11 علامة مهمة هتنبهك انك مش بتشربي مية كفاية !

المية من اكتر الحاجات المفيدة للبشرة والشعر والصحة بشكل عام ورغم انها بسيطة ومتوفرة بسهولة عندنا كلنا لكن كتير مننا مش بيشرب كمية مية كفاية يوميا, وقلة شرب المية يوميا ده بيأثر على صحة البشرة والجسم بشكل عام, طيب ازاي نعرف اننا مش بنشرب كمية مية كفاية ؟ ده اللي هنقوله النهاردة لكل بنات حوا من خلال موضوعنا هنعرف ايه العلامات اللي ممكن تنبهنا اننا مش بنشرب كمية مية كفاية يوميا.

تعالوا نعرف علامات نقص المية في الجسم:

1- جفاف الفم:

من اول العلامات اللي ممكن تظهر من قلة شرب المية هي جفاف الفم, واحيانا لما بنحس الاحساس ده بنشرب حاجات فيها سكريات لكن ده بيعتبر حل مؤقت للمشكلة, لكن كمية صغيرة بس من المية بترطب الفم والحلق لفترة طويلة.

2- جفاف البشرة:

جفاف البشرة من اكتر العلامات اللي ممكن تنبهنا اننا مش بنشرب مية كفاية, وجفاف الجلد ممكن يأدي لمشاكل اكبر بكتير لان ده معناه انه مش هيبقى في عرق كتير بيخرج من الجسم وده بيخلي الجسم ميطردش السموم والزيوت اللي بتتراكم داخل الجسم على مدار اليوم, ولو عايزة تتجنبي المشاكل دي يبقى لازم تشربي مية بكمية كفاية خلال اليوم.

3- جفاف اللسان

قلة شرب المية هيخلي اللسان جاف جدا وخصوصا الصبح اول ما تصحي من النوم هتحسي انك بقالك فترة كبيرة اوي مشربتيش مية او كأنك كنتي ماشية في جو حر اوي وريقك ناشف جدا وده من اكتر العلامات الواضحة جدا لقلة شرب المية.

4- جفاف العين:

قلة شرب المية مش بيأثر على الفم والبشرة بس لكن ممكن يأثر كمان على العين ويسبب جفافها واحمرارها, لان القنوات الدمعية في العين بتجف لان مش بيبقى فيها كمية مية كفاية, وده ممكن يسبب اضرار كتير للعين.

5- آلام المفاصل:

الغضروف والعمود الفقري بيتكون تقريبا من المية بنسبة 80% وبالتالي نقص المية هيسبب آلام في المفاصل والعمود الفقري, عشان كده اول خطوة عشان نحافظ على عضمنا صحي وسليم اننا نحافظ على رطوبة الجسم ونشرب كمية مية كفاية, واتأكدي انك لو جسمك وصلته كمية المية اللي لزماه ان ده هيخلي العضم اقوى ويتحمل اكتر الصدمات والخبطات والوقعات اللي ممكن نتعرض لها.

6- انخفاض كتلة العضلات:

العضلات كمان من اجزاء الجسم اللي بتتكون معظمها من المية وده معناه ان كمية اقل من المية في الجسم يعني كتلة عضلات اقل, عشان كده للناس اللي بتمارس رياضة لازم يشربوا كمان كمية مية اكتر قبل التمرين واثناء التمرين وبعد التمرين لان ده هيخليكي مرتاحة اكتر وانتي بتتمرني, وكمان هيوزع المية بشكل صحيح في الجسم, وهيقلل من الالتهابات او الآلم اللي احيانا بيحصل من التمارين.

7- هيخليكي مريضة بشكل اطول:

لو انتي اتعرضتي لاي مرض بسيط زي البرد مثلا او اي حاجة بسيطة فترة المرض هتطول معاكي لو انتي مش بتشربي مية كفاية لان المية بتساعد على طرد السموم من الجسم وبتنضفه من جوه لان الاجهزة اللي جوه الجسم بتشتغل زي الآله بتصفي الجسم من اي سموم فلو انتي مش بتغذي الاجهزة دي بالمية مش هتشتغل بشكل صح وهيحصلها جفاف وهتبدأ بسحب المية من الاماكن المتخزن فيها زي الدم وده هيأدي لمشاكل صحية تانية كتير, فعشان نتجنب كل ده كل اللي هنعمله بس نشرب مية كفاية.

8- احساس بالتعب والكسل:

زي ما قولنا النقطة اللي فاتت ان الجسم لو ما اخدتش كفايته من المية وحس بالجفاف هيبدأ يسحب المية المتخزنة من الدم وبالتالي بيسحب معاه اكسجين وده هيخلي الجسم يحس بحالة تعب وارهاق وكسل بشكل مستمر ومش هيتحمل اقل مجهود, ومافيش اي حاجة بديلة ممكن تعوض نقص المية ده يعني مثلا احنا ساعات في نص اليوم بنحس بتعب واجهاد من اقل حاجة فنفكر اننا نشرب قهوة او شاي لكن بردو بتلاقي نفسك لسه حاسه بتعب وده لان الجسم مش محتاج الحاجات دي هو كل اللي محتاجه بس المية.

9- آلام الجوع:

لما الجسم بيكون جاف ومحتاج مية بتحسي بآلام في المعدة والجسم بيترجم ده على انها آلام جوع وانك محتاجة تاكلي وبالتالي بتقومي تاكلي وده بيحصل على مدار اليوم او في نص الليل لما بنلاقي نفسنا عايزين ناكل وبنقوم ناكل اي سناكس او حاجة خفيفة, لكن في الحقيقة انه الجسم في الحالة دي بيكون محتاج للمية.

10- مشاكل في الجهاز الهضمي:

عدم شرب كمية مية كفاية هيأدي لمشاكل في الجهاز الهضمي لانه زي ما قولنا اي جهاز في الجسم مش بيوصله المية اللي لزماه بيحصل فيه جفاف وده هيخلي الحمض اللي في المعدة يسبب اضرار ومشاكل كتير في الجهاز الهضمي واللي موجودة عند كتير مننا وكتير بيعانوا منها وهي عسر الهضم وحرقة المعدة ومش بنبقى عارفين سببها ايه دي بيكون سببها قلة شرب المية.

11- الشيخوخة المبكرة:

كمية المية اللي موجودة في الجسم بتقل بشكل طبيعي مع التقدم في العمر عشان كده لما بنكبر الجلد بيبدأ تحصل فيه كرمشة وتجاعيد لان كمية المية في الجسم بتقل, عشان كده كل ما اتقدمنا في العمر المفروض نشرب كمية مية اكتر عشان نحافظ على صحة البشرة ونحميها من الشيخوخة المبكرة.

بعد ما عرفنا العلامات كلها اكيد دلوقتي هنراجع نفسنا في كمية المية اللي بنشربها كل يوم ونحاول ندي جسمنا كفايتة من المية, واكيد كمان في كتير مننا بيعانوا من حاجة او اكتر من الحاجات اللي احنا قولناها في موضوعنا بس مش بنبقى عارفين سببها ايه دلوقتي عرفنا ايه السبب اللي بيخلينا نشتكي من المشاكل دي كلها, والحل بسيط وقدامنا وهي المية جربوا اشربوا مية اكتر خلوا دايما جنبكم في البيت ازازة مية كبيرة اشربوا منها طول الوقت, ولو بره البيت او في الجيم خدوا معاكم ازازة مية المهم متستغنوش عنها ابدا في اي مكان.