ازاي تحطي الروج السايل زي المحترفين بخطوات سهلة !
الروج السايل من انواع الروج اللي نازلة موضة اوي بقالها فترة خصوصا النوع المات السايل ماركات كتير منزلة منه مجموعة الوان كبيرة وكلها تحفة اوي بس بتبقى مشكلتنا مع الروج السايل اننا مش بنعرف نظبطه كويس على الشفايف ودايما الرسمة بتطلع بره الشفايف, عشان كده احنا النهاردة جايبين لكل بنات حوا خطوات بسيطة وسهلة هتخليكوا تحطوا الروج السايل زي المحترفين.
طريقة وضع الروج السايل زي المحترفين:
الحاجات اللي محتاجينها :
1- احمر شفايف سايل اي لون واي نوع من اختيارك.
2- فرشة الشفايف.
3- فرشة رفيعة بزاوية “Angled Liner Brush”.
4- كونسيلر.
1- الخطوة الاولى – التنضيف:
زي ما بشرتنا بتحتاج تنضيف قبل ما نحط اي حاجة عليها كمان الشفايف محتاجة تنضيف ونعملها تقشير عشان الروج يطلع شكله حلو ويدينا النتيجة اللي احنا عايزينها.
2- الخطوة التانية – استخدام فرشة الشفايف:
اسخدام الفرشة هتبقى افضل مع الروج السايل لانها هتخليكي تتحكمي فيه اكتر, ممكن تحطي كمية روج على ضهر ايدك وتاخدي منه بالفرشة.
3- الخطوة التالتة – تحديد الشفة السفلية:
في الخطوة دي هنحدد الشفة اللي تحت او هنحط الخطوط العريضة, باستخدام فرشة الشفايف هنبدأ نرسم خط على حدود الشفايف اللي تحت من الزاوية الخارجية للشفة, وحطي طبقة رقيقة من الروج عشان ميشققش او يبقى تقيل اوي ويطلع شكله احلى.
4- الخطوة الرابعة – تحديد قوس كيوبيد:
بعد ما حددنا الخطوط العريضة للشفة اللي تحت هنحدد قوس كيوبيد.
5- الخطوة الخامسة – الربط بين الشفتين:
بعد ما حددنا قوس كيوبيد, هنبدأ نوصل الشفة اللي تحت باللي فوق ونحط الروج من الزاوية الخارجية للشفة.
6- الخطوة السادسة – ملء الشفايف:
دلوقتي بعد ما حددنا الخطوط العريضة للشفايف اللي فوق واللي تحت وراضيين عن شكلها هنبدأ نملى الشفايف بالروج, وعشان تخلي الروج ظاهر اكتر وشكله حيوي ممكن تحطي طبقة تانية من الروج بس نخلي بالنا عشان منلخبطش الرسم اللي احنا عملناه يعني نملى الشفايف من جوه بعيد عن حدود الشفايف.
7- الخطوة السابعة – تنضيف حوالين الشفايف:
باستخدام الفرشة الرفيعة والكونسيلر هننضف الزوايا اللي حوالين الشفايف من اي روج ممكن يكون طلع مننا, بس نستنى لما الروج ينشف خالص وبعدين نبدأ الخطوة دي.
وكده تبقى الخطوات خلصت وحطيتي الروج السايل بطريقة سهلة ويطلع معاكي مظبوط وهيخلي شفايفك احلى وشكلها بارز اكتر ودي هتبقى النتيجة النهائية.
ده فيديو بيوضح الخطوات اللي احنا شرحناها:
عرفي كمان نصايح تعرفي بيها ازاي تحطي الروج الاحمر بطريقة صحيحة
