7 افكار مكياج هيخلوكي تطلعي بلوك رائع
دايما كلنا بندور على لوك مكياج يطلعنا بشكل حلو وفي نفس الوقت يداري اي عيوب في البشرة, واحنا النهاردة جمعنا لكم 7 افكار مكياج مختلفة ومنوعة اوي وهتطلعك بلوك رائع ممكن تختاروا منها اللي يناسبكم اكتر واللوك في منها اللي يليق على البشرة البيضا والسمرا والخمرية.
7 افكار مكياج هيخلوكي تطلعي بلوك رائع:
1- روج احمر وايلاينر اسود:
اللوك ده بيسموه مكياج هوليوودي لانه هنلاقي دايما الموديلز في عروض الازياء العالمية وفنانات هوليوود بيعملوا اللوك ده اللي هو مزيج بين الروج الاحمر والايلاينر الاسود, ونحط كريم الاساس المناسب لدرجة بشرتنا وبلاشر بلون طبيعي خفيف على عضمتين الخد.
2- عيون سموكي وشفايف نيود:
زي ما دايما بنقول مع مكياج العيون السموكي الافضل ان الشفايف تبقى نيود عشان تظهري العين اكتر واللوك يطلع احلى وفي اللوك ده استخدمت النيود الدهبي للشفايف مع العيون السموكي والبلاشر بلون نيود, وممكن نحط هايلايتر فوق عضمة الخدين وعند نص الانف, واللوك ده مناسب جدا بالليل.
3- بشرة بروسلين وروج غامق:
في اللوك ده هيكون التركيز على الشفايف ولون البشرة, هنستخدم كريم اساس يدي لوك نحاسي او تان شوية للبشرة ومعاه روج بلون غامق زي النبيتي, البورجندي, البني, او البنفسجي الغامق, ومش هتحتاجي تحطي مكياج كتير على العيون ممكن تحطي تاتش ايشادو بلون رمادي.
4- ايشادو بني مع روج خوخي:
الميزة في اللوك ده انك ممكن تحطيه الصبح في الشغل او تحطيه لحفلة, بس نخلي بالنا منزودش اوي في اللون البني للايشادو عشان العين متطلعش دبلانة او شكلها تعبان, وفي نفس الوقت الروج الخوخي هيوازن اللوك مع اللون البني فوق العين ويديه حياة ويظهره.
5- روج نبيتي مع ايشادو برونزي:
اللوك ده مميز وايليجانت اوي استخدمت فيه روج باللون النبيتي مع ايشادو دهبي برونزي رسمته من فوق على الجفن كله وعلى خط الرموش اللي تحت, واستخدمت هايلايتر فوق عضمة الخدين, ونص الانف, ونص الجبهة, وفي نص المنطقة اللي فوق الشفة اللي فوق.
6- ايشادو بنفسجي او ازرق مع روج بينك:
في كتير مش بيحبوا تركيبة لون الروج البينك مع الايشادو البنفسجي لكن هو بيطلع حلو جدا لو ركبناهم مع بعض بطريقة صح يعني نستخدم الروج البينك مع ايشادو بنفسجي فيه لمعة مش مات هيدي لوك حلو وجذاب اوي.
7- روج مرجاني مع ايشادو شامبين:
اللوك ده خفيف وطبيعي جدا ومناسب اوي للبشرة السمرا بشكل خاص, هنستخدم فيه روج باللون المرجاني او اللون البيج الفاتح او نكتفي بس بالليب جلوس او ملمع الشفايف, وهنحط ايشادو باللون شامبين بيلمع.
شوفي كمان افضل 9 افكار لعمل مكياج طبيعي مثالي
