10 حيل هتخليكي تصحي من النوم بشعر مثالي

بقلمريهام محمود فيشعر visibility6204

معظمنا تقريبا بنصحى الصبح مستعجلين سواء رايحين الجامعة او الشغل وبنبقى عايزين ننجز ونجهز بسرعة عشان نلحق مواعيدنا ومن الحاجات اللي ممكن تاخد وقت مننا الصبح هي شعرنا بس في حاجات ممكن نعملها عشان نصحى الصبح نلاقي شعرنا شكله حلو ومش محتاج مننا مجهود ولا وقت وده اللي هنشوفه النهاردة مع بعض هنتعرف على نصايح وحيل هتخليكي تصحي الصبح بشعر مثالي.

– بس قبل ما نعرف الحيل دي لازم نعرف بعض القواعد الاساسية:

1- اول حاجة متناميش وانتي شعرك مبلول لان ده هيعمل كسره في الشعر وهيصعب عليكي التعامل معاه الصبح.

2- لو بتستخدمي السيشوار عشان تنشفي شعرك بعد ما تغسليه نشفيه بالهوا البارد عشان تتجنبي هيشان الشعر, ومتنشفيهوش خالص بالسيشوار يعني خليه رطب شوية عشان تتجنبي جفاف الشعر.

3- سرحي شعرك دايما قبل ما تروحي للسرير يعني متقوليش مش مشكلة انا رايحة انام هسرحه ليه ؟ لكن لا سرحيه قبل ما تنامي عشان الخطوة دي هتسهل عليكي الموضوع جدا الصبح وانتي بتتعاملي معاه.

4- قصي شعرك القصة المناسبة لنوع شعرك عشان ده هيسهل عليكي تتحكمي فيه اكتر, واعتني بيه بشكل يومي بالمنتجات الخاصة بالشعر المناسبة لنوع شعرك.

حيل لشعر مثالي
حيل لشعر مثالي

– 10 حيل لشعر مثالي:

1- ضفري شعرك قبل ما تنامي:

تضفير الشعر من الحاجات الفعالة اللي بتحافظ على شعرك وانتي نايمة وبتمنع هيشانة وكمان بتمنع احتكاك الشعر بالفرش او الغطا بتاع السرير اللي ممكن يضره, وهتمنع تشابك الشعر, بس المهم لما تضفري شعرك يكون ناشف خالص او مبلول حاجة بسيطة يعني يادوب رطب.

ولو انتي شعرك من النوع المفرود والناعم اعملي الضفيرة العادية, اما لو شعرك كيرلي ممكن تعملي الضفاير الرفيعة, وكمان خلي الضفيرة سايبة مش محبوكة اوي او تضيقيها اوي.

ضفري شعرك قبل ما تنامي
ضفري شعرك قبل ما تنامي

2- حطي له زيت جوز هند:

ممكن قبل ما تنامي تاخدي كام نقطة من زيت جوز الهند على ايدك وتدهني بيهم اطراف الشعر بس من غير الجذور ده هيحمي الشعر من الاحتكاك بالفرش وكمان هيخلي شعرك بيلمع.

حطي له زيت جوز هند
حطي له زيت جوز هند

3- نامي على مخدة حرير او ساتان:

النوم على المخدات الحرير او الساتان بيقلل من احتكاك الشعر اللي ممكن يسبب تكسر وتقصف وتساقط الشعر, الحرير والساتان ليهم مفعول السحر على الشعر حتى مع الشعر المجعد اوي, جربوا تناموا عليهم وتغيروا المخدات القطن ومش هتندموا.

نامي على مخدة حرير او ساتان
نامي على مخدة حرير او ساتان

4- حطي له صبار الالوفيرا قبل ما تنامي:

اخلطي كمية من صبار الالوفيرا مع شوية مية معدنية وحطيهم في ازازة ببخاخ ورشي شعرك بالخليط ده قبل ما تنامي, الالوفيرا علاج فعال جدا لترطيب الشعر وخصوصا الاطراف,  وبيحمي الشعر من الاحتكاك.

حطي له صبار الالوفيرا قبل ما تنامي
حطي له صبار الالوفيرا قبل ما تنامي

5- حطي له بادي لوشن:

البادي لوشن الخاص بالجسم من الحاجات المفيدة جدا والمغذية للشعر اثناء النوم, خدي كمية بسيطة من اللوشن على ايدك ومرريها على شعرك وركزي على الاطراف وبعدين سرحي شعرك بالمشط.

حطي له بادي لوشن
حطي له بادي لوشن

6- اعملي شعرك كحكة:

من التسريحات اللي بتحافظ اوي على الشعر اثناء النوم وخصوصا للشعر الطويل هي تسريحة الكحكة, اعملي شعرك ديل حصان عالي وبعدين لفيه كحكة.

اعملي شعرك كحكة
اعملي شعرك كحكة

7- استخدمي منتجات العناية بالشعر الخاصة بالاطفال:

منتجات العناية بالشعر الخاصة بالاطفال زي الشامبو والزيت بتبقى اخف على الشعر من المنتجات اللي احنا بنستخدمها ممكن قبل ما تنامي تغسلي شعرك بشامبو الاطفال وبعدها ادهنيه بزيت الشعر الخاص بالاطفال وركزي على الاطراف, هتصحي الصبح تلاقي شعرك ناعم وبيلمع وكمان ريحته حلوة.

استخدمي منتجات العناية بالشعر الخاصة بالاطفال
استخدمي منتجات العناية بالشعر الخاصة بالاطفال

8- استخدمي بودرة التلك عشان تعملي ويفي طبيعي:

لو عايزة تعملي Beachy Waves او ويفي طبيعي رشي شوية من بودرة الاطفال “بودرة التلك” على جذور الشعر عشان تتخلصي من اي زيوت على الشعر وبعدين سرحي شعرك بالمشط وضفريه, هتصحي الصبح تلاقي شعرك معمول ويفي طبيعي.

استخدمي بودرة التلك عشان تعملي ويفي طبيعي
استخدمي بودرة التلك عشان تعملي ويفي طبيعي

9- استخدمي الشراب النايلون على شعرك:

الحيلة دي من الحيل الهايلة جدا اللي هتخليكي تصحي الصبح بشعر ناعم وسهل التعامل معاه, اول حاجة سرحي شعرك بالمشط واعمليه كحكة وبعدين البسي الشراب النايلون على شعرك وثبتيه بالبنس لو محتاج, ده هيحافظ على شعرك طول الليل وكمان هيمنع الهيشان والاحتكاك.

استخدمي الشراب النايلون على شعرك
استخدمي الشراب النايلون على شعرك

10- استخدمي اكسسوارات الشعر البلاستيك:

الاكسسوارات البلاستيك تعتبر افضل اختيار للتحكم في الشعر وتثبيته واحنا نايمين وخصوصا للجزء بتاع القوصة, وابعدي خالص عن الاكسسوارات المعدنية لانها بتكسر الشعر بسهولة وبتضره.

استخدمي اكسسوارات الشعر البلاستيك
استخدمي اكسسوارات الشعر البلاستيك

شوفي كمان 12 حيلة ونصيحة عشان تتجنبي الشعر الهايش

حيل ونصايح عشان تتجنبي الشعر الهايش
حيل ونصايح عشان تتجنبي الشعر الهايش