5 طرق رائعة تلبسي بيهم اللون المسطردة في الشتا
واحد من الالوان المميزة جدا اللي ممكن نلبسها في الشتا هو اللون المسطردة وبالرغم انه مش منتشر اوي او نازل منه كتير لكن اللون ده بيدي لوك مشرق جدا ومميز, واحنا ممكن نلبسه باكتر من طريقة خلال موسم الشتا, عشان كده احنا النهاردة جايبين لكل بنات حوا موضة اللون المسطردة للشتا وازاي تلبسيه بـ 5 طرق مختلفة.
موضة اللون المسطردة للشتا:
1- جاكيت وبليزر مسطردة:
ممكن تلبسي اللون المسطردة كجاكيت او بليزر والبليزرات من الحاجات اللي كانت موضة اوي في موسم الصيف ومكملة معانا كمان موسم الشتا, وممكن تنسقيهم الجاكيت مع الوان كتير زي الاسود, الابيض, الرمادي, البورجندي او العنابي, والازرق الدنيم, ولما تيجي تنسقي معاه شوز مش لازم يكون شوز ملون ممكن تلبسي عليه الاسود او الرمادي او البني.
2- بلوفر مسطردة:
ممكن تلبسي بلوفر باللون المسطردة على البنطلون الجينز او الجلد, ولو انتي من محبات لبس الجيبات ممكن تلبسيه على جيبة, ممكن تلبسي البلوفر لوحده لما يكون الجو مش برد اوي, او تلبسي فوقيه جاكيت في الايام البرد, وممكن كمان تعملي ستايل مختلف وتنسقي تحته قميص, او ممكن تلبسي كارديجان مسطردة على جيبة او بنطلون جينز او فستان.
3- بنطلون مسطردة:
يمكن مش كتير بيلبسوا اللون المسطردة كبنطلون, لكن اللون ده بيبقى حلو اوي في البنطلون بدرجاته كلها من المسطردة الفاتح للغامق, ممكن تلبسيه على بادي او قميص وعليه جاكيت بيبقى شيك جدا ومختلف.
4- جيبة باللون المسطردة:
للبنات اللي بيحبوا الجيبات ممكن تلبسي جيبة باللون المسطرده سواء الجيبات A-Line او Pencil Skirt وتنسقي معاها بلوزة, او بلوفر وتحته قميص, او بلوزة وعليها بليزر, يعني تقدري تنوعي في لبسها بالشكل اللي تحبيه اكتر.
5- اكسسوارات باللون المسطردة:
لو انتي مش حابة اللون يكون ظاهر اوي او مترددة تطلعي بلوك جريء ممكن تكتفي بلبس اللون المسطردة كأكسسوار بس مكمل للبس زي مثلا الكوفية, السكارف, الجوانتي, الشنطة, هتبقي لبستي اللون لكن في نفس الوقت بتاتش بسيط بس.
واحنا بننصح كل بنات حوا بتجربة اللون ده لانه من الالوان اللي هتطلعك بلوك مميز اوي وفي نفس الوقت مناسب جدا للشتا.