10 عادات خاطئة بتعمليها كل يوم هتخلي سنك يكبر بسرعه !

مفيش بنت مبتشيلش هم انها تكبر ويبان عليها السن و دايما نفسنا يبقي شكلنا صغير وبشرتنا نضرة علي طول ، بس لو انتى حاسه انه شكلك بيبان اكبر من سنك ده ممكن يكون نتيجة لاسباب كتيرة، فى المقال ده هنقولك على 10عادات خاطئة بتعمليها كل يوم هتخلي سنك يكبر بسرعه ولما تبطليها هتحسي انه شكلك بيبان اصغر من غير ماسكات ولا بوتوكس وعمليات تجميل!

10 عادات خاطئة بتعمليها كل يوم هتخلي سنك يكبر بسرعه !

1- دايت بيعتمد على دهون قليلة :

علشان تمنعى ظهور التجاعيد ، مهم انك تمدى جسمك بكمية مناسبة من الدهون خصوصا احماض الاوميجا 3 الدهنية ،لانها بتساعد جلدك انه يفضل ناعم و مشدود وده اللى بتحرمك منه انظمة الدايت اللى بتعتمد على دهون قليلة فبتتسبب فى انه التجاعيد بتظهر على وشك بشكل اسرع . 

دايت بيعتمد على دهون قليلة

2-انك تشربى بشاليمو :

لما تشربى السوايل بشاليمو بتضطرى تضغطى شفايفك عليها و ده بيسبب ظهور خطوط  و تجاعيد حوالين الفم و كمان التدخين بيسب نفس التجاعيد، الافضل انك تتعودى تشربى من الكوباية و لو بتدخنى حاولى توقفى تدخين لانه افضل لصحتك بشكل عام .

3-انك تنامى على جنبك :

واحده كمان من عادات خاطئة بتعمليها كل يوم هى انك تنامى على جنبك و انتى ضاغطة وشك على المخده ، الوضعية دى فى النوم بتسبب ظهور التجاعيد على الخدود و الدقن ، الافضل انك تنامى على ضهرك و هو مفرود ، الوضعية دى فى النوم افضل لضهرك و كمان هتساعد وشك يفضل شباب و شكله مرتاح .

4- انك تقعدى غلط :

القعده الغلط بتضعف العمود الفقرى و بتأثر على شكل جسمك كله لانها بتخلى العمود الفقرى ينحرف عن وضعه الطبيعى ، و كنتيجة ده بيخلى عضلات ضهرك تبقى مشدودة و متوترة و ده كله ممكن يسبب ليكى احساس بتعب و ارهاق مستمر و بالتالى هيخلى شكلك مجهد و تعبان .

5- استخدام الـ sun block فى الصيف بس :

التعرض الزيادة لاشعة الشمس الفوق بنفسجية او الـ ultra vilot rays بتتسبب فى انه بشرتك تعجز بسرعه، و  علشان تحمى نفسك من التأثير الضار للشمس مهم انك تلبسي نضارات شمس حتى لو الدنيا مغيمة لانه الغيوم بتحجب حوالى 20% بس من الاشعه دى ، و كمان مهم انك قبل ما تنزلى كل يوم الصبح تحطى sun block على وشك حتى فى ايام الشتاء و مش بس اوقات المصيف .

6- استخدام الدفايات بزيادة :

التعرض الزيادة للتدفئة الصناعية اللى بنتحصل عليها من الدفايات الكهرباء او الغاز بتخلى بشرتك جافة جدا و كمان شعرك ، و ده بيسهل من عملية تكون الخطوط و التجاعيد ، حاولى تستخدمى الدفايات بأقل كمية ممكنة ، ولو رورى تبقى شغاله يبقى خليها على اقل درجة حرارة .

7- انك تقولى لا للسكريات :

كلنا عارفين انه السكر مضر للصحة بشكل عام، بس من وقت للتانى مفيش مانع تكافئى  نفسك بحاجه حلوة او فيها سكر ، السكر بكميات معقولة مفيد جدا للدورة الدموية .

8- انك تتفرجى على التليفزيون كتير :

فى دراسة بتقول انه كل ساعه بتقضيها قدام التليفزيون بتقلل معدل عمرك بحوالى 22 دقيقة، علشان كده بيوصى الخبراء انه لما تبقى قاعده على الكرسي بتتفرجى على التليفزيون او ممدة على الكنبة انك تقومى كل نص ساعه و تتمشى شوية فى الشقة .

9- قلة النوم :

البالغين بيحتاجوا على الاقل 7 ساعات نوم متواصله كل ليلة ، وانك متناميش كفاية مش بس هيتسبب فى انه يبقى شكلك تعبان و مجهد لكن كمان هيأثر على تركيزك و جمالك ، الخبراء بينصحوا انك تنامى بدرى على قد ما تقدرى لو بتحسي بارهاق او قلة فى الطاقة و المجهود او زيادة فى الوزن . 

10- التوتر الناتج من قلة التنظيم :

فى دراسات مختلفة بتقول انه التوتر المزمن ممكن يسبب ضرر لخلايا الجسم و ده هيتسبب فى انك يبان عليكى السن بصورة اسرع و ابعدى عن فكرة انك تأجلى اللى وراكى لكرة و حاولى تعملى كل حاجه فى وقتها .