14 وصفة جمالية مدهشة باستخدام الشاي الاخضر اكيد هتجربيهم

ريهام محمود
ريهام محمود
في
بشرة
6954

اكيد كلنا سمعنا اكتر من مرة عن فوايد الشاي الاخضر الصحية والجمالية, والشاي الاخضر من الحاجات اللي كانت بتستخدم كعلاج من آلاف السنين في الدول الآسيوية وخصوصا الصين وده لانه بيحتوي على كمية عالية من المواد المضادة للاكسدة وعنصر البولي فينولات اللي ليه فوايد صحية وجمالية كتير جدا, ده غير فوايدة للتخسيس لو شربتيه كل يوم بيساعد على انقاص الوزن, كمان بيحمي من السرطان والاكتئاب وغيرها من الفوايد اللي هنعرفها النهاردة مع بعض من خلال 14 وصفة باستخدام الشاي الاخضر.

وصفات جمالية بالشاي الاخضر:

1- وصفة الليمون والشاي الاخضر:

المكونات:

  • – 2 معلقة كبيرة من الشاي الاخضر البارد.

– ½ معلقة صغيرة عصير ليمون.

  • – قليل من الكركم.

الشاي الاخضر غني جدا بالمواد المضادة للاكسدة, وبيحمي البشرة من اشعو الشمس الضارة, وغني بالفيتامينات والمعادن المغذية للبشرة, وبيساعد على محاربة علامات الشيخوخة.

الليمون غني بفيتامين سي اللي بيعزز انتاج الكولاجين في البشرة, وحمض الستريك اللي بيساعد على شد المسام وتفتيح البشرة, وعنصر البوتاسيوم اللي بيساعد على ترطيب البشرة, وبيحتوي على عنصر اللوتين اللي بيعزز مضادات الاكسدة الطبيعية في البشرة, وبيحارب الشيخوخة المبكرة, وبيحمي البشرة من الاشعة فوق البنفسجية.

الكركم بيحتوي على خصائص طبيعية مضادة للالتهاب, وبيحمي البشرة من حب الشباب والاكزيما والامراض الجلدية المختلفة, وغني بمضادات الاكسدة اللي بتعالج بقع البشرة والنمش والندوب.

الطريقة:

هنخلط المكونات كلها مع بعض كويس وناخد من الخليط بقطنة ندهن البشرة ونسيبه لمدة 3 دقايق لحد ما ينشف وبعدين نكرره تاني وندهن البشرة ونكرره لحد ما كمية الماسك تخلص يعني كرريه تقريبا لمدة 10 دقايق وبعدين اغسلي البشرة بمية باردة.

لو الكركم ساب لون على البشرة ممكن تفركي بشرتك بالسكر بعد الماسك او تمسحي البشرة بقطنة فيها لبن او مية ورد, ولو مش عايزين الكركم ممكن تستغنوا عنه وتكتفوا بالشاي الاخضر والليمون بس هيبقى مفيد بردو للبشرة.

وصفة الليمون والشاي الاخضر
وصفة الليمون والشاي الاخضر

2- سكراب النعناع والشاي الاخضر للجسم:

السكراب ده بينعم البشرة جدا وبيرطبها وبيقشر الجلد وبيجدده ده غير انه بيخلي ريحة الجسم حلوة جدا.

المكونات:

  • – كوباية سكر.

– 3 معالق كبيرة ملح انجليزي.

  • – 2 معلقة كبيرة زيت زيتون.

– 2 معلقة كبيرة عسل.

  • – 2 كيس نعناع.

– 2 كيس شاي اخضر.

  • – 6 نقط زيت نعناع.

– 4 نقط من زيت فيتامين E.

الطريقة:

هنخلط كل المكونات الجافة مع بعض ونضيف العسل والزيوت العطرية على حسب ما نوصل لقوام معقول للخليط ونمزج المكونات مع بعض كويس جدا ونستخدم الخليط نفرك بيه الجسم, والباقي نحتفظ بيه في برطمان نضيف لحد ما نيجي نستخدمه تاني.

سكراب النعناع والشاي الاخضر للجسم
سكراب النعناع والشاي الاخضر للجسم

3- جل الشاي الاخضر والليمون للعين:

الجل ده بيساعد على علاج الهالات السودا والانتفاخات. وبيفتح منطقة تحت العين.

المكونات:

  • – معلقة كبيرة شاي اخضر مطحون ناعم.

– معلقة صغيرة بودرة جيلي.

  • – عصير ليمونة.

– 100 مل مية مغلية.

الطريقة:

هنخلط الشاي الاخضر مع بودرة الجيلي ونضيف عليهم المية المغلية وعصير الليمون ونقلبهم مع بعض كويس وبعدين نصبهم في قوالب صغيرة ممكن نحطهم في قوالب التلج المربعة بس منملاش القالب اوي يعني نحط شوية صغيرين والافضل اننا نحطه في القوالب السيليكون عشان يبقى سهل نطلعه منه وبعدين نحطه في التلاجة من 2 – 3 ساعات او ممكن نسيبه من بالليل للصبح, وبعدين نطلع منه ونحطه تحت العين.

جل الشاي الاخضر والليمون للعين
جل الشاي الاخضر والليمون للعين

4- الشاي الاخضر واللافندر للقدم:

بينعم القدمين وبيجدد الجلد, وبيعالج آلام القدمين الناتجة عن المشي الكتير او الرياضة او حتى للحوامل اللي بيعانوا من آلام القدمين الخليط ده بيساعد على استرخائها.

المكونات:

  • – كوباية ملح انجليزي.

– 2 كيس شاي اخضر او 2 معلقة صغيرة.

  • – ½ معلقة صغيرة من زيت اللافندر.

– 8 لتر مية دافية.

الطريقة:

اخلطي كل المكونات مع بعض واحفظيهم في برطمان لحد الاستخدام, لما تيجي تستخدميه حطي في طبق كبير 8 لتر مية دافية ومعاهم كمية من الخليط وتنقعي فيه رجلك لمدة 20 دقيقة على الاقل.

الشاي الاخضر واللافندر للقدم
الشاي الاخضر واللافندر للقدم

5- زبدة كاكاو الشاي الاخضر:

دي طريقة زبدة كاكاو طبيعية لترطيب الشفايف.

المكونات:

  • – معلقة كبيرة زيت جوز هند.

– 2 كيس شاي اخضر.

  • – معلقة صغيرة زيت زيتون او زيت لوز حلو.

– معلقة كبيرة شمع العسل.

  • – كام نقطة من اي زيت عطري مفضل “اختياري”.

الطريقة:

في حمام مية سخنة هنسيح زيت جوز الهند وهنحط معاه كيسين الشاي ونسيبه لحد ما الزيت يسيح وبعدين نرفعه من على النار ونسيبه ساعة يبرد ونشيل اكياس الشاي ونضيف زيت الزيتون وشمع العسل وندوبهم في حمام المية وبعدين نصبهم في اي علبة او برطمان صغير عندنا ونسيبه لحد ما يبرد خالص وممكن نحطه في التلاجة لمدة 8 ساعات لحد ما يبرد ويتجمد وبعدين نستخدمه على الشفايف.

زبدة كاكاو الشاي الاخضر
زبدة كاكاو الشاي الاخضر

6- مرطب الشاي الاخضر وزيت جوز الهند للبشرة:

كريم مرطب للبشرة بيساعد على ترطيبها من غير ما يسد المسام, وبيعكس اشعة الشمس الضارة وبيحمي البشرة.

المكونات:

  • – كوباية زيت جوز هند.

– 2 معلقة كبيرة شاي اخضر.

الطريقة:

هنسيج زيت جوز الهند في حمام مية سخنة ونضيف عليه الشاي الاخضر ونغطيه ونسيبة على نار هادية لمدة ساعة, وبعدين نصفي الزيت من الشاي بشاشة ونسيبه لحد ما يبرد ويتجمد ونقلبه لمدة من 3 – 5 دقايق لحد ما يبقى قوامه كريمي ونحطه في برطمان ونستخدم منه على البشرة زي الكريم العادي ناخد كمية صغيرة ندهن بيها البشرة.

مرطب الشاي الاخضر وزيت جوز الهند للبشرة
مرطب الشاي الاخضر وزيت جوز الهند للبشرة

7- غسول الشاي الاخضر لترطيب الشعر:

لو شعرك مجهد وجاف وخفيف وبتعاني من التساقط استخدمي غسول الشاي الاخضر للشعر بيساعد على ترطيب الشعر الجاف وبيخليه بيلمع, بيساعد على زيادة نمو الشعر, بيمنع تساقط الشعر, وبيهدي التهاب وتهيج فروة الراس.

المكونات:

  • – 2 كيس شاي اخضر او 2 معلقة صغيرة.

– مية مغلية.

الطريقة:

حطي كيسين الشاي في المية المغلية وسيبيهم منقوعين فيه لحد ما المية تبرد طلعي اكياس الشاي من المية وبعد ما تغسلي شعرك اشطفيه بالشاي الاخضر وسيبيه على الشعر 3 دقايق وبعدين اغسليه بالمية.

غسول الشاي الاخضر لترطيب الشعر
غسول الشاي الاخضر لترطيب الشعر

8- سبراي الشاي الاخضر والخيار للجسم:

سبراي الشاي الاخضر للجسم غني بالمواد المضادة للاكسدة الموجودة في الشاي اللي بتساعد على تجديد الجلد وترطيبه, وبتعالج جفاف وتلف الجلد الناتج عن اشعة الشمس.

المكونات:

  • – كيس شاي اخضر.

– نص خيارة.

  • – معلقة كبيرة جل صبار الالوفيرا.

– 2 نقطة من زيت النعناع “اختياري”.

الطريقة:

اعملي كوباية شاي اخضر بالطريقة العادية وبعدين حطيها في التلاجة لحد ما تبرد, قشري الخيار واهرسية وصفية بشاشة طلعي منه العصير بس, اخلطي 1/4 كوباية من الشاي الاخضر مع 2 معلقة كبيرة عصير خيار, ومعلقة كبيرة من جل الصبار, ونقطتين من زيت النعناع وحطي الخليط ده في ازازة ببخاخ ورجيها كويس عشان تخلطي المكونات ورشي منه على الجسم بعد الحمام, وممكن تحتفظي بيه في التلاجة ممكن يقعد معاكي لحد اسبوع.

سبراي الشاي الاخضر والخيار للجسم
سبراي الشاي الاخضر والخيار للجسم

9- حمام الشاي الاخضر والملح:

الحمام ده بيساعد على استرخاء الجسم, غير الفوايد اللي موجودة في مكوناته زي ما قولنا الشاي االخضر غني بالمواد المضادة للاكسدة اللي بتساعد على تجديد وترطيب الجلد وشده, والبرتقان كمان غني بالمواد المضادة للاكسدة وليه فوايد في تجديد البشرة المتعبة والمرهقة, والملح الانجليزي ليه فوايد كتير للبشرة بينضفها من السموم وبيساعد على استرخاء الجهاز العصبي, وبيسكن اوجاع الجسم.

المكونات:

  • – عصير برتقانة.

– كوباية ملح انجليزي.

  • – 2 كيس شاي اخضر او 2 معلقة صغيرة.

الطريقة:

هنخلط عصير البرتقان مع الملح ولو حسيتي الخليط سايل ممكن تزودي من الملح وبعدين ضيفي عليهم الشاي وقلبي المكونات مع بعض كويس واحتفظي بيها في اي برطمان وحطيه في التلاجة لحد ما تيجي تستخدميه, ولما تيجي تاخدي الحمام املي البانيو مية سخنة وحطي فيها كام معلقة من الخليط وانقعي جسمك فيه.

حمام الشاي الاخضر والملح
حمام الشاي الاخضر والملح

10- ماسك الشاي الاخضر لتجديد البشرة:

الماسك ده بيساعد على التخلص من خلايا الجلد الميتة وتحسين البشرة وتنعيمها.

المكونات:

  • – معلقة كبيرة شاي اخضر مطحون ناعم.

– مية.

ممكن تستخدمي جل الالوفيرا بدل المية لو بشرتك جافة وعايزة ترطيب اكتر.

الطريقة:

اخلطي الشاي مع المية او الجل وحطي الكمية واحدة واحدة لحد ما توصلي لقوام معقول, حطي الخليط على البشرة وسيبيه لمدة 20 دقيقة وبعدين اغسليه بمية دافية.

ماسك الشاي الاخضر لتجديد البشرة
ماسك الشاي الاخضر لتجديد البشرة

11- تونر الشاي الاخضر والرمان لمكافحة علامات الشيخوخة:

تونر الشاي الاخضر بيساعد على معادلة مستوى الرقم الهيدروجيني للبشرة وبيعيد توازنها, بيزيل اثار المكياج من البشرة يعني يعتبر مزيل مكياج طبيعي, والجمع ما بين المواد المضادة للاكسدة في الشاي الاخضر والرمان بيدي الجلد فوايد اضافية.

المكونات:

  • – ¼ كوباية شاي اخضر بارد.

– 1/8 كوباية عصير رمان.

  • – 1/8 كوباية مية.

الطريقة:

هنعمل الشاي الاخضر بالطريقة العادية ونسيبه يبرد, وبعدين هنخلط عصير الرمان مع المية ونضيفهم على الشاي الاخضر ونمزجهم كويس مع بعض ونحتفظ بالخليط في اي برطمان لحد ما نيجي نستخدمه, هنجيب قطنة وناخد من الخليط نمسح بيه البشرة والرقبة وممكن تستخدميه اكتر من مره في اليوم ممكن مرة الصبح ومرة بالليل, ونحتفظ بيه في التلاجة ممكن يقعد لحد اسبوعين.

تونر الشاي الاخضر والرمان لمكافحة علامات الشيخوخة
تونر الشاي الاخضر والرمان لمكافحة علامات الشيخوخة

12- مكعبات الشاي الاخضر للهالات السودا والانتفاخات:

الشاي الاخضر من الحاجات اللي اثبتت فعاليتها جدا في علاج الهالات السودا والانتفاخات تحت العين وتقليل التورم والسوائل الزيادة اللي حوالين العين وده بسبب انه غني جدا بالمواد المضادة للاكسدة والكافيين المعروفين بفايدتهم للبشرة.

الطريقة:

هنعمل كوباية شاي اخضر بالطريقة العادية جدا وبعدين هنصبها في مكعبات الثلج ونسيبه يتجمد, وبعدين نستخدمه ندلك بيه تحت العين.

مكعبات الشاي الاخضر للهالات السودا والانتفاخات
مكعبات الشاي الاخضر للهالات السودا والانتفاخات

13- مقشر الشاي الاخضر للبشرة:

المقشر ده ممكن نستخدمه للبشرة والجسم بيساعد على تقشيرهم والتخلص من الجلد الميت, وبينعم ويرطب الجلد, بينشط خلايا الجلد وبيحميها من التلف والشيخوخة, بينضف ويغذي البشرة, بيحميها من حب الشباب.

المكونات:

  • – من 2 – 4 كيس شاي اخضر او معلقة كبيرة.

– كوباية سكر ابيض او بني.

  • – ½ كوباية زيت زيتون.

– 2 معلقة كبيرة عسل ابيض.

  • – 10 نقط من زيت اللافندر او اي زيت عطري مفضل “اختياري”.

الطريقة:

هنخلط المكونات كلها مع بعض كويس ونحتفظ بيها في برطمان في مكان بارد وضلمة لحد ما نيجي نستخدمها, هناخد من الخليط معلقة كبيرة وندلك بيها البشرة في حركات دائرية ولو هندلك بيه الجسم ناخد كمية اكبر وندلك لمدة 30 ثانية وبعدين نغسل الجسم بالمية, ممكن نكرره من 2 – 3 مرات في الاسبوع, ولو بشرتك حساسة كفاية مرة او مرتين في الاسبوع.

مقشر الشاي الاخضر للبشرة
مقشر الشاي الاخضر للبشرة

14- ميست الشاي الاخضر للبشرة:

الميست ده بيعزز نمو خلايا الجلد وبيعالج ندبات البشرة, قابض طبيعي للمسام وبالتالي بيحمي البشرة من حب الشباب لانه بيقلل من زيوت البشرة, بيعزز انتاج الكولاجين الطبيعي للبشرة, بيحمي من اضرار اشعة الشمس وبالتالي بيمنع علامات الشيخوخة المبكرة زي الخطوط الرفيعة والتجاعيد, وكمان بيحافظ على رطوبة البشرة طول اليوم .

المكونات:

  • – كيس شاي اخضر.

– معلقة كبيرة زيت الجوجوبا.

  • – معلقة كبيرة جل صبار الالوفيرا.

– معلقة كبيرة مية ورد.

  • – 2 كوباية مية.

الطريقة:

هنغلي كوبايتين المية ونحط فيهم كيس الشاي الاخضر ونسيبه 20 دقيقة في المية وبعدين نطلعه ونسيب الشاي يبرد لحد ما يبقى زي درجة حرارة الغرفة او لحد ما بشرتك تتحمله من غير ما يأذيها وبعدين نضيف له معلقة كبيرة من زيت الجوجوبا ومعلقة من جل الالوفيرا ومعلقة من مية الورد, هنمزج المكونات مع بعض كويس ونحط الخليط في ازازة ببخاخ ونستخدمه على البشرة او تحطيه في ازازة عادية وتدهني بشرتك بقطنة, ممكن تحتفظي بيه في درجة حرارة الغرفة او في التلاجة.

ميست الشاي الاخضر للبشرة
ميست الشاي الاخضر للبشرة

شوفوا كمان وصفات للبشرة من الشاي الاخضر

وصفات للبشرة من الشاى الاخضر
وصفات للبشرة من الشاى الاخضر

مقالات متعلقه

علاج الايورفيدا للبشرة في البيت في 3 خطوات سهلة

علاج الايورفيدا للبشرة في البيت في 3 خطوات سهلة

5 علاجات طبيعية بتستخدمها كارينا كابور لبشرة نضرة وشباب

5 علاجات طبيعية بتستخدمها كارينا كابور لبشرة نضرة وشباب

فتحي بشرتك باستخدام القهوة سريعة التحضير

فتحي بشرتك باستخدام القهوة سريعة التحضير