7 نصايح هيساعدوكي تكسبي حب حماتك
فى اول كل ارتباط بين اى ولد و بنت واول لما الموضوع يبدأ يدخل فى الجد و تبدأ رحلة الخطوبة و الجواز، اول حاجه بتقلق منها اى بنت و تخوفها هى حماتها … و بتبقى مش عارفه هتتعامل معاها ازاى و ياترى حماتها هتحبها ولا هتغلبها و تبدأ تعتبرها بتنافسها فى حب ابنها، واوقات كتير البنات ممكن تتحط فى مواقف محرجه مع حماتها و تزعل او ان حماتها تزعل منها على حاجات بسيطة ، علشان كده قررنا نساعدك، فى المقال ده بنات حوا هتقولك على 7نصايح مفيدة تقدرى بيها تكسبي حب حماتك ..
1-قوى العلاقة بين خطيبك/جوزك و بين حماتك :
الولاد دايما بيحبوا يجسوا انهم مستقلين و رايهم من دماغهم، علشان كده اوقات كتير نلاقيهم بيبعدوا تحديدا عن والدتهم و مبيسمعوش كلامها، دورك انتى فى انك تحاولى تحسنى العلاقة بين جوزك او خطيبك و بين مامته، فكريه يتصل بيها ، يجيبلها هدية فى عيد ميلاده ، يروح يزورها دايما و يبعتلها رسايل يقولها اخر اخباره ايه. و لما حماتك تعرف انك انتى اللى بتشجعيه يهتم بيها هتقدر ده و هتتبسط بيه جدا و بالطريقة دى هى هتحس انك مش بتخطفى ابنها منها و هتبدأ تتبنى بينكم علاقة قوية وهتكون هى مرتاحه فيها من ناحيتك، و بكدهتكونى قدرتى تكسبى حب حماتك .
2- حسسيها انك بتحبى ابنها و مش هتسيبيه :
حسسى حماتك دايما انه علافتك بابنها مش مؤقته وانك بتتسلى، و دايما اتصرفى بالطريقة اللى تثبتلها انك بتحبى ابنها و هتفضلى جنبه و مش هتسيبيهن وهتساعديه لو احتاج مساعدتك فى اى وقت. بالطريقة دى هى هتحس انك بتحبى ابنها و مش بتستغليه و انها تقدر تعتمد عليكى ، فهتبقى متطمنه من ناحيتك .
3-احترميها دايما :
الاساس فى اى تعاملات بينك و بين اى حد لازم يكون الاحترام، علشان كده حماتك لازم تحترميها و تعامليها زى والدتك بالضبط، لانه هى كمان ربت خطيبك او جوزك و تعبت عليه زى ما مامتك ربتك و تعبت عليكى، علشان كده لازم تقدريها و تحترميها دايما .
4-خلى خناقاتك معاه بعيد عنها :
لو انتى و جوزك او خطيبك من النوع اللى بتتخانقوا كتير مع بعض يبقى مهم تخلى خناقاتكم دايما بينكم و بين بعض و بعيد عن حماتك، لانه لما هتتخانقوا قدامها هى هتفكر انك مش مناسبة لابنها او انك مش مريحاه و ممكن تكون فكرة غلط عنك. مهم انها لما تشوفكم تحس انكوا سعداء و مبسوطين مع بعض لانه مفيش ام فى الدنيا بتحب تشوف ابنها مش مبسوط او متوتر .
5- كلميها و كأنها صاحبتك، مش حماتك :
اتكلمى مع حماتك و كأنها صاحبتك، مش حماتك . خليها تحكيلك عن بداية جوازها و ازاى عرفت حماكى و طفوبة جوزك او خطيبك، كل ما تتكلموا مع بعض هتقربوا من بعض و هتقدرى تعرفيها اكتر و تعرفى احسن طريقة تتعاملى معاها بيها ، خليها تحس انها جزء من حياتك مش زيها زى اى شخص غريب بتتكلمى معاه عن موضوعات عامة زى الجو و المواصلات! افتكرى دايما ان هى كمان كانت فى سنك زمان و انه ممكن يبقى فى حاجات مشتركة تتكلموا فيها .
6- متخافيش انك تتصرفى على طبيعتك :
ممكن تفكرى انه حماتك عايزة تشوف فيكى صفات معينة و انك تتصرفى بطريقة معينة فتضطرى تمثلى قدامها، بس ده غلط جدا، المهم انك تبقى دايما على طبيعتك و تتصرفى على الاساس ده ، خليكى نفسك و اتصرفى بتلقائية و من غير تصنع علان تبقى مرتاحة، و متشيليش هم تتكلمى فى ايه او تتكلمى ازاى ، لما تتصرفى على طبيعتك الكلام هيجيب بعضه و هتلاقى نفسك مرتاحة . خليها تشوفك زى ما انتى من غير اى زيادات او تمثيل.
7-حاولى تكسبى حبها :
و دى اهم خطوة، ازاى تكسبى حب حماتك !
لو عايزة حماتك تحبك ، يبقى اتعبى علشان تحققى ده و حاولى تقربى منها و اثبتى ليها انك البنت المناسبة لابنها وامه مش هيلاقى احسن منك ، واى جهد هتبذليه علشان تحسنى من علاقتك معاها او مع ابنها هيبان و هيفرق جدا فى علاقتكم ببعض و حماتك كمان هتقدر ده جدا ، العلاقات دايما بتكون صعبه علشان كده حاولى تخلى الامور دايما بسيطة و متديش اى حاجه اكبر من حجمها :)