17 عذر معظمنا سمعهم من ولاد مكنش حبهم حقيقي !

بقلمريهام محمود فيحب visibility5134

ساعات في كتير مننا في علاقة الحب مش بنقدر نفرق ما بين الكذب والصدق من الطرف التاني هل فعلا هو انسان صادق في مشاعره ولا ممكن يكون كذاب؟ هل لما بيقول اي حاجة بتبقى فعلا حقيقة ولا كذب ومجرد سبب وعذر للهروب؟ ده اللي هنشاركه النهاردة مع بعض مع كل بنات حوا هنقولكم 17عذر معظمنا تقريبا سمعهم من ولاد مكنش حبهم حقيقي وكانت بس مجرد حجج للهروب من العلاقة او انه ياخد خطوة جدية في الموضوع.

اعذار للهروب من العلاقة:

1- كنت مشغول جدا الفترة الاخيرة:

من اكتر الحجج اللي ممكن تتقال كمبرر لتجاهلك او عدم السؤال والاهتمام انه يقولك معلش اصلي كنت مشغول اوي الفترة الاخيرة, بس طبعا ده بيكون مجرد عذر للهروب لان مافيش حد مشغول ال24 ساعة اكيد بيكون في وقت لمكالمة دقيقة او حتى رسالة وخصوصا في وجود كل وسايل التواصل المختلفة اللي سهلت علينا كتير وقربت المسافات فانه يقول مكنش عنده وقت او مشغول ده عذر مبقاش ينفع يتصدق اليومين دول.

2- انا مش بفكر في الارتباط دلوقتي:

واحدة من الاعذار اللي ممكن تتقال للهروب انا مش بفكر في الارتباط او الدخول في علاقة حب دلوقتي.

3- انا لسه خارج من علاقة جدية:

لما يقولك انا لسه خارج من علاقة جدية ده معناه ان مش مستعد انه يدخل في علاقة تانية في الوقت الحالي او بيقولك بطريقة غير مباشرة انه مش هيكمل معاكي.

4- انا خايف من الالتزام:

لو قالك انا خايف من الالتزام وتحمل مسئولية الجواز دلوقتي, ده عذر للهروب لان الراجل لما بيقرر يرتبط او ياخد قرار جدي للجواز مافيش حاجة بتمنعه ولا خوف ممكن يسيطر عليه الحب لو حقيقي بيشجع الراجل انه ياخد اي خطوة من غير خوف.

5- انا خايف اجرحك او اتسبب في اذيتك:

انه يسيبك بحجة انه خايف يجرحك او يتسبب في اذيتك باي شكل ده كلام فاضي وعذر للهروب اللي بيحب حد حب حقيقي هيخاف عليه وعلى مشاعره مش هيفكر يجرحه او يأذيه في يوم.

6- انا مش بعرف ابعت رسايل:

لو برر تجاهله ليكي وعدم سؤاله واهتمامه بانه مش بيعرف يبعت رسايل او مش بيحب الرسايل وبيفضل يتصل وطبعا هو مشغول ومعندوش وقت يتصل وبالتالي انتي تلتمسي له الاعذار, ده كله كذب ومجرد مبرر بس عشان يهرب منك وتبطلي تسأليه انت ليه مش بتبعت او بتهتم, اللي عايز يسأل هيسأل ولا عايز يبعت هيبعت مهما كان انشغاله الموضوع بس مجرد اولويات.

7- انا قابلت شخص تاني:

يجي يقولك مثلا انا قابلت او اتشديت لحد تاني طيب امتى ده حصل وانتوا المفروض على علاقة مع بعض ومرتبطين ؟ ده بقى عذر اقبح من ذنب يعني مش بس بيهرب لا كمان بيعترف بالخيانة.

8- انا مركز في مستقبلي دلوقتي:

طبعا من الاعذار اللي محدش فينا مسمعهاش انه يقولك انا مركز في مستقبلي دلوقتي وفي حياتي العملية ومش بفكر في الارتباط, لما يقولك كده اعرفي انه مجرد عذر للهروب لان اللي بيحب حب حقيقي بيبقى عايز ينجح ويكمل حياتة مع الانسانة اللي بيحبها ومش هيشوف انها ممكن تعطله عن مستقبله بالعكس هيشوفها انها هتبقى داعم ليه وتشجعه اكتر على النجاح.

9- مش بحب تقييد الحرية:

لما يقولك انا مش بحب تقييد الحرية ويبقى شايف ان الجواز قيد بالنسبة له, بردو ده مجرد عذر للهروب لانه اللي بيحب حب حقيقي مش هيشوف شريكة حياته قيد بالعكس هيبقى عايز يقضي الوقت معاها في تأسيس حياة مستقرة وبيت واولاد.

اعذار للهروب من العلاقة
اعذار للهروب من العلاقة

10- انا مش مستعد للجواز دلوقتي:

زي بالظبط عذر انا مش بفكر في الارتباط هيقولك انا مش بفكر في الجواز دلوقتي لاني مش مستعد وقدامي التزامات كتير ومش مستعد ازود مسئولياتي, لكن اللي بيكون حبه حقيقي مستحيل يتخلى عن حبه مهما كانت الاسباب لكن بيتمسك بيه وبيتعب ويكافح عشانه.

11- انا مش عايز اتسرع دلوقتي:

لو مرتبطة بيه بقالك فترة ومع ذلك بيقولك مش عايز اتسرع ده يبقى مجرد عذر للهروب لانه اللي بيحب حد بجد هيبقى عايز يبقى معاه في اسرع وقت وهيبقى بيستنى اليوم ده بفارغ الصبر.

12- انا شايفك كتير عليه:

من الاعذار بقى اللي بتتقال كتير انتي تستاهلي حد احسن مني او انا شايفك كتيرعليه طبعا ده عايز يهرب منك مش اكتر.

13- معنديش وقت لاي علاقة دلوقتي:

حجة معنديش وقت لعلاقة جدية او مش مستعد للارتباط في الوقت الحالي دي بتتكرر باكتر من طريقة وباكتر من اسلوب وكلها بتبقى اعذار للهروب.

14- مش انا الراجل المناسب ليكي:

لما يقولك مش انا الراجل المناسب ليكي او انا شخص طباعه صعبة ومش اي حد يقدر يتأقلم معايا وانا مش مناسب ليكي ومش هنتفق مع بعض.

15- عندي التزامات لاسرتي في الفترة دي:

طبعا العذر ده ممكن يكون صح انه يكون مسئول وعنده التزامات اتجاه اسرته بس لازم تتأكدي ان الكلام ده صح ولا لا وساعتها يبقى ده عذر كبير لتأجيل الارتباط ويبقى ليكي حرية الاختيار انك تستنيه او تنفصلي عنه,  لكن ممكن بردوا يكون مجرد عذر للهروب منك عشان كده لازم تكوني عارفة التفاصيل ومتأكدة انه مش بيكدب في النقطة دي.

16- انا عايز ابقى سينجل الفترة دي:

طبعا ده كده بيقولك بكل صراحة انا مش هرتبط بيكي وهو بيبقي عايز يقول ولا دلوقتي ولا بعدين بس هو بيقولك عايز ابقى سينجل دلوقتي وبالتالي طبيعي انك هتبعدي ومش هتفكري ترجعي تاني.

17- انا عايز استمتع بشبابي وحريتي:

وهل مينفعش نستمتع بحياتنا وشبابنا مع بعض ؟! الجواز مش مانع للاستمتاع بالشباب والحياة اكيد اللي بيحب حد بجد هيبقى عايز يستمتع بشبابه وحياته معاه وينبسطوا ويعيشوا حياتهم مع بعض.

بننصح كل البنات انهم ميتسرعوش في علاقاتهم ويشوفوا هل مر عليهم الكلام ده مع الشخص اللي مرتبطين بيه ولا لا ويتأكدوا كويس جدا من صدق مشاعر الطرف التاني وانه مش بيكدب عشان يهرب.

شوفي كمان 11 علامة تقولك انك مش هتكملي في العلاقة دي !

علامات تنبهك لانهاء العلاقة
علامات تنبهك لانهاء العلاقة