ايه هو دايت الزبادى و ازاى تعمليه و ايه هى فوايده
دايت الزبادى هو نوع جديد من الدايت منتشر دلوقتى ، فعال و نتايجه مضمونة و تقريبا مابيسببش اى ارهاق او تعب ليكى لانه الزبادى ليه فوايد كتيرة للصحة و الجمال ، فى المقال ده هتعرفى كل حاجه محتاجاها عن دايت الزبادى ، ايه هى فوايده و ازاى تعمليه و ايه هى كمية الزبادى اللى محتاجه تاكليها كل يوم .
خطوات وطريقة دايت الزبادى!
نظام التخسيس ده اخترعه دكتور المانى و اتطبق لاول مرة فى التلاتينات , و الاشخاص اللى نفذوا الدايت ده خسروا حوالى من 5 لـ 6 كيلو فى 10 ايام ! الدايت ده مبنى على منتج طبيعى تماما و هو الزبادى و كل اللى جربوه قالوا انه مش بس بيجيب نتيجة ممتازة و لكن كمان الزبادى طعمه حلو و فوايده كتيرة .
فى الدايت ده هتحتاجى كل يوم :
حوالى 500 جرام من الزبادى كل يوم و هتقسميهم على 4 او 5 وجبات .
400 جرام من الفاكهه ، و ممكن تعملى سلطة فاكهه كوجبة و تستخدمى معاها الزبادى على الوش و ابعدى عن الفاكهه الغنية بالسكر زى العنب ، البطيخ و حاولى تستخدمى بدالها التفاح .
و فى العشاء مع الزبادى ، ضيفى لوجبتك 100 جرام من اللحم خالى الدسم ” من غير دهون ” و سلطة من الطماطم ، الخيار، و الخضار .
اشربى الشاى الاحمر و الاخضر ، و يفضل المية تكون معدنية و اشربى على الاقل لتر و نص من السوايل كل يوم طول مدة الدايت ، و ممكن كمان تشربى عصير فريش بين الوجبات و خصوصا عصير الجريب فروت ، التفاح ، و البرتقال . لان الفاكهه المعصورة فريش بتعتبر صحية و غنية بالفيتامينات بس برده متكتريش لانها غنية بالسعرات الحرارية ، وممكن تستليه بالعصير المعلب الخالى من السكر و الخالى من المواد الحافظة ، و عصير الرمان بينصح بيه بعد كل وجبة فى الدايت ده ، بس خفيه بشوية مية .
و جبات اليوم فى دايت الزبادى :
الفطار :
نص كباية من الشاى الدافى من غر سكر قبل الفطار ، و يفضل تشربى شاى قبل كل وجبة .
كمية مناسبة من الزبادى معاه توت او فاكهه مجففة .
نص كوباية من عصير الرمان المخفف بالمية .
الغداء :
كوباية شاى دافى .
شوربة من الزبادى مع خيار و خضروات و زيت الزيتون ..
100 جرام من اللحمه المسلوقة ، سلطة خضرا مع خيار و طماطم و ليمون .
نص كوباية من عصير الرمان المخفف بالمية .
وجبة خفيفة snack :
كمية من الزبادى بالفاكهه و مية معدنية .
العشاء :
كوباية من الشاى الدافى .
زبادى مع خضار مسلوق.
كوباية من عصير الرمان المخفف بالمية .
امشى على الدايت ده حوالى اسبوعين و بعدين وقفيه من شهرين لـ 3 شهور و ارجعيله تانى هتحسي بخسارة كبيرة فى الوزن الزايد و الدهون .
