هيحصل ايه لما تشربي مية مع عسل وليمون كل يوم الصبح !

بقلمريهام محمود فيصحة visibility11218

مشروب العسل والليمون مع المية ممكن يكون في كتير مننا بياخدوا لما يجيلنا دور برد او انفلونزا بيكون من المشروبات المفيدة جدا اللي بتساعد على علاج البرد لكن المشروب ده ليه فوايد تانية صحية وهي اللي هنعرفها من خلال موضوعنا وهي تجربة حقيقة لواحدة من اشهر البلوجرز المتخصصة في الموضوعات الصحية قالت انها مشيت على المشروب ده لمدة سنة يوميا وكانت النتيجة الحاجات اللي هنعرفها النهاردة, بس اهم حاجة لما نمشي على النظام ده انه يكون العسل المستخدم نوع كويس واصلي وعصير الليمون يكون فريش.

– فوايد مشروب المية والعسل والليمون:

1- الحماية من البرد والانفلونزا وامراض المعدة:

بيساعد على الحماية من البرد والانفلونزا وامراض المعدة, يعني حتى لو حسيتي بأعراض برد بسيطة مش هتستمر معاكي وهتلاقيها راحت بسرعة, وبيحمي كمان من التهاب اللوز.

2- مش هتحتاجي تشربي قهوة وهتبقي نشيطة الصبح:

لو شربتيه كل يوم الصبح هيخلصك من الصداع, هيديكي طاقة زيادة الصبح وهيخليكي نشيطة خلال اليوم لفترة اطول, وكمان بيحسن المود جدا وبيخليكي هادية ومبسوطة طول اليوم.

3- بيحمي من عدوى المسالك البولية:

لو شربتيه كل يوم الصبح على الريق ده بيحفز الجهاز الهضمي وبيحسن وظايفة جدا, وبيرطب القولون وده بالتالي هيساعد على علاج الامساك المزمن, وكمان مدر للبول , وبيطهر المسالك البولية وبيحميها من الالتهاب.

4- تحسين الهضم:

كل مكون من مكونات المشروب ده بتساعد على علاج حاجة في الجسم, الليمون بيساعد الكبد على انتاج الصفرا اللي بتساعد على تكسير الاطعمة المعقدة بشكل احسن وبتخلي الجسم يستفيد من العناصر المهمة في الاكل بشكل اكبر, العسل مضاد للبكتيريا وده هيحميكي من اي التهاب وبيساعد كمان على انتاج المخاط في المعدة وده بالتالي بيساعد على طرد السموم من الجسم بشكل مستمر, وبيساعد كمان انك تحافظي على وزن صحي لجسمك.

5- بيخلي البشرة صحية ومنورة:

الليمون من الحاجات المعروف فوايده الهايلة جدا للبشرة, وفوايده مش بتقتصر بس على الماسكات لكن كمان شربه بيساعد على تنقية الدم وانتاج خلايا دم جديدة يعني يعتبر مادة لتنضيف الجسم, والمية والعسل بيتفاعلوا مع بعض وبيكونوا عامل مساعد مضاد للجراثيم وكمان بيزود من انتاج الكولاجين وبالتالي بيحافظ على قوة وصحة البشرة لان كلنا عارفين الكولاجين مهم قد ايه عشان البشرة تفضل صحية.

مشروب المية والعسل والليمون
مشروب المية والعسل والليمون

– هنعمل المشروب ازاي ؟

المشروب طريقته سهلة جدا, هغلي كوباية مية كبيرة ونسيبها تبرد شوية لكن بردو تبقى سخنة عشان العسل يدوب فيها كويس ونضيف لها عصير ½ ليمونة, ومعلقة صغيرة عسل نحل, واشربيه كل يوم الصبح اول ما تقومي من النوم, وممكن تتحكمي في كميات العسل والليمون حسب اللي بتفضليه اكتر يعني لو انتي بتحبي الطعم الحامض حطي نص الليمونة ولو مش بتحبيه اوي ممكن تقللي شوية من كمية الليمون وتزودي كمية العسل عشان تخلي الطعم احلى.

ياللا جربوه وقولوا لنا نتايجه معاكم :)