7 اخطاء بتعمليها لما تصبغى شعرك فى البيت .. اعرفيهم

بقلمآية حسان فيشعر visibility9558

انك تغيرى لون شعرك و تصبغيه مش بس بيساعدك تغيرى اللوك بتاعك و تجدديه ، لكنه كمان قرار بنعتبره مهم و صعب احيانا ناخده . لانى مش بس بيغير فى شكلك بشكل كبير و لمدة طويله لكن دلوقتى انك تصبغى شعرك فى كوافير بقي حاجه مكلفة جدا و بيبقى البديل انك تصبغى شعرك فى البيت، علشان كده هتعرفى معانا فى المقال ده 7 اخطاء بتعمليها لما تصبغى شعرك فى البيت علشان تتجنبيهم ..

7 اخطاء بتعمليها لما تصبغى شعرك فى البيت .. اعرفيهم

1- متنخدعيش بالصور اللى على علبة الصبغة :

لما تقررى تشترى علبة صبغة متنخدعيش بالصور اللى على العلبة لانه صعب تعرفى فعلا ان كان اللون اللى العلبة هو اللى هيطلع معاكى لما تصبغى شعرك علشان منعرفش لون شعر الموديل دى كان ايه فى الاساس ، علشان كده واحده من اخطاء بتعمليها لما تصبغى شعرك فى البيت و مهم تتجنبيها هى انك تمشى حسب دليل الوان يناسب لون شعرك انتى و حاولى تفكرى ان كان اللون هيناسبك ولا لا ، القاعدة بتقول انه اصحاب البشرة الفاتحه  و العيون الملونه بتليق معاهم درجات الشعر الاشقر و الفاتحه  .

متنخدعيش بالصور اللى على علبة الصبغة
متنخدعيش بالصور اللى على علبة الصبغة

2- اختارى لون يخلى اللوك بتاعك طبيعى : 

دايما لما تقررى انك هتصبغى شعرك فى البيت ، اختارى درجة لون تكون فى حدود درجتين من لون شعرك الطبيعى ، سواء كانوا درجتين افتح او اغمق ، وخدى بالك انه الصبغة اللى بتتعمل فى البيت ممكن متغيرش لون شعرك بشكل جذرى زى ما انتى متوقعه ، وعموما تغيير اللون بشكل كامل زى من الاسود للاشقر مثلا بتعتبر حاجه مضرة جدا و مبننصحكيش بيها . و علشان تتأكدى انك اختارتى اللون المناسب ممكن تجربى wig او شعر مستعار باللون اللى حابه تغيرى شعرك ليه و تشوفيه هيبقى مناسب ليكى ولا لا قبل ما تعمليه .

3- هاتى صبغة زيادة : 

هتضايقى جدا لو وانتى بتصبغى شعرك فى البيت لقيتى انه الصبغة خلصت وانتى لسه مخلصتيش ، ده واحد من اخطاء بتعمليها لما تصبغى شعرك فى البيت و لازم تعملى حسابها انك دايما تشترى صبغة بزيادة ، اشترى على الاقل علبة صبغة زيادة عن الكمية اللى بتحتاجيها لشعرك .

4- جهزى شعرك قبل الصبغه : 

بعد ما تبقى قررتى ايه هو اللون المناسب ليكى و تجهزى ادوات الصبغة اللى هتحتاجيها ، دلوقتى وقت انك تجهزى شعرك . لازم الاول تساوى شعرك و تتأكدى انك اتخلصتى من اى اطراف مقصفة لان شكلهم هيبقى اسوأ من الاول بعد الصبغه، و اغسلى شعرك قبل الصبغة بيوم و استخدمى كمية مناسبة من البلسم علشان تضمنى لشعرك الترطيب اللى هيحتاجه و تعوضى بيه الزيوت الطبيعية اللى بتفرزها فروة راسك و اللى ممكن تفقديها وانتى بتصبغى شعرك . و بننصحك متغسليش شعرك فى يوم الصبغة .

أتخلصى من الاطراف المتقصفة
أتخلصى من الاطراف المتقصفة

5- اعملى تجربة الاول : 

انك تعملى تجربة الاول قبل ما تصبغى شعرك حاجه مهمه، جربى تصبغى خصلة صغيرة من شعرك و تشوفى نتيجة اللون قبل ما تصبغى شعرك كله لانه احيانا ممكن المواد المتكونة منها الصبغة متبقاش مناسبة لطبيعة شعرك او انه تسبب التهاب لفروة راسك . و مهم كمان تستخدمى color lock shampoo او الشامبو الخاص بالشعر المصبوغ علشان يحافظ على اللون فى شعرك و يحبسه ، لانه الشامبو العادى بيوقع الصبغة من الشعر شوية بشوية كل مرة تستخدميه و كمان الـ color lock shampoo هيضمنلك ضرر اقلل لشعرك .

6- اتجنبى السباحه : 

لو صبغتى شعرك خلاص و متعودة تعومى فى حمامات السباحة يبقى لازم توقفى النشاط ده ، لانه الكلور اللى بيبقى فى المية هيوقع اللون من شعرك او يقلل المدة اللى المفروض تثبت فيها الصبغة على شعرك ، و لو مش هتقدرى توقفى سباحة يبقى تلبسي غطاء راس  سيليكون و اتاكدى انه محكم على شعرك . 

7- احمى شعرك :

غسيل الشعر الكتير ، التعرض للشمس ، الدخان و التراب فى الشارع ، الحاجات دى كلها بتقلل من عمر الصبغة و ممكن كمان تتفاعل مع المواد الكيميائية الموجوده فيها و بالتالى تسبب ضرر لشعرك ، حاولى تحمى شعرك بانك تتجنبى التعرض الكتير للعوامل دى .