8 حيل هتساعدك تكشفي بيهم الشخص الكذاب !
كلنا بنقابل نوعيات اشخاص كتير ومختلفة في حياتنا ومن النوعيات اللي كتير مننا بيصادفها هي الشخص الكذاب لكن في الغالب مش بنعرف نكتشفه بسهولة لان اللي بيكدب كتير وبيكون متعود عليه بيكون صعب كشفه, لكن معانا النهاردة مش هيكون صعب اننا نكتشف الشخص اللي بيكذب علينا, الخبير ومحلل لغة الجسد الدكتور “ليليان جلاس” بيقول اننا ممكن نكتشف الشخص الكذاب من خلال لغة الجسد وتعبيرات الوش وكتب كتاب عن الموضوع ده بشكل خاص سماه “لغة الجسد من الكذابون”, واحنا النهاردة جايبين لكم 8 حيل من الكتاب تقدروا تكشفوا بيهم الشخص الكذاب.
علامات هتساعدك على كشف الشخص الكذاب:
1- لف الراس:
من العلامات اللي ممكن تكشتفي عن طريقها الشخص اللي قدامك بيكدب ولا لا هي لف الراس, لو بتتكلمي مع حد او بتوجهي له سؤال بشكل مباشر ولقتيه لف راسه دي اشارة او علامة ان الشخص ده بيكدب في حاجة معينة.
2- الاكتاف – والنفس – والصوت :
لو الشخص اللي قدامك هيخدعك او هيكدب عليكي في حاجة, هتلاقي النفس بتاعه بقى تقيل وهو بيتكلم, وصوته بقى اهدى, ورفع كتافه الاتنين لفوق في الحالة دي يبقى بيكدب.
3- الوقوف ثابت:
لو بتتكلمي مع شخص عرفاه وتكون المحادثة عادية جدا بينكم ومافيهاش اي حاجة تخلي الشخص اللي قدام يتوتر ومع ذلك تحسي انه مضغوط ومتوتراو مش مرتاح في المحادثة دي علامة بتأكد ان الشخص بيكدب في حاجة وبالثبات دي بيحاول يأكدلك انه مافيش حاجة او يبعد تفكيرك انك ممكن تشكي فيه.
4- صعوبة التعبير عن افكارهم:
من العلامات اللي ممكن تبين لنا ان الشخص ده كداب انه بيلاقي صعوبة في التعبير عن افكاره وده بيحصل لانه هو مش بيحاول يقنع اللي قدامه بس بكلامه هو بيحاول يقنع نفسه كمان وبيكرر كلامه اكتر من مره لان التكرار بيديه وقت انه يستجمع افكاره اكتر, والشخص اللي بيكدب او مش بيقول الحقيقة لو سألتيه سؤال هيجاوب عليكي بنفس الكلمات اللي في سؤالك وباجابة مختصرة جدا عشان يحاول ميغلطش.
5- تواصل العين:
العيون ممكن تكشف حاجات كتير وتقدري تعرفي منهم الكلام اللي مبيتقالش عشان كده تعتبر علامة مهمة جدا تبين لك الشخص الكداب, لو الشخص اللي قدامك وهو بيكلمك باصص لعينيكي اوي وبيحاول يحافظ على تواصل العين بينكم بكل طريقة ممكنة دي علامة ان الشخص ده بيحاول يكدب عليكي او يخدعك.
6- عض الشفايف:
من الاشارات اللي ممكن تبين لنا ان الشخص اللي قدامنا بيحاول يكدب علينا هو عض الشفايف لو وانتي بتتكلمي معاه عمل الحركة دي معناه انه بيكدب وكمان ريقه هينشف وده هيسبب جفاف في الحلق وده هيخليهم يعضوا شفايفهم, وفي الحالة دي ركزي على ابتسامته لانه من السهل تكشفيه بيها لان هتلاحظي ان ابتسامتة مصطنعة.
7- الدفاع عن النفس باستمرار:
الايد هي مؤشر لصدق الشخص, فلو لقيتي الشخص اللي بتكلميه بيلمس رقبتة بايده باستمرار او بيحاول يداري نقط الضعف عنده, وكأنة بيحاول يدافع عن نفسه, في الحالة دي يبقى الشخص ده اكيد بيحاول يخفي حاجة.
8- لمس الشفايف:
لمس الشفايف تعتبر من العلامات اللي بتأكد كدب الشخص, لانه لما بيلمس شفايفه بايده كأنة بيحاول يمنع نفسه من الكلام عشان مش عايز يقول الحقيقة.