ازاي تلبسي البلوفر على الجيبة الماكسي بطريقة شيك وانيقة
الجيبة الماكسي كانت من القطع المميزة في الصيف لانها مريحة جدا في اللبس وفي نفس الوقت شيك, لكن في بنات كتير بيترددوا انهم يلبسوها في الشتا لانهم مش بيعرفوا ازاي يلبسوا البلوفرات او القطع الشتوي بشكل عام على الجيبات الماكسي عشان تطلع بلوك حلو, لكن الجيبات الماكسي ممكن تتلبس باكتر من طريقة وستايل في الشتا وتطلع شيك جدا
الجيبة الماكسي ممكن نلبس عليها البلوفر باكتر من لوك وننوع في شكلها, ممكن نلبس عليها البلوفر الخفيف شوية في الايام اللي لسه مش برد اوي زي وقت الخريف, ولما الجو يبرد ممكن نلبس عليها البلوفر السميك باكتر من ستايل ممكن نلبس الموديل القصير او ال Cropped او الموديل الطويل شوية ونخليه بره الجيبة لو انتي مليانة من تحت وعايزة تداري الجزء ده, وممكن نلبس على البلوفر حزام عشان نحدد منطقة الوسط, او ندخله جوه الجيبة.
ممكن نلبس ايه تاني على الجيبة الماكسي غير البلوفر المقفول؟ ممكن نلبس عليها كارديجان الطويل او القصير وممكن تنسقي تحته قميص جينز او عادي, او تيشيرت, او نلبس عليها Over-sized poncho وعليه حزام, او بليزر وننسق تحته تيشرت او قميص, او تلبسي عليها قميص جينز وتسيبيه مفتوح وتلبسي تحته اندرشيرت .
كمان من الحاجات اللي بتطلع بلوك حلو اوي على الجيبة هو ستايل الفيست الفرو طالع موضة جدا الموسم ده ممكن تلبسيه على الجيبة وتنسقي تحته قميص, او تلبسي تيشريت وعليه جاكيت جلد.
طبعا عشان نكمل اللوك بتاعنا مننساش الاكسسوارات, ومن احلى الاضافات في الشتا اللي بتكمل اللوك بتاعنا هو السكارف نسقي سكارف مناسب مع لبسك.
تعالوا نشوف مع بعض ستايلات مختلفة للبس البلوفر على الجيبة الماكسي:
شوفي كمان موضة المحجبات بألوان دافية لخريف وشتاء 2017
