11 حيلة مدهشة للطبخ ميعرفهمش غير المحترفين !

ريهام محمود
ريهام محمود
15374

كلنا واحنا في المطبخ وبنجهز الاكل ممكن نقع في اخطاء كتير وبعد ما نعمله يطلع فيه مشكلة مالح او ني شوية او يطلع الطعم مش زي ما احنا متوقعينه وبنزعل جدا خصوصا لو مثلا عندنا عزومة اكيد مش هنقدم الاكل بالشكل ده لكن هل هنرميه ونعمل واحد غيره ؟ اكيد لا في حاجات كتير ليها حلول سهلة ممكن نعملها تصلح لنا المشاكل دي وده اللي هنعرفه النهاردة مع بعض.

حيل للطبخ ميعرفهمش غير المحترفين !

1- عشان تخلي اللحمة طرية:

كتير بيحصل معانا الموضوع ده بعد ما نشتري اللحمة ونطبخها نكتشف انها مش حلوة وبتشد ويتندغ في الاكل طيب هنعمل ايه لو طلعت معانا بالشكل ده ؟ في اكتر من حل.

  • – ممكن نجيب اللحمة ونحط عليها شرايح فاكهة زي التفاح او الاناناس او المانجا او الكمترى, نقطع الفاكهة ونقشرها ونحط فوق كل شريحة لحمة شريحة من الفاكهة ونسيبها على النار تستوي شوية معاها العصير اللي هينزل من الفاكهة دي هيطري اللحمة.

– في طريقة تانية نعملها قبل الطبخ عشان نضمن ان اللحمة هتطلع طرية بعد ما نطبخها وكمان هيبقى طعمها احلى, هنعمل خلطة عبارة عن بصل وتفاح مبشورين ونضيف عليهم شوية زيت زيتون ونتبلهم بالملح والفلفل وننقع اللحمة في الخليط ده من بالليل للصبح في التلاجة ده هيخلي اللحمة بعد ما تطبخيها طرية وليها نكهة حلوة اوي.

  • – استخدمي الكوكولا ؟ متستغربوش الكوكاكولا من الحاجات اللي ممكن تستخدميها عشان تخلي اللحمة طرية, انقعيها في الكوكاكولا لمدة 10 دقايق قبل ما تطبخيها وبعدين طلعيها وسيبيها تنشف شوية واطبخيها والطريقة دي مناسبة اوي مع شرايح اللحمة السميكة بتطريها وكمان بتديها طعم لذيذ.

– استخدمي الليمون, تبلي اللحمة في عصير الليمون وسيبيها فيه لمدة 30 دقيقة وبعدين اطبخيها, وممكن بدل الليمون تستخدمي الخل الابيض بس انقعيها فيه من بالليل لحد الصبح في التلاجة.

عشان تخلي اللحمة طرية
عشان تخلي اللحمة طرية

2- الملح الزيادة في الشوربة:

مشكلة الملح الزيادة في الاكل كمان من المشاكل اللي بتقابلنا كتير, هنقولكم على اسرار من كبار الطباخين ازاي بيعالجوا المشكلة دي ؟

  • – من اسهل الطرق انك تزودي الشوربة مية وتسيبيها كام دقيقة تغلي على النار عشان تخففي من الملوحة, ولكن الطريقة دي مش افضلهم لانها ممكن تضيع طعم ونكهة الشوربة.

– لو عندك شوربة باقية من قبل كده وتكون مش مالحة ممكن تضيفي لها شوية شوربة ده هيظبط الطعم ومش هيضيع النكهة في نفس الوقت.

  • – لو الطرق اللي فاتت منفعتش معاكي ممكن تجربي طريقة الارز, جيبي حتة شاش حطي فيها شوية رز وحطيها مع الشوربة شوية وبعدين طلعيها, الارز يعتبر وسيلة فعالة لامتصاص الملح الزايد في الاكل.

– في بعض الطباخين بيعالجوا زيادة الملوحة بالسكر حطي معلقة سكر في الشوربة واستني لما تدوب ودوقيها لو لقتيها لسه مالحة حطي معلقة كمان لحد ما تلاقي الطعم اتظبط, لان السكر هيوازن الطعم.

  • – البطاطس والمكرونة من الاكلات اللي ليها قدرة على امتصاص الملح, ممكن تحطي شوية مكرونة في الشوربة تمتص الملح وفي نفس الوقت هتبقى اضافة ليها, او تجيبي بطاطس تقشريها وتقطعيها مكعبات كبيرة وتحطيها في الشوربة وتسيبيها تغلي معاها لمدة من 10 – 15 دقيقة وبعدين تشيليها من الشوربة, البطاطس هتمتص الملح الزيادة ومش هتبوظ طعم ونكهة الشوربة.
  • الملح الزيادة في الشوربة
    الملح الزيادة في الشوربة

3- طعم وريحة البصل:

 البصل من الحاجات اللي تقريبا بنستخدمها في معظم الاكلات لكن في كتير مش بيحبوا الطعم اللذع للبصل وريحة النفاذة, لكن في نفس الوقت صعب اننا نستغنى عن البصل في الاكل لانه بيديه نكهة, لحسن الحظ ان في طريقة سهلة تخلي البصل طعمة احلى وفي نفس الوقت من غير ريحة نفاذة او طعم لاذع اوي, هنقطع البصل شرايح او زي ما انتي حابة تقطعيه وننقعه شوية في مية سقعة او فيها تلج قبل ما نستخدمه في الاكل, الطريقة دي هتخليكي تتخلصي من الطعم اللاذع والريحة النفاذة بتاعته.

طعم وريحة البصل
طعم وريحة البصل

4- الملح الزيادة في اللحمة:

لو لقيتي اللحمة بعد ما طبختيها مالحة ممكن تضيفي لها كريمة الطبخ “Sour Cream” عشان توازن الطعم, وممكن تضيفي لها صوص الدقيق وهو عبارة عن “دقيق, ومية, وكريمة طبخ, اخلطيهم وضيفيهم للحمة” او ممكن تحطي جنب طبق اللحمة مقبلات او سلطات مش مملحة عشان توازني الطعم, لو اللحمة كانت مفرومة ولقتيها ملحت منك ممكن تضيفي لها كوسة, او كرنب, او بطاطس, ابشريهم وحطيهم مع اللحمة هتمتص الملح منها وكمان هتخلي اللحمة اطرى وجوسي اوي وهتديها نكهة حلوة.

الملح الزيادة في اللحمة
الملح الزيادة في اللحمة

5- الملح الزيادة في الخضار:

لو الخضار فيه ملح زيادة ممكن تضيفي له طماطم قطعيها قطع صغيرة وخليها تتطبخ مع الخضار شوية, او ممكن تصبي عليه مية مغلية وتسيبيه يغلي شوية, لو عاملة مشروم وفيه ملح زيادة ممكن تضيفي عليه اي نوع صوص مش مملح, او كريمة طبخ.

الملح الزيادة في الخضار
الملح الزيادة في الخضار

6- اللحمة او الاكل المحروق:

المشكلة اللي في كتير بيقعوا فيها وهي اننا ننسى الاكل على النار ويتحرق, لو اللحمة اتحرقت منك اقطعي الطبقة المحروقة اللي فوق بالسكينة وحطي عليها شوية مية او زيت او شوربة وخليها تغلي على نار هادية, وعشان تخلي ريحة الشياط اللي فيها يروح انقليها في طبق تاني وغطيها بحتة قماش مبلولة هتمتص الريحة منها, وفي طريقة تانية انك تضيفي شوية لبن سخن لاي حاجة اتحرقت منك.

اللحمة او الاكل المحروق
اللحمة او الاكل المحروق

7- حافظي على حرارة الاكل:

لو عندك عزومة في البيت وعايزة تحطي الاكل بتاعك في الاطباق وتجهزي السفرة للضيوف بس عايزة تحافظي على حرارة الاكل سواء البارد او السخن, بطريقة سهلة جدا بالنسبة للاكل السخن حطي الاطباق اللي هتغرفي فيها الاكل في الفرن لمدة 5 دقايق قبل ما تحطي فيهم الاكل ده هيحفظ لك الاكل سخن اطول فترة, ولو هتقدمي اصناف باردة حطي الاطباق بتاعتها في التلاجة شوية قبل ما تحطي فيها الاكل.

حافظي على حرارة الاكل
حافظي على حرارة الاكل

8- الدهون في الشوربة:

لو عندك شوربة فيها كمية دهون كتير وعايزة تتخلصي منها حطي الشوربة في التلاجة وسيبيها لحد ما تسقع هتلاقي الدهون عملت طبقة صلبة على وش الشوربة هتقدري تشيليها بالمعلقة بكل سهولة وكده تبقي اتخلصتي من الدهون الزيادة.

الدهون في الشوربة
الدهون في الشوربة

9- البان كيك:

لو دايما بتقابلك مشكلة لما تيجي تعملي البان كيك بيلزق منك في الطاسة وبيتقطع, ده ليه اكتر من سبب ممكن تكون العجينة طرية اوي وفي الحالة دي ضيفي لها شوية دقيق, لو الدقيق نوعيته مش حلوة ممكن تضيفي له شوية دقيق سميد “سيمولينا”, ومهم اوي عشان البان كيك يطلع مظبوط معاكي سخني الطاسة كويس مع الزيت وبعدين حطي الخليط في الطاسة.

البان كيك
البان كيك

10- الكسترد الخفيف:

لو عاملة كستر وطلع خفيف معاكي, ممكن تضيفي له شوية دقيق واخلطيه معاه كويس, لو لسه خفيف ممكن تحطي على النار شوية كمان عشان يتقل, او بعد ما تعمليه حطيه في التلاجة هيزود سمكه.

الكسترد الخفيف
الكسترد الخفيف

11- الخضار المجمد:

لو عندك خضار مجمد وعايزة تطلعيه تطبخيه طلعيه قبل الطبخ على طول لانك لو خلتيه بره كذا يوم يفك في درجة حرارة الغرفة ده ممكن يغير طعمه ويخليه مش حلو, ممكن تطلعيه وتحطيه في طبق فيها مية سخنة عشان يفك بسرعة.

الخضار المجمد
الخضار المجمد

اعرفي كمان 9 غلطات بنعملهم في المطبخ !

9 غلطات بنعملهم في المطبخ
9 غلطات بنعملهم في المطبخ

مقالات متعلقه

15 غلطة في الطبخ ممكن تبوظلك الاكل..اعرفيهم معانا وتجنبيهم

15 غلطة في الطبخ ممكن تبوظلك الاكل..اعرفيهم معانا وتجنبيهم

اسرار الطبخ من اشهر البلوجرز المتخصصين في الاكل

اسرار الطبخ من اشهر البلوجرز المتخصصين في الاكل

21 حيلة هتسهل حياتك في المطبخ مكنتيش تعرفيهم قبل كده

21 حيلة هتسهل حياتك في المطبخ مكنتيش تعرفيهم قبل كده