دليل هيساعدك تختاري الاكسسوارات المناسبة مع لبسك وشكل وشك
الاكسسوارات من الحاجات المهمة اللي بتكمل اللوك بتاعنا عشان نطلع بشكل حلو لكن في كتير من البنات بتحتار لما بتيجي تختار الاكسسوارات المناسبة على اللبس وايه هو انسب اكسسوار لكل ستايل لبس, وكمان للبنات اللي بيحبوا لبس الحلقان ومش بيعرفوا ازاي يختاروا الحلق اللي يليق على شكل وشهم اللي ممكن يداري ديفوهات الوش ويطلعوا بشكل احلى, عشان كده احنا النهاردة هنساعد كل بنات حوا في المهمة دي عن طريق دليل لاختيار الاكسسوار المناسب مع كل ستايل لبس, وازاي تختاري الحلق المناسب لشكل وشك.
– دليل اختيار الاكسسوارات المناسبة للبس:
1- الاكسسوار مع البلوزات اللي بلياقة:
لو لابسة بلوزة او قميص او فستان بلياقة يبقى انسب اكسسوار يتلبس عليه الاكسسوار الضيق اللي على قد الرقبة, او اكسسوار بتفاصيل بسيطة ويكون نازل تحت اللياقة على طول والاختيار ده يكون مع البلوزات اللي مافيهاش تفاصيل على الصدر.
2- الرقبة المدورة:
لو لابسة بلوزة برقبة مدورة يبقى انسب اكسسوار ليها هو الستايل الضخم مع احجار اللي يملى منطقة الصدر او الجزء المفتوح, والافضل تختاري الاحجار وشكل العقد يكون مدور مع تدويرة الصدر.
3- فساتين من غير حمالة:
لو في مناسبة ولابسة فستان سهرة او توب من غير حمالات يبقى انسب اكسسوار تلبسيه معاه عقد رقيق على قد الرقبة.
4- الرقبة العالية “رقبة السلحفة”:
في الشتا كلنا تقريبا بتبقى قطعة اساسية في دولابنا البلوفرات اللي برقبة عالية الستايل ده انسب اكسسوار عليه هو السلسلة الطويلة او متوسطة الطول مع حجر مثلا في اخرها, او السلسلة الطبقات اللي بتكون كذا طبقة فوق بعض.
5- الرقبة على شكل حرف V:
الرقبة على شكل حرف V انسب اكسسوار ليها هو اللي بيكون واخد نفس الشكل يعني نازل حرف V بردو ويكون بسلسلة رفيعة, وممكن تلبسيه قصير على قد الرقبة او نازل شوية على فتحة الصدر.
6- البلوزات والفساتين بكتف واحد:
بالنسبة لستايل الكتف الواحد انسب حاجة ليه هو الاكسسوار اللي بيكون بحجم مختلف يعني يبقى قصير في طويل او جاي من جنب اطول من الجنب التاني, وممكن تستغني عن العقد خالص وتلبسي بس حلق طويل.
7- الرقبة الواسعة “Boat Necklines”:
بالنسبة للرقبة الواسعة اللي واصلة لنهاية الكتاف اللي بتبقى واخدة شكل قارب انسب حاجة تتلبس عليها هي السلسلة الطويلة.
8- الرقبة المربعة:
الرقبة المربعة انسب ستايل اكسسوار عليها اللي يكون نازل على تربيعة الصدر مع حجر مربع او مستطيل.
9- الرقبة الطبقات:
ستايل البلوزات او البلوفرات اللي بتكون فيها رقبة طبقات فوق بعض قدامك اختيارين للعقد مع الستايل ده ياما تلبسي عقد قصير على قد الرقبة فوق الطبقات, او تلبسيه طويل نازل تحت طبقات الرقبة, وممكن تستغني عن العقد وتلبسي حلق بس.
– ازاي تختاري الحلق المناسب لشكل وشك ؟
1- الوش المدور:
صاحبة الوش المدور هتبقى محتاجة حلق يقلل من تدويرة الوش والخدود شوية ويبينه اطول عشان كده انسب حاجة هتكون الحلقان الطويلة, واتجنبي لبس الحلقان المدورة الكبيرة لانها هتزود تدويرة الوش, واختاري الاكسسوار يكون من رفيع لعرض متوسط يعني ميكونش ضخم اوي.
2- الوش المربع:
الوش المربع بيبقى الجبين والخدين والفكين نفس العرض والوش ده محتاج اكسسوار يقلل من عرض عضم الخد والفك فيكون الاختيار المناسب ليهم الاكسسوار الطويل اللي نازل عند الرقبة او المدور او البيضاوي, ولو بتحبي الحلقان اللي فيها تفاصيل كتير ممكن تلبسي الحلقان المدورة اللي نازل منها اكسسوارات صغيرة نازلة تحت خط الفك هتبين الوش اصغر وانعم, واتجنبي لبس الاكسسوارات العريضة اوي.
3- الوش المستطيل:
الوش المستطيل بيبقى شبه المربع ولكن على ارفع شوية, والوش ده انسب حاجة ليه الحلقان اللؤلؤ الصغيرة او اللي بتكون نازلة حاجة بسيطة تحت شحمة الاذن على طول عشان بتدي نعومة للوش وبتقلل من طوله, ولو هتختاري الحلق اللي نازل شوية اختاريه يكون بكيرف من تحت لانها هتخفف من حدة بروز عضم الخد وهتدي نعومة اكتر للوش.
4- الوش على شكل قلب:
الوش القلب بيكون فيه منطقة الجبين اعرض من الخدين ونازل على رفيع عند الدقن, اختاري الحلقان اللي نازلة بكيرف من تحت على شكل دمعة او الثريا اللي بيبقى في ماسات لانها هتعمل توازن لشكل الوش وهيلفت الانتباه للعيون وعضم الخد وخط الفك السفلي.
5- الوش البيضاوي:
الوش البيضاوي هو وش متناسق تقريبا بتبقى مساحات مناطق الوش كلها متساوية يعني عرض الجبين زي عضم الخد وبيضيق حاجة بسيطة عند الدقن بس, عشان كده الوش ده بيليق عليه كل ستايلات الحلقان, لكن لو عايزة تتميزي وتظهري وشك اكتر ممكن تلبسي حلق نازل بيضاوي هيبقى مناسب اوي ومش هيدي طول او اعرض زيادة للوش, او تلبسي الحلق اللي نازل على شكل دمعة.
6- الوش على شكل ماسة:
الوش الماسي بيكون فيه الجبين والدقن اضيق من عضم الخد وبيكون عضم الخد ظاهر وشكله قوي اوي في الوش, هيكون انسب حلق للوش الماشي هو الطويل مع كيرف ناعم عشان يخفف من حدة عضم الخد, واتجنبي لبس الحلق الطويل اللي واخد شكل ماسي لانه هيبرز عضم الوش اكتر بشكل مبالغ فيه.
شوفي من هنا ايه هي اشكال الوشوش المختلفة وازاي تعرفي شكل وشك ؟
– نصايح في اختيار الاكسسوارات:
1- للبشرة البيضا او الفاتحة الافضل يختاروا الاكسسوارات اللي مصنوعة من المعدن بنفس لونه الطبيعي, زي الفضي, البلاتين, الستيل, النيكل, لكن البشرة السمرا انسب لها الالوان اللي على برونز او دهبي.
2- لو اكسسواراتك فيها احجار كريمة مختلفة يبقى اتأكدي ان الوانها ماشية مع لون عينيكي, الاحجار بالالوان الدافية تمشي اكتر مع لون العيون الغامقة, لكن لو لون عينيكي فاتح يبقى انسب الوان احجار ليكي هي الالوان الفاتحة اللي فيها لمعة.
3- البنات الرفيعين هيبقى افضل انهم يختاروا حلق ناعم مش ضخم, لكن البنات المليانين شوية او الكيرفي ممكن يلبسوا الاكسسوارات الضخمة اللي بتاخد العين وتلفت النظر.
4- متلبسيش كل انواع واشكال الاكسسوارات مع بعض يعني الخواتم والعقد والحلق والاسورة لان اللوك هيبقى اوفر اوي, الافضل انك ماتلبسيش اكتر من قطعتين اكسسوار اللوك هيبقى احلى وانعم.
5- نخلي بالنا ان قطعة الاكسسوار اللي انتي لابساها هتلفت النظر وهتخلي التركيز والعيون على المكان اللي انتي لابساها فيه عشان كده لازم تكوني طالعة بلوك انيق في كل حاجة انتي لبساها, ولو هتلبسي مثلا خاتم واسورة يبقى تاخدي بالك ان شكلك ايديكي وضوافرك يكونوا حلوين لانك هتلفتي النظر والعيون ليهم.
اعرفي كمان ازاي تختاري اللبس اللي يليق على شكل جسمك
