ايه هو الدايت النباتي Plant based diet وفوايده الصحية.. وازاي تعمليه

ريهام محمود
ريهام محمود
13814

الدايت النباتي Plant based diet من انواع الدايت اللي ظهرت بقالها فترة واثبتت فعاليتها ونجاحها في انقاص الوزن, والنوع ده من الدايت مختلف عن اي نظام غذائي او رجيم تاني لان هو في الاساس اسلوب ونظام حياة نمشي عليه على طول اكتر من انه رجيم لان هو بيخلي صحتنا احسن وبيحافظ عليها من امراض كتير زي القلب, ضغط الدم, السرطان وغيرها من الامراض اللي منتشرة دلوقتي كتير واللي بيكون سبب اساسي ليها هو نظام حياتنا واكلنا الغلط وطبعا النظام الصحي ده هينعكس على الوزن وهيكون ليه تأثير ايجابي علينا وهيساعدنا على انقاص وزننا وهيظبط الجسم وهيخلي شكله احلى, عشان كده احنا هنعرف النهاردة مع بعض بالتفصيل ايه هو الدايت النباتي وازاي نعمله.

– ايه هو الدايت النباتي:

  • – ده نظام دايت معتمد بشكل اساسي على اكل الخضار خصوصا الخضار اللي لونه اخضر وكل ما تاكلي اكتر من الخضار ده يكون افضل لان الخضار مافيش فيه سعرات حرارية لكن المشكلة ان الخضار مش هيدينا كل الطاقة اللي الجسم محتاجها عشان كده هنبقى محتاجين ناخد الطاقة اللي احنا محتاجينها من مصدر تاني ولازم بردو يكون مصدر صحي طيب ايه هو المصدر ده ؟ هو النشويات, والبقوليات, والمكسرات لان الحاجات دي فيها نوع سكر معين اسمه Complex sugar هيدينا الطاقة اللي احنا عايزينها وفي نفس الوقت مش هيرفع السكر في الدم ولا هيزود نسبة الكوليسترول والدهون في الجسم, عشان كده النشويات والبقوليات والمكسرات هي تعتبر انسب مصدر للطاقة, يعني هناكل خضار كتير على قد ما نقدر ونكمل بالنشويات عشان ناخد الطاقة للجسم.

– بالنسبة لكمية الاكل مافيش كميات اكل محددة مسموح بيها كلي كمية خضار زي ما انتي عايزة لان زي ما قولنا مافيش فيها سعرات حرارية, وكملي بالنشويات, يعني مثلا لو اكلتي وجبة حسيتي انك اكلتي فيها كمية نشويات كتير يبقى بشكل بديهي كده الوجبة اللي بعدها تاكلي فيها خضار بس او على الاقل يكون معظمها خضار.

– والدايت ده هيديكي تقريبا كل الفيتامينات اللي محتاجها الجسم يعني مش هتحرمي جسمك من اي حاجة لكن هو نوع فيتامين واحد اللي مش موجود في الخضار وهو بي 12 وده نقدر ناخده على شكل كبسولات ومكملات غذائية هتلاقوها في الصيدلية بسهولة جدا, وممكن لو انتي مش عايزة مكملات غذائية اعتمدي على الخضار الاورجانيك وده دلوقتي متوفر في كل السوبر ماركت ساعتها مش هتبقي محتاجة تاخدي فيتامين بي 12 لان الخضار الاورجانيك بيحتوي على الفيتامين ده.

  • – وطبعا بالنظام ده غير انك هتخسري وزنك هتحافظي على صحتك زي ما قولنا من امراض كتير جدا وهيحسن شكلك وصحتك بشكل عام وهيأخر علامات السن والشيخوخة وهيخليكي تباني اصغر من سنك, ده غير انه بيحسن النفسية جدا لان الاكل ليه تأثير كبير على الصحة النفسية وبما اننا هنمشي على نظام اكل صحي فده اكيد هينعكس بشكل ايجابي على نفسيتنا.

– والميزة في الدايت ده انه ينفع اي حد ومن جميع الاعمار يعني ينفع الحامل واللي بترضع لان عدم شرب اللبن مش هيأثر على الرضاعة زي ما هو منتشر اهم حاجة تكوني بتشربي كمية سوايل كتير وبتاكلي اكل صحي وبتاخدي كل الفيتامينات اللي لزماكي وده متوفر في نظام الدايت النباتي, ومناسب جدا للاطفال كمان ده هيحميه من السمنة اللي بتحصل لاطفال كتير وهتحافظ على جسمه لحد ما يكبر وهتحميه من الامراض.

  • – بالنسبة للتحول للنظام النباتي في حياتنا للناس مش هتقدر على ده على طول ممكن بالتدريج يبطلوا حاجة حاجة واحدة واحدة لحد ما يلاقوا نفسهم اتحولوا لنظام نباتي, بس طبعا الافضل والاحسن اننا نبعد عن كل الممنوعات مرة واحدة.
الدايت النباتي 1
الدايت النباتي 1

ايه الممنوع والمسموح في نظام الدايت النباتي:

1- الممنوعات:

  • – المنتجات الحيوانية بكل انواعها زي اللحوم, الطيور, الاسماك, الجبن, اللبن, البيض, والدهون الحيوانية.

– الدهون المشبعة زي السمنة, والزيوت كلها حتى زيت الزيتون, والزبدة.

  • – الاكل المعلب كله بجميع انواعه, والاكل المركز زي العسل, دبس الرمان, مكعبات الشوربة, الدقيق, المشروبات الغازية, حتي السكر الدايت.

– السكر والملح ولو مش هنقدر نستغنى عنهم خالص ممكن نقللهم على قد ما نقدر بنسبة من 80 ل 90%.

  • – العيش الابيض, التوست او اي انواع عليها زبدة او سكر او بيض او لبن.

– الفاكهة المجففة.

2- المسموح:

  • – طبعا الخضار بجميع انواعه.

– النشويات كلها زي الارز, المكرونة, البطاطس, شوفان وغيرها من النشويات.

  • – البقوليات زي العدس, اللوبيا, الفاصوليا, والبسلة وغيرها من البقوليات.

– المكسرات كلها بجميع انواعها بس تكون من غير ملح بس بكمية محدودة بردو يعني تقريبا ملأ الكف مرة واحدة في اليوم.

  • – المشروبات كلها ماعدا القهوة والعصاير اللي بيبقى فيها نسبة سكريات عالية الافضل اكل الفاكهة الطازة مسموحة بكل انواعها.

– بدائل الالبان النباتية ودي اللي هناخد منها الكالسيوم بدل اللبن زي المكسرات, اللوبيا, الحلبة, حمص الشام, الترمس, فول الصويا, حليب الصويا, وحليب اللوز, الفول, الفاصوليا الحمرا والبيضا, السبانخ, البروكلي, ورق العنب, والملوخية كل الحاجات دي هتدينا الكالسيوم اللي محتاجة الجسم.

  • – العيش البني وبردو بكيمات معقولة لان فيه سعرات عالية.

– التوابل كلها مسموحة ماعدا الملح زي ما قولنا.

الدايت النباتي 2
الدايت النباتي 2

– اقتراحات للوجبات:

دي بعض اقتراحات لوجبة الفطار والغدا والسناكس اللي ممكن نختار منها لوجباتنا.

  • – الفطار:

ممكن فول, طعمية, بطاطس مسلوقة, بطاطس مسلوقة او مشوية, باذنجان مشوي, سلطة خضرا, شوفان عليه فاكهة وغيرها من الحاجات المسلوقة او المشوية من غير اي زيوت او دهون.

  • – الغدا:

ارز مسلوق او بالخضار, مكرونة مسلوقة او بالخضار, بطاطس في الفرن, مسقعة, محشي, كشري, عدس, بصارة, بقوليات مطبوخة زي اللوبيا والفاصوليا والبسلة وغيرها, شوربة خضار.

  • – السناكس:

مكسرات, فشار, بطاطا, سلطة فاكهة, ترمس, حمص الشام, والسلطات بجميع انواعها زي السلطة الخضرا, سلطة الحمص, بابا غنوج, بطاطس مسلوقة بالثوم وغيرها من السلطات.

وفي ممكن نعمل بيها اي اكلة احنا عايزينها ودي متاخدة من اكلة مكرونة اسمها One pot pasta وهي انك تحطي المكرونة وعليها خضار او اي مكونات انتي عايزاها وتوابل وكل حاجة وتحطي عليهم مية كفاية وتقلبيهم مع بعض وتغطيها وتسيبيها لحد ما تستوي, الطريقة دي ممكن تتعمل مع اي نوع خضار او اي حاجة انتي عايزة تاكليها خضار او ارز او مكرونة او اي نوع بقوليات اي حاجة تخطر على بالك اعمليها بنفس الطريقة وبتبقى طعمها حلو جربوها عشان تشوفوا بنفسكم.

وطبعا في وصفات كتير جدااا للي عايزين يمشوا على النظام ده انتي ممكن تحولي اي اكلة للنظام النباتي لو كتبنا على اليوتيوب او جوجل Vegan recipes هتطلع لنا كل الوصفات اللي ممكن نعملها لنظام الدايت النباتي وهتلاقوها كلها لذيذة.

الدايت النباتي 3
الدايت النباتي 3

– هل ينفع الدايت النباتي للي عايزين يزودا وزنهم؟

للي عايزين يمشوا على اكل صحي ويحافظوا على صحتهم بس في نفس الوقت مش عايزين يخسوا وبالعكس بيبقوا عايزين كمان زيادة وزن اكيد ينفع معاهم الدايت النباتي بس مع شوية تغييرات طبعا الاساس اكل الخضار كتير بس هنزود في اكل حاجات تانية عكس اللي قولناه للي عايزين يخسوا يعني مثلا زي المكسرات احنا قولنا للي عايزين يخسوا انهم ياكلوا ملأ الكف مرة واحدة في اليوم لكن الموضوع هيبقى العكس مع اللي عايزين يزودا وزنهم هيزودا من اكل المكسرات لان فيها سعرات حرارية عالية جدا, وياكلوا عيش اكتر, ونشويات اكتر بس من غير ما نبالغ اوي في الكمية بردو, يعني كتري من النشويات والعيش والمكسرات مع الخضار, الشوفان مثلا من الحاجات الصحية جدا اللي ممكن تزود الوزن لو ضيفنا عليه فاكهة ومكسرات ولبن جوز هند.

الدايت النباتي 4
الدايت النباتي 4

اعرفي كمان ايه هو دايت الزبادي وازاي تعمليه وايه هي فوايده

ايه هو دايت الزبادى و ازاى تعمليه و اىيه هى فوايده
ايه هو دايت الزبادى و ازاى تعمليه و اىيه هى فوايده

مقالات متعلقه

دايت القلب لمدة 3 ايام: هيساعدك تخسي 4 كيلو مع الاطعمة الصحية للقلب

دايت القلب لمدة 3 ايام: هيساعدك تخسي 4 كيلو مع الاطعمة الصحية للقلب

7 اطعمة ابعدي عنهم تماما لو بتحاولي تخسري وزن

7 اطعمة ابعدي عنهم تماما لو بتحاولي تخسري وزن

وصفات لسد الشهية وتخسيس الوزن

وصفات لسد الشهية وتخسيس الوزن