ازاي الاكل اكتر ممكن يخلينا في صحة احسن ونتحكم في وزننا !

بقلمريهام محمود فيتخسيس الوزن visibility2134

كتير مننا الرجيم او انقاص الوزن بالنسبة لنا هو حرمان من الاكل ومن الحلويات وكتير من الاكلات اللي بنحبها وبنستمتع باكلها وبنحاول اننا ناكل اكتر اكلات صحية, لكن موضوعنا النهاردة هيغير الفكرة دي تماما عن الرجيم, لانه زي ما بيقول ميشيل ادامز ارينت وهو واحد من اهم مستشارين التغذية والرياضة والنظام الغذائي, ان الرجيم مش بيعتمد بس اننا نقلل في الاكل او نحرم نفسنا من اكلات معينة لكن الموضوع بيعتمد على توزيع الاكلات دي بين الوجبات على مدار اليوم كله, وده اللي هنعرفه النهاردة مع بعض ازاي نفقد وزننا وفي نفس الوقت مش هنحرم نفسنا من الاكلات اللي بنحبها زي الايس كريم والشوكولاتة وكتير من الاكلات اللي بنستمتع باكلها.

تخسيس الوزن بعدد الوجبات:

– المفروض ناكل كام مرة في اليوم ؟

زي ما احنا عارفين الانظمة الغذائية لانقاص الوزن كتير وكل نظام بيختلف عن التاني في نظام بيعتمد على اكل اكلات صحية ومنع او تجنب اكلات معينة, ونظام تاني بيقوم على تجنب الاكلات المقلية والحلويات, وانظمة تانية بتعتمد على اكل البروتينات بس او الفواكة والخضروات بس, وكل الانظمة دي تعتبر حرمان غذائي وحرمان الجسم من الفيتامينات اللي لزماه وده اكيد مضر للجسم, عشان كده المهم في الرجيم هو مش بناكل ايه او كمية قد ايه لكن بناكل امتى.

وتركيبة الجسم بتمشي بشكل اننا لما كل مرة بناكل وجبة الجسم بياخد منها كمية معينة من الطاقة ولو محرقناش الطاقة دي في الوقت المظبوط هتتحول لدهون تتراكم في الجسم, ولكن لو اكلنا كمية اكل صغيرة هنقدر نحرقها بسرعة والجسم مش هيخزن دهون وبالتالي نقدر ناكل اللي احنا عايزينه لكن بكميات معقولة ده مش هيسبب زيادة في الوزن.

عشان كده الافضل اننا ناكل 6 وجبات في اليوم بدل 3 وجبات متوزعين على اليوم:

  • الفطار : الساعة 8 الصبح

وجبة خفيفة “سناك”: الساعة 10:30 الصبح.

  • الغدا: الساعة 1 مساء.

وجبة خفيفة تانية: الساعة 4:30 مساء.

  • العشا: الساعة 6 مساء.

وجبة خفيفة تالتة: الساعة 9:30 مساء.

وبالنظام ده لما ناكل كل كام ساعة كميات صغيرة الجسم هيستفاد اكتر من الاكل وهيكون مستعد اكتر لانقاص الوزن, لكن مع ده كمان نوعية الاكل مهمة يعني مع اكل كميات اكل صغيرة نركز على اكل الفواكه والخضروات.

تخسيس الوزن بعدد الوجبات
تخسيس الوزن بعدد الوجبات

 – وعشان تتحكمي اكتر في كل العناصر اللي بتدخل جسمنا ممكن نشوف الجدول ده اللي هيحددلنا كميات الكربوهيدرات والدهون والبروتينات والسعرات الحرارية اللي لزمانا خلال اليوم عشان نحافظ على وزننا وصحتنا.

  • السعرات الحرارية : بالنسبة للبنت 25 سعره حرارية لكل كيلو “يعني لو انتي وزنك مثلا 70 كيلو يبقى المفروض جسمك يحصل يوميا على 1750 سعرة حرارية”, وبالنسبة للراجل 28 سعرة حرارية لكل كيلو.

البروتينات : بالنسبة للبنت 2.2 جرام لكل كيلو, وللراجل نفس النسبة.

  • الكربوهيدرات: بالنسبة للبنت 2.5 جرام لكل كيلو, وللراجل 3 جرام.

الدهون : بالنسبة للبنت 0.7 جرام لكل كيلو, 0.8 جرام لكل كيلو.

وعدد السعرات الحرارية دي اللي هي 25 للبنت و 28 للراجل دي تعتبر الحد الادني للسعرات الحرارية اللي ممكن يستخدمها الجسم لعمل اي حاجة خلال اليوم, وفي نفس الوقت دي عدد السعرات اللي هتتحرق خلال اليوم حتى لو معملتيش اي نشاط جسدي عشان تحرقيها لانها دي تعتبر عدد السعرات اللي هتديكي طاقة عشان تمارسي نشاطك العادي خلال اليوم مش محتاجة نشاط زيادة عشان تحرقيها لان هي على اخر اليوم هتكون كلها اتحرقت, وبالتالي مافيش دهون هتتراكم وهتحافظي على وزنك وصحتك.

ودلوقتي نبقى عرفنا الموضوع ماشي ازاي كله بيعتمد على عدد السعرات الحرارية اللي بتدخل جسمنا خلال اليوم وازاي ننظمها صح واننا ناكل كل الاكل ومنحرمش نفسنا وبالتالي مش هيكون نفسك في حاجة او ضعيفة قدام حاجة لكن زي ما قولنا هناكلها بكميات صغيرة على 6 وجبات عشان تتحرق بسرعة ومناكلش 3 وجبات كبار لان كل وجبة منهم هتاخد وقت كبير على ما تتحرق وده ممكن يسبب تراكم الدهون وزيادة في الوزن, عشان كده مهم اننا نعرف كل اكلة فيها كام سعر حراري عشان نقدر نتحكم في الكميات اللي بتدخل جسمنا من كل حاجة.

شوفي كمان ايه هو عدد السعرات الحرارية اللي المفروض تكتسبيها كل يوم ؟

اعرفى معانا عدد السعرات الحرارية اللى المفروض تكتسبيها كل يوم
اعرفى معانا عدد السعرات الحرارية اللى المفروض تكتسبيها كل يوم