إزاي تلبسي السويتر دريس بطرق شيك ومختلفة
السويتر دريس فى الفترة دى من السنة لما بيكون الجو ساقع بس على خفيف كده بيعتبر من انسب قطع الملابس اللي ممكن تعتمدى عليها فى اللوك بتاعك و خروجاتك ، لانه مش بس مناسب للجو لكن كمان شيك و عملى و اكبر ميزة فى السويتر دريس هى انك ممكن تلبسيه بأى ستايل تحبيه و فى اى وقت سواء الصبح او بالليل ، فى الشغل او فى خروجة مع اصحابك . و كمان بيتوفر فى خامات كتيرة جدا زى الصوف ، التريكو و كمان الاقمشة الخريفى الخفيفة بألوان و نقشات مختلفة ، ولو بتحبيه سادة هتلاقيه، فى المقال ده هنقولك إزاي تلبسي السويتر دريس بطرق شيك ومختلفة ..
إزاي تلبسي السويتر دريس بطرق شيك ومختلفة
اهم حاجه تاخدى بالك منها وانتى بتشترى السويتر دريس هى انك تحطى راحتك فى الاهتمام الاول ، يعنى تختارى خامة تكون مناسبة للجو و مش تقيلة اوى لو الجو لسه مش ساقعه، و كمان لازم تختارى تفصيلة تكون مناسبة لطبيعة جسمك و تكون مناسبة علشان لو حبيتى تلبسيها فى الشتا او الخريف الجاى، و اختارى الخامة اللى بتحبيها و تريحك اكتر من بين الخامات الكتيرة اللى بيتوفر فيها زى القطن ، البوليستر ، الموهير ، الفسكوز ، و الصوف . و لو بشرتك حساسة يبقى حاولى تبعدى عن الموهير و الصوف لانهم ممكن يسببوا حساسية او حكة لجسمك .
جربى سويتر دريس بكولة او رقبة واسعه :
الكولة او الرقبة الواسعه بتعتبر موضة مشهورة فى فصل الشتا ، بس لو رقبتك قصيرة يبقى حاولى تبعدى عنها ، لو انتى رقبتك طويلة جربى تلبسي سويتر دريس برقبة واسعه علشان يبرز طولك و يبينك رفيعة و يديكى لوك اليجانت .
البسي سويتر دريس مع حزام :
لو وسطك صغير و عايزة تبرزيه جربى تلبسي سويتر دريس مع حزام متوسط العرض، الحزام هيبين وسطك و يدى شكل حلو للوك بتاعك .
كملى اللوك بتاعك بشوز مناسب :
اختارى الشوز المناسب ليكى حسب المناسبة اللى هتلبسي فيها سويتر دريس ، ممكن تلبسي بالرينة لو خارجة مع صحباتك و عايزة تعملى لوك كاجوال ، و شوز بكعب عالى للمكتب او الشغل ، وممكن كمان تلبسي بوت برقبة طويلة على سويت دريس قصير ، او بوت برقبة صغير لو لابسه سويتر دريس طويل علشان تدى شكل اليجانت اكتر للوك بتاعك ، البوت السنة دى تريندى جدا و بيكملوا اللوك بتاعك و يحسنوه بشكل كبير، شوفى ستايلات مختلفة للبوت القطيفة و ازاى تدخليه فى لبسك ، وشوفى معانا البوم كامل لافكار مختلفة و شيك للسويتر دريس sweater dress ..