7 اسرار جمالية من الهند هتخلي شعرك يطول بسرعة

بقلمريهام محمود فيشعر visibility38367

الشعر الطويل والصحي هو حلم كل البنات لكن المشكلة مش بنعرف ازاي نخلي شعرنا يطول بسرعة ومياخدش وقت كبير على ما نوصل للنتيجة اللي احنا عايزينها, احنا النهاردة جايبين لكل بنات حوا 7 اسرار جمالية من سوشميتا وهي تعتبر رقم واحد في الهند من المتخصصين في العناية بالشعر وواحدة من اشهر البلوجرز الهنديات, هنعرف منها اسرار لتطويل الشعر بسرعة وزيادة نموه وتنعيمه.

7 اسرار جمالية لتطويل الشعر بسرعة:

1- استخدمي جل الالوفيرا:

من اول الاسرار اللي هنعرفها النهاردة هي استخدام جل الالوفيرا يعتبر من الحاجات المفيدة جدا للشعر لانه بيساعد على تحفيز نمو الشعر, هنجيب ورقة الصبار ونفتحها ونطلع منها الجل هندلك بيه فروة الراس والشعر كله في حركات دائرية عشان ننشط ونحسن الدورة الدموية وتضمني ان فروة راسك امتصت الجل كويس, سيبيه على شعرك لمدة ساعتين على الاقل ولو تقدري تنامي بيه وتغسليه الصبح هيجيب نتيجة احسن. ممكن تكرري الماسك مرة في الاسبوع.

استخدمي جل الالوفيرا
استخدمي جل الالوفيرا

2- استخدمي البانثينول:

البانثينول من الحاجات اللي بتساعد جدا على منع تساقط الشعر وبيجدد بصيلات الشعر لانه بيحتوي على فيتامين B5 , اغسلي شعرك بالطريقة العادية وبعدين حطي عليه لوسيون البانثينول من الجذور للاطراف وندلكه كويس في الشعر, وهنلاقي البانثينول في الصيدلية متوفر منه سبراي او لوسيون او امبولات, السبراي او اللوسيون نستخدمة مرتين في اليوم مرة الصبح ومرة بالليل, وبالنسبة للامبولات ممكن نستخدمها بعد كل مرة نغسل فيها شعرنا.

استخدمي البانثينول
استخدمي البانثينول

3- شطف فروة الراس بمية باردة:

بعد ما نغسل شعرنا كل مرة بالمية الدافية والشامبو بالطريقة العادية نشطف الشعر شطفة اخيرة بالمية الباردة لانها بتساعد على قفل مسام فروة الراس وبيحسن الدورة الدموية, وده بيساعد على نمو الشعر بشكل اسرع, وخلي الخطوة دي عادة عندك في كل مرة تغسلي فيها شعرك هتحسي بالفرق وهتشوفي تغيير ملحوظ على الشعر وانه بقى صحي وبيلمع اكتر.

شطف فروة الراس بمية باردة
شطف فروة الراس بمية باردة

4- اغسلي شعرك بخل التفاح:

خل التفاح بيساعد على تنشيط بصيلات الشعر, اغسلي شعرك بالشامبو وبعدين استخدمي خل التفاح كبديل للبلسم وبعد ما تحطيه متغسليش شعرك بالمية سيبي الخل عليه وبالنسبة للريحة هتخف من الشعر بعد ما ينشف, وممكن نكرر الطريقة دي كام مرة في الشهر يعني ممكن مرتين او تلاتة خلال الشهر هتكون كافية اوي.

اغسلي شعرك بخل التفاح
اغسلي شعرك بخل التفاح

5- عالجي الشعر بقناع البروتين:

الماسك ده بيعالج نقص البروتين في الشعر وبيرجعه حيوي وبيساعد على نموه ومنع تساقطه, هنجيب بيضتين نسيبهم بره التلاجة شوية لحد ما يبقوا زي درجة حرارة الغرفة, هنفصل الصفار والبياض وناخد البياض بس نضربه بالمضرب السلك لحد ما يبقى لونه ابيض وعامل زي الرغوة هنحطه على جذور الشعر ونغطيه بكيس بلاستيك ونسخن فوطة في حمام مية سخنة ونلفها فوق الكيس عشان يدينا تأثير اقوى ونسيبه من ساعة لساعتين وبعدين نغسل الشعر, وممكن نكرر الوصفة دي مرتين في الشهر او مرة على حسب احتياج الشعر.

عالجي الشعر بقناع البروتين
عالجي الشعر بقناع البروتين

6- جربي ماسك البيض والعنب:

البيض من الحاجات الغنية جدا بالبروتين اللي بيساعد على نمو الشعر والعنب بيساعد على تكثيف الشعر وبيخليه اتقل وبيحفز نموه, هنجيب بيضتين ونضيف عليهم كوباية عصير عنب او ممكن نستخدم خل العنب بس هنضيف منه نص كوباية بس ونضرب المكونات مع بعض كويس بالشوكة او في الخلاط وممكن نضيف لهم شوية زيت زيتون وده اختياري, هنحط الخليط على الشعر من الجذور للاطراف ونغطي الشعر بكيس بلاستيك ونسيبه من ساعة لساعتين وبعدين نغسله, الماسك ده بس مش بيطول الشعر كمان بينعمه.

جربي ماسك البيض والعنب
جربي ماسك البيض والعنب

7- استخدمي الزيوت العطرية:

زيت الجوجوبا, واللوز, واللافندر, والروز ماري او اكليل الجبل, والزعتر كل الزيوت دي ليها تأثير قوي ومفيد جدا على بصيلات الشعر لانها بتوفر للشعر مجموعة كبيرة من الفيتامينات والمكونات المفيدة, هنخلط الزيوت دي كلها مع بعض بكميات متساوية وممكن نضيف لهم كمان زيت جوز هند نمزجهم كويس مع بعض ونحط الخليط على الشعر ونغطيه بكيس بلاستيك ونسيبه من 2- 3 ساعات وبعدين نغسله بالمية والشامبو.

استخدمي الزيوت العطرية
استخدمي الزيوت العطرية

شوفي كمان 4 وصفات عشان شعر طويل وصحي

شعر طويل وصحي