حطى الصينية فى التلاجة على الاقل ساعتين.
6- اول ما الفادج يبرد ، سخنى سكينة بانك تحطيها شوية تحت المية السخنة و بعدين نشفيها و اقطعى الفادج من الاطراف علشان تقسميه، شيلى ورق الزبدة وقطعى الفادج مكعبات صغيرة ، وبكده يكون جاهز للتقديم. 

فادج الشيكولاتة
فادج الشيكولاتة

بكده تكونى عرفتى معانا ازاى تعملى 10 اصناف حلو بالشيكولاته مختلفين و مش محتاجين اكتر من دقايق، جربيهم و قوليلنا رأيك ..