20 وصفة مذهلة للبشرة والشعر باستخدام جل الالوفيرا

ريهام محمود
ريهام محمود
في
بشرة
253011

جل الالوفيرا من الحاجات المفيدة جدا للبشرة والشعر وكان بيستخدم من زمان للعلاجات الصحية والجمالية ودلوقتي بقى يدخل في كتير من مستحضرات العناية بالبشرة والشعر وده لانه غني جدا بالفيتامينات والمعادن المفيدة جدا, والنهاردة جايبين لكل بنات حوا 20 وصفة من جل الالوفيرا هتخلي بشرتك صافية وخالية من اي عيوب وشعرك صحي جدا.

– تعالوا نعرف الاول بالخطوات ازاي نستخرج جل الالوفيرا في البيت:

  • – هنجيب ورقة الصبار من اي مشتل ونقطعها من تحت بزاية ونسندها على اي حاجة نوقفها بشكل راسي لمدة 15 دقيقة عشان الجل كله يتجمع في مكان واحد وغالبا اكتر مكان بيكون متجمع فيه كمية جل هو نص الورقة, بعد كده هاتي لوحة تقطيع وقطعي حواف الورقة اللي فيها شوك من الجنبين وقشري القشرة من فوق ومن تحت بالسكينة, هتلاقي الجل طلع معاكي قطعة واحدة قطعيه واهرسيه بالمعلقة واستخدميه.

– او ممكن تطلعيه بطريقة تانية هتقعطي الورقة بالطول وتبدأي تخرجي الجل بالمعلقة, بعد ما تستخرجي الجل باي طريقة من دول احتفظي بيه في برطمان في التلاجة واستخدميه في اي وقت في الوصفات اللي احنا هنعرفها مع بعض.

وصفات طبيعية بجل الالوفيرا للبشرة والشعر 1
وصفات طبيعية بجل الالوفيرا للبشرة والشعر 1

– وصفات طبيعية بجل الالوفيرا للبشرة والشعر:

1- ماسك جل الالوفيرا لعلاج النمش وحروق الشمس:

اخلطي 4 معالق كبيرة من جل الالوفيرا مع 6 معالق كبيرة عصير خيار و2 ملقة كبيرة لبن, امزجيهم مع بعض كويس جدا وحطي الخليط على بشرتك وسيبيه 20 دقيقة وبعدين اغسليه, وهتشوفي فرق ملحوظ جدا في النمش وحروق الشمس.

ماسك جل الالوفيرا لعلاج النمش وحروق الشمس
ماسك جل الالوفيرا لعلاج النمش وحروق الشمس

2- ماسك جل الالوفيرا للبشرة الجافة:

  • – اخلطي 3 معالق كبيرة من جل الصبار مع معلقة كبيرة من زيت الورد وحطي الخليط على البشرة وسيبيه من 10 – 15 دقيقة وبعدين اغسليه بمية دافية.

– ممكن تخلطي 2 معلقة كبيرة من جل الصبار مع معلقة صغيرة من زيت اللوز الحلو وملعقة صغيرة مية ورد وحطي الخليط على البشرة لمدة 15 دقيقة وبعدين اغسليه.

  • – اخلطي معلقة صغيرة من جل الصبار مع 2 معلقة كبيرة عسل نحل وحطي الخليط على البشرة وسيبيه 15 دقيقة او لحد ما ينشف وبعدين اغسليه, وممكن تكرري الوصفة يوميا.
  • ماسك جل الالوفيرا للبشرة الجافة
    ماسك جل الالوفيرا للبشرة الجافة

3- ماسك الالوفيرا والليمون لعلاج عيوب وشحوب البشرة والبقع الداكنة:

  • – الالوفيرا مع الليمون ليهم مفعول سحري على البشرة لان الليمون بيزود من فوايد الالوفيرا لما بيتحط معاه والاتنين ليهم فعالية كبيرة جدا في علاج عيوب البشرة والبقع الغامقة وبيخلي البشرة صافية, ومش بس كده كمان بيعالج علامات التمدد على الجلد وبيعالج بقع الشمس, وكمان الليمون لما بيتحط على الالوفيرا وبتحتفظي بيهم مع بعض بيمنع ان الالوفيرا لونه يغير وبيطول في عمره اكتر وبيخليه يقعد معاكي كويس فترة اطول يعني بيبقى زي مادة حافظة ليه.

– استخرجي الجل من ورقتين صبار واخلطي معاهم عصير ليمونة حطي الخليط في الخلاط واضربيه لمدة دقيقة تقريبا لحد ما المكونات تمتزج كويس مع بعض خدي منه حطيه على البشرة وسيبيه من 10 – 15 دقيقة واغسليه بالمية, واحتفظي بباقي الكمية في برطمان في التلاجة لحد ما تيجي تستخدميه تاني.

ماسك الالوفيرا والليمون لعلاج عيوب وشحوب البشرة والبقع الداكنة
ماسك الالوفيرا والليمون لعلاج عيوب وشحوب البشرة والبقع الداكنة

4- ماسك الالوفيرا لعلاج حب الشباب والبثور:

  • – اخلطي بياض بيضة مع 4 معالق كبيرة من جل الصبار و معلقة كبيرة شاي اخضر ونقطتين زيت بابونج , اخلطيهم كويس مع بعض وحطي الخليط على البشرة وسيبيه 20 دقيقة وبعدين اغسليه بمية باردة.

– او اخلطي 2 معلقة كبيرة من جل الصبار مع معلقة صغيرة من زيت شجرة الشاي وحطي الخليط على البشرة 20 دقيقة وبعدين اغسليه, الماسك ده مفيد جدا لعلاج حب الشباب والبثور.

ماسك الالوفيرا لعلاج حب الشباب والبثور
ماسك الالوفيرا لعلاج حب الشباب والبثور

5- ماسك الالوفيرا لتنضيف الجلد:

هنجيب شريحة بابايا ونضيف عليها كمية صغيرة من جل الصبار ومعلقة صغيرة زبادي ومعلقة صغيرة عسل نحل هنحط المكونات كلها في الخلاط ونضربهم كويس مع بعض لحد ما يبقى الماسك ناعم خالص ناخد منه نحطه على البشرة ونسيبه 15 دقيقة وبعدين نغسله بمية دافية, الماسك ده بيدي نتيجة فورية هتلاقي بشرتك بقت منورة وصافية, وممكن تستخدمي جل الالوفيرا لوحده من غير اضافات.

ماسك الالوفيرا لتنضيف الجلد
ماسك الالوفيرا لتنضيف الجلد

6- ماسك الالوفيرا لعلاج الندبات:

  • – اخلطي كميات متساوية من جل الصبار ومية الورد وحطي الخليط على البشرة وسيبيه من 20 – 30 دقيقة وبعدين اغسليه بمية باردة, الوصفة دي فعالة جدا لعلاج ندبات البشرة.

– ممكن نخلط 2 معلقة كبيرة من جل الصبار مع معلقة صغيرة زيت زيتون ومعاهم كام نقطة عصير ليمون وحطي الخليط على البشرة وسيبيه من 15 – 20 دقيقة وبعدين اغسليه بمية دافية.

ماسك الالوفيرا لعلاج الندبات
ماسك الالوفيرا لعلاج الندبات

7- ماسك الالوفيرا والفاكهة للبشرة الجافة:

قطعي كمية من البرتقان الموز والكيوي والافوكادو قطع صغيرة وضيفي عليهم معلقة صغيرة من جل الصبار وامزجيهم مع بعض, ولو بشرتك جافة اوي ممكن تضيفي للمكونات معلقة صغيرة زيت لوز حلو , حطي الخليط على البشرة وسيبيه من 15 – 20 دقيقة وبعدين اغسليه بالمية.

ماسك الالوفيرا والفاكهة للبشرة الجافة
ماسك الالوفيرا والفاكهة للبشرة الجافة

8- ماسك الالوفيرا لعلاج التجاعيد:

هاتي صفار بيضة اضربيها كويس بالمعلقة وضيفي عليها معلقة صغيرة جل الصبار ومعلقة صغيرة زيت زيتون وبقطنة ادهني وشك بالخليط وسيبيه من 15 – 20 دقيقة وبعدين اغسليه هتحسي بعدها جلدها مشدود وشكله صحي جدا.

ماسك الالوفيرا لعلاج التجاعيد
ماسك الالوفيرا لعلاج التجاعيد

9- ماسك الالوفيرا لتفتيح البشرة:

  • – اخلطي معلقة كبيرة من جل الصبار مع كام نقطة من مية الورد ونص معلقة صغيرة كركم ومعلقة صغيرة لبن ومعلقة صغيرة عسل امزجي المكونات كويس مع بعض وحطي الخليط على البشرة وسيبيه من 20 – 30 دقيقة, الماسك ده هايل جدا للبشرة بيفتحها وينعمها.

– ممكن تعملي ماسك تقشير, اخلطي 2 معلقة كبيرة من جل الصبار مع معلقة صغيرة عصير ليمون و2 معلقة صغيرة سكر بني وممكن تستخدمي السكر الابيض العادي ودلكي بشرتك بالخليط ده بحركات دائرية لمدة 5 دقايق وبعدين اغسليه بالمية.

ماسك الالوفيرا لتفتيح البشرة
ماسك الالوفيرا لتفتيح البشرة

10- ماسك الالوفيرا لازالة الرؤوس السودا والرؤوس البيضا:

اخلطي 2 معلقة كبيرة من جل الصبار مع معلقة كبيرة سكر بني ودلكي بشرتك بالخليط في حركات دائرية لمدة 5 دقايق خصوصا منطقة الانف والاماكن اللي فيها رؤوس سودا او بيضا وبعدين اغسليه بالمية, الماسك ده بيتغلل في الجلد بعمق وبينضف البشرة من جوه وبيزيل الدهون الزيادة من البشرة.

ماسك الالوفيرا لازالة الرؤوس السودا والرؤوس البيضا
ماسك الالوفيرا لازالة الرؤوس السودا والرؤوس البيضا

11- ماسك الالوفيرا لازلة السموم من البشرة:

اخلطي كميات متساوية من جل الصبار وعصير الليمون والمانجا, حطيهم مع بعض في الخلاط لحد ما يمتزجوا كويس ويبقى عندك خليط سميك حطيه على البشرة وسيبيه 20 دقيقة على الاقل وبعدين اغسليه بالمية, الماسك ده بيزيل السموم من البشرة وبيخلي شكلها صحي جدا ومنورة.

ماسك الالوفيرا لازلة السموم من البشرة
ماسك الالوفيرا لازلة السموم من البشرة

12- ماسك الالوفيرا والبيض لتنعيم وترطيب الشعر:

 لو عايزة شعر ناعم وصحي يبقى جربي الماسك ده, اخلطي بيضة مع كمية كبيرة من جل الصبار الكمية اللي تكفي طول وكثافة شعرك حطي الخليط على الشعر وسيبيه من 15 – 20 دقيقة وبعدين اغسليه بمية باردة, الماسك ده ليه فوايد هايلة جدا ويعتبر بلسم طبيعي للشعر.

ماسك الالوفيرا والبيض لتنعيم وترطيب الشعر
ماسك الالوفيرا والبيض لتنعيم وترطيب الشعر

13- بلسم الالوفيرا:

ممكن تستخدمي جل الصبار لوحده كبلسم منعم للشعر, طلعي كمية من الصبار تكفي طول وكثافة شعرك, حطي الجل على شعر مبلول  من الجذور للاطراف وغطي الشعر بفوطة سخنة عشان الجل يتغلل كويس في الشعر وفروة الراس وسيبيه من 15 – 20 دقيقة وبعدين اغسليه بالشامبو.

بلسم الالوفيرا
بلسم الالوفيرا

14- ماسك الالوفيرا لعلاج حكة فروة الراس:

الالوفيرا ليه خصائص مضادة للبكتيريا والفطريات بتساعد على علاج حكة فروة الراس.

طلعي الجل من ورقة الصبار وحطيه على طول على فروة الراس ودلكيه باطراف صوابعك وسيبيه 20 دقيقة وبعدين اغسليه بمية باردة, الماسك بيعمل زي تبريد لفروة الراس وهيخلصك من احساس الحكة.

ماسك الالوفيرا لعلاج حكة فروة الراس
ماسك الالوفيرا لعلاج حكة فروة الراس

15- ماسك الالوفيرا لعلاج قشرة الشعر:

اخلطي كمية من جل الصبار مع كام نقطة من زيت شجرة الشاي وممكن تضيفي شوية مية ورد عشان تزودي فعالية الماسك, حطي الخليط على الشعر وسيبيه ساعة وبعدين اغسليه, كرري الماسك من 1 – 2 مرتين في الاسبوع.

ماسك الالوفيرا لعلاج قشرة الشعر
ماسك الالوفيرا لعلاج قشرة الشعر

16- ماسك الالوفيرا وزيت الزيتون لترطيب الشعر بعمق:

اخلطي كميات متساوية من جل الصبار وزيت الزيتون وامزجيهم مع بعض كويس, وحطي الخليط على الشعر وسيبيه لمدة 30 دقيقة وبعدين اغسليه بالشامبو.

ماسك الالوفيرا وزيت الزيتون لترطيب الشعر بعمق
ماسك الالوفيرا وزيت الزيتون لترطيب الشعر بعمق

17- ماسك الالوفيرا لنمو الشعر وعلاج التساقط:

للي بيعانوا من مشكلة ان شعرهم مش بيطول بسرعة او بيتساقط الماسك ده مفيد جدا ليهم لان الالوفيرا بيحتوي على انزيمات ومضادات للاكسدة بتحفز بصيلات الشعر وبتعزز نموه بشكل صحي, ده غير ان الصبار فيه خصائص قلوية بتساعد على استعادة الرقم الهيدروجيني اللي ليه دور في الحفاظ على توازن الشعر وفروة الراس وبالتالي ده بيأدي لنمو الشعر.

– اخلطي ½ كوباية من جل الصبار مع ¼ كوباية من زيت جنين القمح و ½ كوباية من حليب جوز الهند, حطي الخليط على الشعر ودلكي بيه شعرك وفروة الراس كويس وسيبيه 30 دقيقة وبعدين اغسليه بالمية.

  • – بالنسبة لحليب جوز الهند اللي ممكن مش هيبقى متوفر في كل الاماكن ممكن احنا نعمله في البيت هنجيب واحدة جوز هند هتلاقوه عند اي فكهاني وتبشريها وتحطيها في الخلاط وتضيفي عليها 4 كوبايات مية سخنة وتضربيهم مع بعض وبعدين تحطي شاشة على مصفى وتصفي الخليط كويس هيطلع عندك اللبن.
ماسك الالوفيرا لنمو الشعر وعلاج التساقط
ماسك الالوفيرا لنمو الشعر وعلاج التساقط

18- ماسك الالوفيرا لتنعيم ولمعان الشعر:

اخلطي 3 معالق صغيرة من جل الصبار مع معلقة صغيرة من زيت جوز الهند ومعلقة صغيرة عصير ليمون, ودلكي شعرك بالخليط ده لمدة دقايق وبعدين سيبيه 20 دقيقة واغسليه, هتلاحظي بعدها شعرك بقى اطرى وانعم وبيلمع.

ماسك الالوفيرا لتنعيم ولمعان الشعر
ماسك الالوفيرا لتنعيم ولمعان الشعر

19- ماسك الالوفيرا لعلاج الشعر التالف والجاف:

 لو شعرك جاف اوي وتالف واطرافه مقصفة ماسك الالوفيرا من الحاجات الفعالة جدا اللي هتعالج لك المشاكل دي بشكل سريع وفوري.

اخلطي ½ كوباية من جل الصبار مع معلقة صغيرة ريحان مطحون و2 معلقة صغيرة حلبة مطحونة و2 معلقة صغيرة زيت خروع امزجي المكونات مع بعض كويس وحطي الخليط على الشعر من الجذور للاطراف وغطي شعرك بطاقية الشعر او كيس بلاستيك  ونامي بالماسك واغسليه الصبح بالشامبو, لما تخليه طول الليل ده هيعمل تأثير اقوى على الشعر وهيرطب الشعر بعمق وكمان بيساعد على نمو الشعر.

ماسك الالوفيرا لعلاج الشعر التالف والجاف
ماسك الالوفيرا لعلاج الشعر التالف والجاف

20- ماسك الالوفيرا والكركدية لتنعيم وتكثيف الشعر:

اخلطي كوباية من جل الصبار مع 2 معلقة كبيرة من معجون زهرة الكركدية “ممكن نحط على الكركدية شوية مية صغيرين جدا ونهرسه كويس بالمعلقة وبعدين نضيفه على الصبار” , هنحط الخليط على الشعر ونسيبه من 30 – 45 دقيقة وبعدين نغسله, مع الانتظام على الماسك ده هيخلي الشعر ناعم وبيلمع وهيزود كثافته وكمان هيمنع انقسام اطراف الشعر.

ماسك الالوفيرا والكركدية لتنعيم وتكثيف الشعر
ماسك الالوفيرا والكركدية لتنعيم وتكثيف الشعر

– نصايح عند استخدام جل الالوفيرا:

1- قبل ما نستخدمة او نطلع منه الجل لاي ماسك نغسل ورقة الصبار الاول بالمية وننشفها وبعدين نستخدمها.

2- ممكن تضيفي جل الصبار لاي ماسك للبشرة غير اللي احنا قايلينهم يعني اي ماسك هتعمليه ممكن تضيفي عليه شوية من جل الصبار.

3- عشان تحمي البشرة من الجفاف , ممكن تحطي طبقة رقيقة جدا من الجل على البشرة قبل ما تحطي المكياج.

4- ممكن كمان الرجالة يستخدموا الجل بعد الحلاقة مفيد جدا لترطيب البشرة ومنع الالتهاب اللي ممكن يحصل بعد الحلاقة.

5- للصحة عموما ممكن تشربي عصير الصبار كمنشط عام للجسم “وبيتعمل بطريقة سهلة جدا ضيفي 2 معلقة كبيرة من جل الصبار للمية العادية , او للتمر , او تضيفيه لعصير البرتقان او مية جوز الهند او مية الشعير او عصير الليمون وتضيفي سكر وتشربيه, وتقدري تضيفيه لاي نوع عصير فاكهة او خضار زي ما انتي عايزة”.

6- لو مش عايزة تغيري لون شعرك او يبقى افتح ممكن تستبدلي الليمون في الوصفات بعسل النحل, لان الليمون مع الاستخدام المستمر بيفتح لون الشعر مع الوقت.

وصفات طبيعية بجل الالوفيرا للبشرة والشعر 2
وصفات طبيعية بجل الالوفيرا للبشرة والشعر 2

شوفي كمان 12 وصفة للبشرة والشعر من مكونين اتنين بس

وصفات للبشرة والشعر
وصفات للبشرة والشعر

مقالات متعلقه

5 علاجات طبيعية بتستخدمها كارينا كابور لبشرة نضرة وشباب

5 علاجات طبيعية بتستخدمها كارينا كابور لبشرة نضرة وشباب

10 نصايح جمالية دخليهم في روتينك هيفرقوا معاكي

10 نصايح جمالية دخليهم في روتينك هيفرقوا معاكي

طرق لعكس آثار اضرار الشمس على جلدك

طرق لعكس آثار اضرار الشمس على جلدك