افضل الاوقات في اليوم اللي تاكلي فيها اكلك المفضل !

ريهام محمود

في

1618

كلنا عارفين ان الاكل له تأثير كبير على صحتنا واي حاجة بناكلها بتأثر علينا سواء بشكل سلبي او ايجابي, لكن اللي في كتير مننا اكيد ميعرفهوش انه توقيت الاكل كمان مهم جدا, مؤخرا الدراسات اثبتت ان اكل بعض الاكلات في الاوقات المناسبة خلال اليوم ده بيخلينا نستفاد منها بشكل اكبر وهتخليكي تحصلي على كل الفوايد الصحية منها, واحنا النهاردة من خلال المقال بتاعنا جايبين لكم بعض الاكلات دي وتوقيتها المناسب اللي ناكلها فيه عشان جسمنا يستفاد منها لاقصى حد وبشكل صح, وكمان ايه الاوقات اللي متكليهاش فيها.

تعالوا نعرف مع بعض افضل الاوقات لأكلك المفضل:

1- الشوكولاتة الغامقة Dark Chocolate:

– افضل وقت : الفطار:

ممكن تاكلي كام قطعة شوكولاتة في وجبة الفطار الصبح لانها في التوقيت ده هتوفر لجسمك المواد المضادة للاكسدة اللي بتساعد في الحماية من الشيخوخة, وكمان مفيدة جدا للقلب.

– اسوأ وقت : تاكليها سناكس:

اسوأ وقت انك تاكلي الشوكولاتة انك تاكليها بين الوجبات كسناكس لان لو زودتي كمية الشوكولاتة عن 25 جرام خلال اليوم جسمك هيبدأ جسمك يحول الكمية الزيادة لرواسب دهون في الجسم وبالتالي ده هيتسبب في زيادة الوزن.

2- اللحمة:

– افضل وقت : الغدا:

اللحمة تعتبر مصدر هايل للحديد, وبتوفر الاكسجين لخلايا واجهزة الجسم وده بدوره بيقلل من الشعور بالتعب, وبيقلل التعرض للأمراض بشكل عام.

– اسوأ وقت : العشا:

المفروض اننا نبعد عن اكل اللحوم في وجبة العشا لان اللحمة بتاخد تقريبا 5 ساعات عشان تتهضم كويس, ولما تاكليها قبل وقت النوم على طول وبعدين تروحي تنامي ده ممكن يسبب ضرر للجهاز الهضمي.

3- المكسرات:

– افضل وقت : الغدا:

ممكن تاكلي مكسرات في وقت الغدا كمية بمليء كف الايد يعني تقريبا 30 جرام, ده هيمد الجسم بعنصر الاوميجا3 والاحماض الدهنية, وده بيحافظ على الاوعية الدموية مستقرة وبتشتغل بشكل صحيح, وبيحافظ على ضغط الدم منتظم,وليها فوايد كمان في تنظيم وظيفة الرئة.

– اسوأ وقت : العشا:

المكسرات غنية بالدهون والسعرات الحرارية عشان كده اكلها في وجبة العشا قبل النوم ممكن يسبب في زيادة في الوزن.

4- البرتقان:

– افضل وقت : تاكليه كسناكس:

افضل وقت انك تاكلي فيه البرتقان انك تاكلية كسناكس يعني بين الوجبات لانه في التوقيت ده هيحسن وظايف وعمل الجهاز الهضمي, ويعتبر منشط عام للجسم, وبيعزز من عملية التمثيل الغذائي.

– اسوأ وقت : الفطار:

اكل البرتقان على معدة فاضية بعد ما نصحى من النوم على طول ممكن يسبب حساسية وتهيج المعدة, وده ممكن يزود خطر الاصابة بالتهاب المعدة.

5- المكرونة:

– افضل وقت : الفطار والغدا:

دقيق السيمولينا اللي بتتعمل منه المكرونة غني جدا بالالياف اللي بتساعد على تنضيف الجسم وطرد السموم منه, وكمان ليها فايدة مهمة اوي انها بتساعد على خفض مؤشر نسبة السكر في الدم وده بيقلل من خطر الاصابة بمرض السكر من النوع التاني.

– اسوأ وقت : العشا:

المكرونة فيها نسبة عالية من السعرات الحرارية ولما هتتاكل في العشا وقبل النوم هتسبب زيادة في الوزن, والافضل اننا ناكل في العشا الاكلات الغنية بالعناصر الغذائية وفيها سعرات حرارية منخفضة.

6- الكوسة:

– افضل وقت : العشا:

الكوسة تعتبر مصدر غني جدا بالالياف ودي بيساعد على تنضيف الامعاء حتى لو كنتي واكلة في وجبة الغدا اكل دسم او كتير.

– اسوأ وقت : الفطار:

جسمنا الصبح بيعاني من نقص في المية والكوسة ليها تأثير مدر للبول كبير جدا وبالتالي لما ناكلها في التوقيت ده ممكن تسبب جفاف الجسم.

7- الطماطم:

– افضل وقت : الفطار:

الطماطم بتحتوي على احماض عضوية بتسهل عملية الهضم, وبتنظم وظايف المعدة والبنكرياس, عشان كده انسب وقا لاكلها هو في وجبة الفطار عشان تهيء معدتنا لليوم كله.

– اسوأ وقت : العشا:

الطماطم بتحتوي على كمية كبيرة من حمض الاكساليك وده ممكن يكون ليه تأثير سلبي على الاملاح في الجسم ولما تاكلي الطماطم في وجبة العشا قبل ما تنامي ممكن ده يسبب تورم او انتفاخ في الجسم.

8- البطاطس:

– افضل وقت : الفطار:

نشا البطاطس بتساعد على خفض الكوليسترول في الدم, وكمان غنية جدا بالمعادن اللي بيحتاجها الجسم.

– اسوأ وقت : الغدا والعشا:

البطاطس فيها نسبة سعرات حرارية من 2- 3 مرات اكتر من اي نوع خضار تاني, عشان كده حاولي متاكليش كمية كبيرة منها في العشا لانها ممكن تسبب زيادة في الوزن.

9- الموز:

– افضل وقت : الغدا:

الموز غني جدا بالالياف المفيدة جدا في تحسين عملية الهضم, وبتعالج حرقان المعدة ساعات بيحصل بعد الاكل بنحس بحرقان بفم المعدة وان معدتنا مش مرتاحة الموز بيساعد جدا في علاج الحرقان ده لو اكلتيه بوقت الغدا.

– اسوأ وقت : العشا:

اكل الموز في وقت العشا ممكن يعطل عملية الجهاز الهضمي وهنا التوقيت زي ما قولنا بيفرق زي ما قولنا انه الموز بيسهل عملية الهضم لو اكلناه وقت الغدا وعلى العكس لو اكلناه وقت العشا ممكن يعطل وظايف الجهاز الهضمي وممكن يتسبب في انتاج المخاط او البلغم.

10- التفاح:

– افضل وقت : الفطار:

قشر التفاح موجود فيه مادة اسمها البكتين والمادة دي بتحسن الامعاء وبتخليها تشتغل بشكل سليم, وبتزيل المواد اللي ممكن تسبب السرطان من الجسم.

– اسوأ وقت : العشا:

التفاح ممكن يزود الحموضة في المعدة وده هيخليكي تحسي ان معدتك مش مرتاحة, وكمان البكيتن اللي في قشر التفاح صعب هضمه وبياخد وقت على ما يتهضم وخصوصا في فترة بالليل.

11- الجبنة:

– افضل وقت : الفطار:

الجبنة لو اكلتيها بكميات معتدلة او مناسبة بتمنع الانتفاخ وزيادة الوزن.

– اسوأ وقت : العشا:

الجبنة بتاخد وقت كبير على ما تتهضم ولو اكلتيها بالليل على العشا ده ممكن يسبب عسر هضم.

12- السكر:

– افضل وقت : الفطار:

السكر كلنا عارفين انه بيزود الوزن لان فيه سعرات حرارية عالية وعشان ميسببش زيادة في الوزن لازم يبقى في فرصة انك تحرقيه عشان كده انسب وقت لاكل اي حاجة فيها نسبة سكر عالية انك تاكليها على الفطار عشان تقدري تحرقيه بسهولة خلال اليوم

– اسوأ وقت : العشا:

طبعا اول حاجة ممكن تسببها الاكلات اللي فيها نسبة سكر عالية لو اكلناها بالليل او وقت العشا هو زيادة الوزن, لكن غير كده كمان ممكن تسبب تهيج في الجهاز الهضمي, وزيادة اضطرابات النوم او الارق.

13- الارز:

– افضل وقت : الغدا:

الارز فيه نسبة عالية من الكربوهيدرات وده بيساعد انه يحافظ على نشاط وطاقة الجسم باقي اليوم.

– اسوأ وقت : العشا:

الارز لانه زي ما قولنا غني بالكربوهيدرات اللي هي النشويات ودي لما بتدخل الجسم بتتحول لسكريات وبالتالي لو اكلتيه في العشا وقبل النوم ممكن يتسبب في زيادة الوزن.