ازاى تعالجى شعرك لو فتحتى او غيرتى لونه فى الصيف

بما اننا بنودع الصيف و الحر اول حاجه هتلاحظيها انه شعرك باين شويه مجهد و جاف خصوصا لو كنتى بتقضى اوقات كتيرة على البحر او لو كنتى فتحتى شعرك او غيرتى لونه خصوصا إن فيه مننا اللي ممكن تغير لون شعرها أكتر من مرة كمان في الصيف. علشان كده فى الوقت ده من السنة مهم تعرفى ازاى تعالجى شعرك من التعب و الاجهاد اللى سببه الصيف، فى المقال ده بنات حوا هتقولك ازاى تعالجى شعرك بسهولة و بنفسك ..

ازاى تعالجى شعرك لو فتحتى او غيرتى لونه فى الصيف؟

1- عالجى شعرك : 

الشمس و مية البحر بيسببوا تكسير و اجهاد كبير لشعرك، لانهم بيسببوا الضعف لنسيج الشعر نفسه و بيسببوا له الخشونه و الجفاف و ده فى النهاية بيخلى الشعر متقصف و متكسر، بس متقلقيش الضرر ده ممكن تعالجيه تدريجيا بانك تستخدمى ماسك بروتين للشعر ، الماسك ده هيعالج الياف شعرك المجهدة و التكسير اللى فى شعرك. الماسك ده هيخلى شعرك يبقى رطب و يعالج شعرك بحيث انه شعرك يمتص الترطيب لوحده بعد كده، استخدمى ماسك شعر يكون غنى بالزيوت و الفوليك اسيد folic acid  علشان كمان يعزز من نمو شعرك و يمنع التكسير. افردى الماسك على شعرك و غطيه لمدة 30 لـ 45 دقيقة ، و بعد مرور الوقت اشطفى شعرك بمية فاترة .

لو حابه تجربى وصفة فى البيت ممكن تستخدمى زيت جوز الهند لكن يفضل تستخدمى زيت الافوكادو ، لان زيت الافوكادو بيقدر يتغلغل فى فروة الراس و نسيج الشعر و يغذىه يحمض الامينو و فيتامين E  من غير ما يخلى شعرك يبان مزيت او flat. و ممكن كمان تدهنى الاماكن الملتهبة فى فروة الراس بسبب الشمس بزيت الافوكادو هيضيع الالتهاب على طول . 

2- قصى اطراف شعرك :

بعد حرارة الصيف و مية البحر شعرك هيبقى محتاج تجديد ، قصى اطراف شعرك علشان بالحركة دى هتتخلصى من الاطراف المتقصفة و الطبقة السطحية  الضعيفة من الشعر و هتدى المجال لطبقة الشعر المرطبة الصحية انها تظهر. قص الاطراف زى تقشير البشرة بالضبط مهم علشان الخلايا تتجدد .

3-  احمى شعرك : 

حاجه مهمة لازم تاخدى بالك منها علشان تعرفى ازاى تعالجى شعرك هى انه استبدال الزيوت اللى بيفقدها شعرك او قص الاطراف المقصفة مش كفاية ، مهم كمان انك تحمى شعرك من اى ضرر ممكن يحصله قدام خصوصا لو بتكوى شعرك او بتستخدمى السيشوار يبقى مهم تستخدمى leave in conditioner ده نوع من البلسم ترطيبه بيدوم لفترة اطول من البلسم العادى و بيساعد فى منع تشابك الشعر و الهيشان و كمان جفاف و خشونة الشعر اللى ممكن تسببها حرارة المكواه او السيشوار مع الاستخدام المتكرر  . شوفى كمان ماسكات من العسل الاسود لترطيب الشعر بعمق وتنعيمه