كل اللي محتاجة تعرفية عن الستروبنج Strobing المكياج المضيء..وازاي تعمليه

بقلمريهام محمود فيمكياج visibility4090

الفترة اللي فاتت كان الكونتور من الحاجات اللي مسيطرة على عالم المكياج وكل خبراء المكياج والبلوجرز اللي متخصصين في المكياج والمشاهير كانوا بيعتمدوه لمكياجهم, وزي ما كلنا عارفين ان الكونتور هو نحت الوش باستخدام المكياج بدرجات فاتحة وغامقة عن لون البشرة عشان نبرز بيها الملامح لكن مشكلة الكونتور انه بياخد وقت في تنفيذه.

 ومن هنا ظهرت تقنية الستروبنج Strobing اللي هنتكلم عنها النهاردة وهي طريقة تحديد ملامح الوش ولكن بشكل اسرع والتقنية دي بتعتمد على اضاءة الوش بشكل طبيعي باستخدام الهايلايتر في مناطق عضم الخد, وعضم الحواجب, منتصف الجبين, الجزء الاسفل من الانف, والدقن.

والهايلايتنج او اضاءة الوش هي مش حاجة جديدة في عالم المكياج لكن هي موجودة بقالها فترة لكن هنستخدمها بطريقة مختلفة عشان نحدد بيها ملامح الوش من غير استخدام برونزر او كونتور, والستروبنج مناسب جدا للي عايزين يحددو ملامحهم لكن مش بيحبوا الكونتور وعايزين طريقة طبيعية اكتر.

– خطوات عمل الستروبنج Strobing لنحت الوش:

1- الخطوة الاولى: تحضير البشرة:

الخطوة دي مهمة جدا لانها بتحضر بشرتنا للمكياج عشان يطلع مظبوط, هندهن البشرة سيروم وممكن نستخدم لوريال او اولاي وبعدين ندهنها بالكريم المرطب, الخطوة دي هتخلي كريم الاساس يتفرد بشكل احسن على البشرة وهيطلع شكله احلى وهيخلي بشرتك منورة.

تحضير البشرة
تحضير البشرة

2- الخطوة التانية: البرايمر وكريم الاساس:

تاني خطوة هنحط البرايمر عشان نثبت المكياج بتاعنا لفترة اطول ومش بس كده كمان بيدي لوك مشرق للبشرة, وبعد البرايمر هنحط كريم الاساس والافضل نستخدم نوع خفيف على البشرة عشان يبقى اللوك طبيعي.

البرايمر وكريم الاساس
البرايمر وكريم الاساس

3- الخطوة التالتة: الهايلايت:

  • – دلوقتي جينا لخطوة الستروبنج اللي هنضيء بيها البشرة ونحدد الملامح, هنحط الهايلايت على منطقة منتصف الجبين, اعلى الحواجب, اسفل ووسط الانف, فوق الشفة على منطقة قوس كيوبيد, الدقن, عضم الخد, عضم الحاجب, والزاوية الداخلية للعين.

– الاول هنبدأ بالهايلايتر الكريمي وبعدين نثبته بهايلايتر بودر خفيف, وفي الاخر نحط هايلايتر بودر اكتر اضاءة.

الستروبنج Strobing
الستروبنج Strobing

– الهايلايت حسب شكل الوش:

في اللوك ده ركزت الهايلايت على منطقة منتصف الجبين, فوق عضمة الحاجب, اعلى عضمة الخد, اعلى طرف الانف, فوق قوس كيوبيد, وعلى الدقن, وهي عشان وشها ماسي فكان التركيز على المناطق اللي عرضها اقل اللي هي الجبين والدقن عشان تظهرها.

هايلايت للوش الماسي
هايلايت للوش الماسي

وفي اللوك ده عشان وشها بيضاوي تركيز الاضاءة اكتر على الجبين, والانف, وفوق الشفة العليا, عشان يدي استدارة اكتر للوش, الهايلايت هيبقى في اسفل وسط الوجه.

هايلايت للوش البيضاوي
هايلايت للوش البيضاوي

اللوك ده للوش المربع التركيز هيكون على الجزء العلوي من الوش, والزوايا الداخلية للعين, واعلى عضمة الخدين, وطرف الانف, واعلى قوس كيوبيد, عشان يديها لوك انعم واستدارة للوش الهايلايت هيبقى في نص الوش.

هايلايت للوش المربع
هايلايت للوش المربع

شوفي كمان 7 نصايح تعملي بيهم كونتور سريع لمكياجك الصبح

7 نصايح تعملى بيهم كونتور سريع علشان مكياجك الصبح
7 نصايح تعملى بيهم كونتور سريع علشان مكياجك الصبح