15 طريقة غير عادية وفعالة جدا لتحسين مهارات التواصل في شخصيتك !

ريهام محمود
ريهام محمود
9195

في كتير من البنات بيبقى عندهم مشكلة التواصل مع اللي حواليهم, لو مروا بموقف معين مش بيعرفوا يتصرفوا فيه التصرف الصح او يعملوا فيه ايه وده ممكن يسبب لنا في اوقات كتير مشاكل في حياتنا وهيخلينا نحس بعدم ثقة في النفس, عشان كده احنا النهاردة جايبين لبنات حوا اللي بيعانوا من مشكلة التواصل 15 طريقة فعالة جدا هتساعدهم على تحسين مهارات التواصل في شخصيتهم.

15 طريقة هتساعدك على تحسين مهارات التواصل في شخصيتك:

1- لو انتي بتشتغلي في مكان بتتعاملي فيه مع اشخاص كتير حطي وراكي مرايا لان الغريب ان اللي حواليكي لما يجوا يتعاملوا معاكي هيتعاملوا بطريقة كويسة واكتر تهذيب وهما شايفين نفسهم في المرايا لانهم هيبقوا حاسين بعدم راحة وهما شايفين نفسهم بيتعاملوا بطريقة مش كويسة او بغضب.

2- لو قعدة في اجتماع شغل مع جروب ومتوقعة ان شخص منهم هيهاجمك او يطلب منك مهمة معينة اقعدي على يمينه, ده هيوجه عقله بشكل لا ارادي ده انه ميهاجمكيش, او على اقل تقدير هيخفف من حدة الهجوم.

3- لو بتتناقشي في موضوع معين وبتتبادلي وجهات نظر واراء مع اللي حواليكي قولي رايك او وجهة نظرك ومتحاوليش تزودي اكتر منها وسيبي اللي قدامك يفكر في كلامك ويرد عليكي.

4- رتبي افكارك قبل ما تتكلمي او تدخلي في اي نقاش, وابدأي كلامك انك تقولي حجة قوية عشان تبيني انك واثقة من نفسك وبعدين ابدأي قولي الحجج الاضعف, وخلي اخر فكرة او اخر حاجة تختمي بيها كلامك هي الفكرة الاكتر اقناع للي قدامك.

5- لو الشخص اللي قدامك بيحاول يستفزك ويعصبك باي طريقة حاولي انك تحافظي على هدوئك على قد ما تقدري , رد فعلك الهادي على استفزاز اللي قدامك هيحرجه, يعني اجبري اللي قدامك يتعامل معاكي زي ما انتي عايزة مش زي ما هو عايز.

6- لو داخلة في جدل مع حد حاولي تتجبني كلمة “انت/ انتي” لانها هتبقى كانها اتهام للشخص اللي قدامك والوضع هيخرج من تحت سيطرتك, افضل حاجة تقولي “اعتقد كذا” او “متهيألي كذا” الكلمات دي تعتبر وسيلة كويسة جدا للتوافق في الاراء اكتر.

7- لاحظي عيون الشخص اللي انتي بتكلميه, الاشخاص اللي بيحبوكي اكتر هيبقى في اتصال اكتر بالعين بينكم وبالتالي هتبقي مرتاحة اكتر وانتي معاهم.

تحسين مهارات التواصل
تحسين مهارات التواصل

8- مهم جدا اننا ننمي الثقة في النفس عند الاطفال, لو عندك طفل خليه ياخد قرارات بسيطة خاصة بيه, يعني مثلا خليه هو يختار لبسه بنفسه ده هيخليهم يحسوا انهم ليهم شخصية وهيزود ثقتهم في نفسهم جدا وده بالتالي هيقلل من حالات الخناق والغضب اللي بتحصل لكتير من الاطفال وهترتاحي جدا من مشاكل كتير.

9- لو بتقابلي شخص لاول مره حاولي انك تقابليه في مكان انتي بتحبيه وبترتاحي فيه وبتحسي فيه بمشاعر ايجابية عشان تبقي مرتاحة خلال المقابلة وهتكون انطباعاتك ايجابية اكتر وهتحسي باسترخاء وراحة اكتر.

10- لو مجتمعة مع مجموعة دايما خلي شعورك حماسي وفيه اهتمام حقيقي باللي انتي بتقوليه لان الشعور ده هيتنقل ليهم وهتلاقيهم متحمسين وبيتفاعلوا معاكي بشكل احسن, وده هيخليكي تبذلي جهد ووقت اقل في التواصل مع اللي حواليكي.

11- لو داخلة في مشادة او نقاش حاد مع شخص استخدمي حجج حقيقة ومتأكدة منها بدل ما تتعصبي وتفقدي اعصابك على حاجة مش صح وبعدين لما تيجي تراجعي نفسك هتندمي وهتتعصبي زيادة.

12- لو بتسألي شخص عن حاجة ومقالكيش كل اللي انتي عايزاه او رد باجابة مختصرة خليكي قدامه ساكتة وحافظي على تواصل العين بينكم ده هيوصله انك لسه مستنياه يكمل كلامه وان اللي قاله مش كافي بالنسبة لك وانك محتاجة تسمعي تفاصيل اكتر, وبالتالي اللي قدامك هيكمل كلامه.

13- مرني نفسك اكتر على الاسئلة المفتوحة مش المغلقة اللي بتحتاج بس اجابة بايوة او لا, يعني اسألي الاسئلة اللي تفتح مجال حديث وكلام كتير ومناقشة وتخليكي تعملي تواصل اكتر مع اللي حواليكي, وممكن تستخدمي خلال حديثك مزيج من الاسئلة المفتوحة والمغلقة مع بعض يعني نوعي في حديثك ميبقاش واخد نمط واحد.

14- لو متعرفة على حد جديد حاولي انك بعد مرحلة التعارف تتعاملي معاه باسمه حتى لو مش متأكدة انك هتشوفي الشخص ده تاني, لان ده بيساعد على تكوين علاقة اقوى ويبقى في ود وثقة بين الطرفين بشكل اكبر وبالتالي لو اتقابلتوا تاني هيبقى في تواصل اكتر بينكم لانكم عملتي ده من اول مقابلة.

15- لما تكوني مع مجموعة من الاشخاص  سواء اصحاب او في الشغل وبيضحكوا ويهزروا مع بعض بشكل غريزي او لا ارادي الانظار بتتوجه للاشخاص اللي بيحسوا ناحيتهم انهم الاقرب او بيرتاحوا معاهم اكتر, فخليكي دايما انتي من الاشخاص دي اللي لما تكوني في مجموعة تكوني من الاقرب للي موجودين كده تبقي نجحتي بنسبة مية في المية في مهارات التواصل بتاعتك.

ازاي تغيري حياتك للافضل في شهر واحد بس !

ازاي تغيري حياتك للأفضل في شهر واحد بس
ازاي تغيري حياتك للأفضل في شهر واحد بس

مقالات متعلقه

7 حاجات في شخصيتك ممكن تخوف اللي حواليكي منك

7 حاجات في شخصيتك ممكن تخوف اللي حواليكي منك

ازاي توقفي الاهتمام بشخص مش مهتم بيكي !

ازاي توقفي الاهتمام بشخص مش مهتم بيكي !

نصايح وأفكار إزاي تحسني التواصل بينك وبين شريكك

نصايح وأفكار إزاي تحسني التواصل بينك وبين شريكك