الماسك السحري لبشرة نقية وشعر لامع باستعمال الحلبة بس
كلنا لما بنقعد ندور على ماسكات للبشرة او للشعر دايما بنحاول نختار الماسكات السهلة لاننا ساعات بنكسل نعمل الماسكات اللي فيها مكونات كتير او ساعات بيكون في مكونات مش متوفرة عشان كده النهاردة جايبين لكل بنات حوا ماسك سحري سهل جدا بمكون واحد بس وهي الحلبة من غير اي اضافات تانية خالص, وكمان الماسك يعتبر اتنين في واحد لاننا هنستخدمه للبشرة والشعر, وفوايده فورية يعني بتبان من اول مرة.
العناصر اللي في الحلبة بتساعد على علاج بثور البشرة, والحبوب الحمرا والالتهاب لانه بينضف الجلد من السموم اللي ممكن تسبب البثور والالتهاب,بيقلل من الهالات السودا, بيعالج بقع البشرة, بيقلل مسامات البشرة الواسعة, بيخلصك تماما من الرؤوس السودا, بينعم البشرة وبيرطبها جدا وبيخليها مشدودة ومنورة
اما فايدته للشعر بيرطب الشعر وبينعمه اوي وبيديه لمعة مش طبيعية, بيعالج تلف الشعر, وبيخلي شكله صحي جدا, بيمنع كمان الشيب المبكر.
ممكن نكرر الماسك للبشرة والشعر مرة في الاسبوع او حسب احتياجنا, والميزة فيه انه مناسب لكل انواع البشرة والشعر.
ماسك الحلبة للبشرة والشعر:
المكونات:
½ كوباية حلبة بذور.
2 كوبابة مية.
الطريقة:
هنحط الحلبة في المية على النار ونسيبها تغلي لمدة 5 دقايق وبعدين نسيب الحلبة في المية طول الليل والصبح نطلع الحلبة من المية ونطحنها في الخلاط لحد ما تبقى ناعمة على شكل عجينة دي هنستخدمها للبشرة, نحط العجينة على البشرة كلها ونضغط عليها على الوش هنلاقيها لزقت على البشرة هنسيبها 15 دقيقة وبعدين نغسلها بالمية.
دلوقتي هناخد المية اللي غلينا فيها الحلبة نحطها في ازازة ببخاخ عشان نستخدمها للشعر, هنرش الشعر كله من الجذور للاطراف ونسيبها عليه طول الليل ونغسلها الصبح.
كده نبقى استفدنا من الحلبة والمية بتاعتها لبشرتنا وشعرنا بطريقة سهلة , ياللا جربوا الماسك ده وقولوا لنا نتايجه معاكم ايه :).