7 حاجات ممكن تقولهملك ضوافرك عن صحتك !

ريهام محمود

في

5422

الضوافر تعتبر مراية الصحة .. معلومات جديدة بنشاركها معاكم النهرده عشان بمجرد ما تبصي لضوافرك وتلاحظي اي تغيير في شكلها او في لونها ده تعرفي إن ده مؤشر او تنبيه ان في مشكلة صحية جوه الجسم لازم تعالجيها, لاننا لما بنهمل مشكلة صحية معينة في جسمنا بتبدأ الضوافر تنبهك بده باكتر من طريقة وده اللي هنعرفه النهاردة من خلال موضوعنا, كل تغيير في شكل الضوافر ده معناه ايه وايه المشكلة الصحية اللي ممكن نكون بنعاني منها عشان نعالجها.

تعالوا نعرف صحة الضوافر ممكن تقولك ايه عن صحتك العامة:

1- الضوافر الشاحبة:

لو الضوافر لونها شاحب وبيبقى لونها ابيض اوي وغالبا بيظهر اللون ده عند اخر الضوفر او الاطراف , ده معناه بيكون نقص في كرات الدم الحمرا في الجسم او فقر الدم اللي بنقول عليها الانيميا, وفقر الدم ليه اكتر من سبب ممكن كيو الاجهاد الزيادة, او تكوني مشيتي على دايت مش صحي سبب لك فقر دم, او يكون مافيش اكسجين كفاية واصل للضوافر, وممكن يكون نقص في الحديد وبالتالي بيسبب فقر الدم.

2- الضوافر الصفرا السميكة:

الضوافر الصفرا والسميكة دي مؤشر على وجود عدوى فطرية وممكن تظهر على ضوافر الرجل والايد, ولو اهملناها بتبدأ تنتشر على الضوفر كله وكمان بتعدي الضوافر التانية عشان كده لازم منهملش علاجها, ونتجنب اننا نسيب الضوافر عليها مية دايما ننشفها كويس, ومنلبسش شوز مقفول فترات طويلة.

3- خطوط غامقة بالطول على الضوافر:

لو ظهرت على ضوافرك خطوط غامقة بالطول ده ممكن يكون مؤشر لسرطان الجلد او يكون عندك شامة واتطورت واتحولت لسرطان, وفي الحالة دي لازم تروحي للدكتور بأسرع وقت عشان اكتشاف اي مرض في بداياته بيكون اسهل في علاجه.

4- تشققات الضوافر:

ساعات بيظهر على الضوافر تشققات ومش بتبقى مستوية وبتحسي انها فيها حفر صغيرة كده ومش ناعمة التشققات ده ممكن يكون مؤشر للصدفية ولو لقيتي مع تشققات الضوافر كمان تقشر في الجلد في اكتر من مكان في الجسم ده بيأكد انك بتعاني من الصدفية.

5- الضوافر الرقيقة او الضعيفة:

الضوافر الرقيقة او الضعيفة اوي ومن اقل حاجة ممكن يتكسروا او من اي خبطة ممكن يطلعوا من مكانهم ده معناه ان عندك مشاكل في الغدة الدرقية وانها مش بتشتغل بشكل منتظم او سليم وهي المسئولة عن ضعف الضوافر, وفي الحالة دي لازم تروحي للدكتور تظبطيها.

6- النقط او الخطوط البيضا على الضوافر:

ساعات بتظهر على الضوافر نقط بيضا في اماكن متفرقة من الضوفر او بتبقى خطوط تحت بعض ومش بنبقى عارفين سببها ايه, الخطوط دي ممكن تكون مؤشر لمشاكل في الكلى او الكبد, او نقص البروتينات والمعادن في الجسم ويبقى في الحالة دي علاجها انك تزودي استهلاك البروتينات في اليوم.

7- الضوافر الزرقا:

لو لون الضوافر اتغير للون الازرق ده معناه ان في مشاكل في الجهاز التنفسي, او مشكلة في الاوعية الدموية بمرض اسمه “رينود” وده بيبقى مشكلة في الدورة الدموية وان الضوافر مش بيوصلها اوكسجين كفاية.