5 نصايح سهلة تخلى بيهم ضوافرك تلمع بشكل طبيعى
انك تخلى ضوافرك تلمع بشكل طبيعى و تبقى صحية ممكن تكون حاجه مش سهلة لبعض البنات، وعلشان تهتمى بجمال ضوافرك زى ما بتهتمى بجمال شعرك و بشرتك هتلاقى فى الموضوع ده 5 نصايح و حيل سهلة علشان تهتمى بضوافرك بطريقة صحيحة وتخلى بيهم ضوافرك تلمع بشكل طبيعى وجذاب..
5 نصايح سهلة تخلى بيهم ضوافرك تلمع بشكل طبيعى
النصيحة الاولى : استخدمى hand lotion
افضل طريقة علشان تبدأى تهتمى بصحة و جمال ضوافرك و ايدك كلها هى انه تخلى دايما فى hand lotion او اى نوع بلسم للبشرة تفضليه معاكى فى شنطتك ، و كمان خبراء البشرة و التجميل بيوصوا انه نستخدم زيت مناسب او حتى ممكن تستخدمى الزيت المخصص لترطيب بشرة الاطفال baby oil و ندعك بيه بشرتنا كل يوم قبل النوم علشان يبقى فى وقت كافى لبشرتنا انها تتشربه كويس و تنتفع بيه . و مفيد كمان لو تعملى مساج لايديكى بالزيت ده لانه بيحسن اداء الدورة الدموية و كمان لو دعكتى بيه منبت الاظافر ” بداية الضافر” بيخليه اقوى و يطول بشكل صحى اكتر . و لو مبتحبيش تستخدمى مستحضرات جاهزة ممكن تستبدلى كل ده بزيت جوز الهند .
النصيحة الثانية : حافظى على ترطيب جسمك كله
حيلة تانية ممكن تعمليها علشان تقدرى تخلى ضوافرك تلمع بشكل طبيعى هى انك تحافظى على ترطيب جسمك كله بانك تشربى كمية كفاية من المية ، ترطيب الجسم هيخليكى منتعشة و يزود نشاطك و كمان هيزود من نضارة بشرتك وقوة ضوافرك بنسبة كبيرة ، و حاولى متبالغيش فى غسيل ايديكى و تبعدى تعرضك للمواد الكيميائية الكتيرة زى الصابون او منظف الايدين ، لانه لما الضوافر تفضل تتبل و تنشف كتير ده بيخلى الضوافر جافة و ده هيخلى ضوافرك مطفية و ضعيفة سهل تتكسر ، و حاولى تلبسي جوانتى و انتى بتغسلى الاطباق او وانتى بتنضفى عموما .
النصيحة الثالثة : متستخدميش ضوافرك كأدوات !
ضوافرك محتاجه اهتمام و تعامل خاص ، و مينفعش ابدا تستخدميهم كأدوات بمعنى انه مينفعش تستخدمى ضوافرك لفتح علبة مثلا او انك تشيلى بيها ستيكر او تفتتحى بيها كان حاجه ساقعه ، ابعدى عن اى حاجه ممكن تضغط على ضوافرك و تسببلها ضعف او تكسير .
النصيحة الرابعه : خدى مكملات غذائية :
البيوتين هو نوع من انواع فيتامين B اللى سهل تلاقيه بشكل طبيعى فى اغذية كتيرة و متوفر كمان فى شكل كبسولات ، و بيعتبر مفيد للشعر و البشرة و الاظافر ، فيتامين B هيزود من نسيج و صلابة الاظافرو يمنعها من التكسر ، بس مهم ترجعى للدكتور قبل ما تقررى تاخدى اقراص فيتامين B علشان يقولك ان كان مناسب ليكى ولا لا و ايه هى الجرعه اللى هتحاجيها .
النصيحة الخامسة : اعملى مانيكير لضوافرك
المانيكير بيعمل زى طبقة حماية لضوافرك ، بيخليهم اقوى فبيقل احتمال انهم يتكسروا او يتخدشوا . حاولى دايما تستخدمى المانيكيركل 7 ايام او لو مبتحبيش الالوان استخدمى المانيكير الشفاف اومقوى للاظافر من وقت للتانى علشان تبقى ضوافرك صحية اكتر .
طريقة عمل المانيكير للايدين في البيت بالخطوات
