11 علامة تقولك انك مش هتكملي في العلاقة دي !

علاقة الحب بين اي اتنين طبيعي انها تعدي بصعوبات ومشاكل لكن بيبقى في مشاكل ومواقف ممكن تكون عادية والعلاقة ممكن تكمل معاها ومواقف وعلامات تانية مينفعش اننا نكمل معاها, وساعات في كتير مننا رغم المشاكل بيحاولوا يقنعوا نفسهم بالاستمرار في العلاقة وبيفكروا انهم ممكن يقدروا يغيروا الطرف التاني بدل ما ينهوا العلاقة خالص, لكن في مؤشرات وحاجات كتير ممكن تقولنا اننا في الوقت ده لازم ننسحب وننهي العلاقة دي واننا مينفعش نكمل حياتنا مع الشخص ده, والنهاردة هنعرف مع بعض ايه هي العلامات اللي ممكن تقولتا ان العلاقة مش هتكمل.

علامات تنبهك لانهاء العلاقة:

1- لو مافيش انجذاب عقلي:

لو انتي حاسه ناحية الطرف التاني ان مافيش انجذاب عقلي ناحيتة يعني كلامه مش بيشدك ولا طريقة تفكيره بتجذبك ولو اتكلمتي معاه في اي موضوع بتحسي انك عايزة تنهي المحادثة بينكم, في الحالة دي الافضل انك تبعدي ومتكملش مع الشخص ده:

2- لو انتي بس اللي بتسألي وتهتمي:

اكيد في اي علاقة لازم الاهتمام يكون من الطرفين يعني مينفعش طرف بس يهتم والتاني لا, لو لقيتي نفسك انتي اللي دايما بتبدأي بالسؤال او بتتصلي او بتبعتي مسج وهو لا, في الحالة دي لازم تقرري انك تبعدي, لانه لازم الطرف التاني يبين انه بيبذل مجهود وان فيه اهتمام من ناحيته, العلاقة اللي فيها اهمال ولا مبالاه وطرف واحد بس اللي بيبذل مجهود عشان تستمر مينفعش تكمل.

3- لو اصحابك او المقربين منك مش بيحبوه:

اكيد راي الاصحاب مهم بس اكيد طبعا الاصدقاء المقربين اللي احنا بنثق فيهم وفي رايهم وبتحسي معاهم انهم بيحبوكي وفعلا يهمهم مصلحتك, لو رايهم فيه سلبي لازم تاخدي رايهم في الاعتبار وتحاولي تشوفي الصورة من بره اكتر زي ما هما شايفينها لان دايما الحب بيخلينا نتغاضى عن عيوب الشخص لكن اللي حوالينا بيكونوا شايفينها اكتر مننا, عشان كده لو لقيتي انه اصحابك بدأوا يبعدوا عنك بسببه يبقى لازم تعيدي حساباتك في العلاقة دي.

4- لو الشخص اللي معاكي مش بيشجعك:

دايما الشخص اللي بيحب بجد بيتمنى النجاح لشريكته وبيشجعها انها تستمر وتتقدم وتنجح اكتر, لو لقيتي مافيش اي تشجيع من الشخص اللي معاكي باي شكل ولا بالكلام ولا بالفعل, يبقى لازم تعيدي نظر في الارتباط بالشخص ده.

5- مش بيعمل حاجة مختلفة او مثيرة للاهتمام:

كل البنات تقريبا بيحبوا اللي يفاجئهم بحاجات جديدة ويبهرهم بده يعني ميبقاش الشخص تقليدي او كل مره تروحي معاه نفس الاماكن, لكن في وقت بنحتاج اننا نكتشف ونعمل حاجات جديدة ولازم هو ياخد المبادرة انه يعمل ده من غير طلب, يعني مترتبطيش بالشخص التقليدي اللي الحياة معاه هتبقى مملة وروتينيه اوي التغيير مطلوب حتى لو على فترات لكن بيفرق جدا في نجاح اي علاقة.

6- لو مش بتقدري تحكي له كل حاجة:

دايما في اي علاقة بين اتنين كل طرف المفروض يكون كتاب مفتوح مع الطرف التاني ويبقى مرتاح لما يحكي معاه اي حاجة لكن لو حسيتي عكس ده وانك مش بتقدري تحكي له كل حاجة او لما بتحكي بياخد كلامك بشكل شخصي اوي او على نفسه يبقى لازم تفكري كويس قبل ما تستمري في العلاقة دي.

7- لو مش شيفاه افضل صديق ليكي:

لو رغم ارتباطكم مش معتبراه افضل صديق ليكي او في اي حاجة مش بيكون هو اول شخص تلجأي له يبقى اكيد انتي مع الشخص الغلط لان الصداقة بين الطرفين مهمة زي الحب بالظبط لازم يكون بالنسبة لك صديق وحبيب.

8- لو دايما بيحسسك انك اقل منه:

في نوع من الرجالة دايما يحسسك انك اقل منه او انك محظوظة انك معاه وان الف واحدة مستنية اشارة منه, ده بقى لازم تهربي منه على طول وتنهي العلاقة فورا, لانه بيبقى اناني ومغرور ومش شايف غير نفسه بس.

9- لو دايما بتحسي انه بينافسك:

انهي العلاقة لو دايما تحسي انه بينافسك يعني لو مثلا قولتيله انا لقيت شغل جديد او اشتغلت الوظيفة اللي انا بحلم بيها بدل ما يقولك مبروك ويفرح معاكي يقولك انتي لسه بتبدأي في وظيفتك انا النهاردة اخدت مكافأة في الشغل ويقاس على كده اي مواقف تانية يحسسك فيها انه احسن منك واللي انتي وصلتي له مش حاجة مهمة بالنسبة للي هو بيعملوا او وصله.

10- لو دايما بيتوقع او بينتظر منك كل حاجة:

متكمليش علاقتك مع الشخص اللي دايما متوقع منك انك تعملي كل حاجة من غير اي مشاركة منه ومعتمد عليكي اعتماد كامل لانه بعد الجواز هيكون بنفس الطريقة وهيخلي كل المسئوليات عليكي وهيبقى مكبر دماغه.

11- لو حسيتي انك مش منجذبة ليه:

لو جيه عليكي وقت حسيتي انك مش منجذبة ليه باي شكل او مش بتحبي تقضي وقت طويل معاه, يبقى دي اكيد اشارة قوية انك متكمليش مع الشخص ده.

وفي النهاية حابين نقول لكل بنات حوا متستعجلوش في العلاقات او تتمسكوا بالشخص الغلط عشان خايفين ماتقبلوش شخص تاني, خليكي واثقة انك هتقابلي الشخص اللي هيشوفك اجمل واحدة واهم واحدة في العالم بالنسبة له, حتى لو استنيتي وقت طويل على ما تقابليه لكن هتعرفي لما تقابلي الشخص الصح انه كان يستاهل انك تستنيه.

اعرفي كمان اساسيات في اختيار شريك الحياة