19 طريقة مبتكرة و غير مكلفة علشان تخلى بيتك مريح اكتر
كل ما الجو يبقى برد بره البيت، بنميل لاننا نقعد فى البيت وقت اطول، و علشان كده بتحتاجى دايما يكون بيتك مريح اكتر و بتحبي تجددى فيه و تغيرى فى الديكورات و الالوان، ولان التغيير ده ممكن يبقى مكلف و مجهد جدا، علشان كده فى المقال ده هنقولك على افكار كتيرة و مختلفة تقدرى تجددي بيها بيتك و تخليه مريح اكتر وبمجهود بسيط ..
19 طريقة مبتكرة و غير مكلفة علشان تخلى بيتك مريح اكتر
1-استخدمى الابواب القديمة مساحة للتخزين :
واحده من الافكار المبتكرة جدا و المختلفة هى انك تستخدمى الابواب القديمة كمساحة للتخزين فى بيتك، ممكن تستخدمى اى باب قديم و تغيرى لونه و تحطيه فى اى زاوية عندك فى البيت تكون فاضية و تستخدميه كمساحه تحطى عليها كتب او تحف تكملى بيها ديكور البيت.
2- ورق حائط بصفحة من كتابك المفضل :
ممكن كمان لو انتى لسه بتجهزى شقتك او بتجددى الديكورات فيها تعملى ديزاين جديد من ورق الحائط، اعملى ورق حائط بصفحة من كتابك المفضل !
3- مشاية بالوان مبهجة :
متقلليش من قدرة الالوان المبهجة على انها تخلى يومك حلو و تغير من المود بتاعك، اعملى مشاية صغيرة من بقايا القماش اللى عندك او اشترى مشاية بألوان مبهجة علشان تكملى بيها الديكور الداخلى لاى اوضة عندك فى البيت.
4- لمسة سحرية للزرع :
علب الزرع العادية شكلها بقى تقليدى و ممل! غيرى شكل الزرع بتاعك و خلى شكله حلو بأنك تجددى قصارى الزرع بتاعتك و تخلى شكلها مختلف بانك تلونيها او تزينيها بخيوط الوانها مختلفة .
5- صوانى باشكال جديدة للاكل :
صوانى الاكل بتعتبر من اقل الحاجات اللى بنهتم بيها فى البيت، لكن انتى ممكن تستخدمى صوانى الاكل فى انها تخلى بيتك مريح اكتر و يبقى شكلها مبهج للعين، حاولى تشترى صوانى اكل شكلها مختلف او بتصاميم جديدة و حلوة.
6- بطانية علشان لما الجو يسقع :
مفيش احلى من بطانية معمولة بايدك فى البيت تدفى بيها لما الجو يسقع، و لو مبتعرفيش تعمليها بايدك اشترى بطانية صغيرة بلون هادى تدفيكى لما الجو يبقى برد.
7- شكل جديد للحيطة اللى عند المكتب :
المساحة فوق مكتبك ممكن تعملى بيها حاجات كتيرة و تنفذى عليها افكار مختلفة، علشان كده فكرى ازاى تغير شكلها و تخليها اضافة لديكور بيتك، جربى تستخدمى الصور و الشماعات و الالوان المختلفة علشان تستغلى المساحة دى.
8- مخدات بألوان الباستيل :
مخدات زى دى هتدى حياة للمكان اللى محطوطة فيه بألوانها المختلفة، و الحلو فى الموضوع انك مش مضطرة تشترى اكياس جديدة للمخدات دى، كل اللى عليكى تعمليه تستخدمى صبغات قماش بألوان مختلفة و تسيبى نفسك تلونى .
9- مكاتب موفرة للمساحات :
حتى اصغر مساحة فى بيتك ممكن تبقى مكتب و توفرى بيه مساحة و يبقى مكان مناسب جدا تخلصى فيه شغلك، جربى تستخدمى مكاتب بحجم صغير علشان توفرى بيها مساحة.
10- اعملى ديكور للرف بالمساطر :
حتى المسطرة ممكن تستخدميها علشان تخلى بيتك مريح اكتر ، جربى تزينى اى رف او شماعه عندك فى البيت بالمساطر !
11- ساعه مختلفة :
ساعه بشكل مختلف هتخلى شكل اى اوضة اشيك و احلى، المهم تختارى ديزاين يناسب الديكور.
12- رفوف هندسية :
جربى تستبدلى الشكل المعتاد للرفوف بأنك تعملى رفوف بأشكال و تصاميم هندسية، الاشكال و التصميمات دى مبتنتهيش و حلوة جدا و ممكن كمان تغيرى فى الالوان .
13- باسكت بشكل جديد :
بتكلفة قليلة جدا ممكن تغيرى شكل اى باسكت عندك فى البيت بانك تستخدمى خيوط ملونة و تغيرى فى شكل الباسكت، الطريقة دى بتثبت انه الشكل الحلو مش لازم يبقى مكلف .
14- ستاير للسرير :
انك تضيفى ستاير للسرير بتاعك مش حاجه صعبة و هتحلى اوضة نومك و هتخليها رومانسية اكتر! جربى تضيفى ستاير بألوان مختلفة لسريرك و شوفى الفرق .
15- طقم شاى تبهرى بيه ضيوفك :
حتى المانيكير القديم ممكن نستخدمه فى تغيير ديكور البيت، استخدمى المانيكير بتاعك فى انك تضيفى الوان و اشكال مختلفة على طقم الشاي الابيض بتاعك و ابهرى بيه ضيوفك .
16- شماعات من الطبيعة لهدومك :
ممكن تستخدمى اجزاء من فروع الاشجار المتكسرة فى انك تعملى منها شماعه من الطبيعه لهدومك، هيبقى شكلها مختلف جدا و كمان مريح لعينيكى.
17- ستاير بشكل جديد :
جه الوقت انك تغيرى من الشكل و الالوان التقليدية للستاير اللى احنا متعودين عليها، جربى تعملى ستاير بتصاميم بسيطة لكن كمان بشكل مختلف و جديد و الوان دافية، الستاير من الحاجات الاساسية فى اى ديكور و هتساعدك تخلى بيتك مريح اكتر .
18- اباجورة باضاءة دهبية :
سبراى دهبى هيساعدك تحولى اضاءة اى اباجورة عندك فى البيت تماما، استخدمى السبراى الدهبى فى انك تلونى بيه الاباجورة من جوه و تعملى اضاءة بلون دهبى مختلف .
19- background بفكرة جديدة :
ممكن تعلقى صور كتيرة جدا على الحيطة، لكن الفكرة كلها فى ترتيب الصور دى. اعملى background بفكرة جديدة بأنك ترتبى صور ذكرياتك و اللى بتحبيهم بشكل مختلف و جديد.
background بفكرة جديدة