20 عادة لو عملتيها هتخلي بشرتك متألقة ونضرة وصحية !

ريهام محمود

في

33121

البشرة النضرة والجلد الصحي هي حلم كل بنت بس المشكلة اننا مش بنعرف نوصل لده ازاي, ده غير عوامل الجو اللي بتأثر على بشرتنا كل يوم بشكل سلبي وبتضرها, ايه بقى اللي المفروض نعمله عشان نحمي بشرتنا ونحافظ عليها دايما نضرة وصحية ؟ ده اللي هنعرفه النهاردة من خلال المقال بتاعنا من خلال 20 عادة لو عملتيهم هتحافظي على بشرتك نضرة وشباب على طول.

20 عادة تحافظي بيهم على جمال ونضارة البشرة:

1- تقشير الجسم بانتظام:

حافظي على تقشير الجسم بشكل منتظم مرة في الاسبوع, افركي الجسم باستخدام السكر وزيت الزيتون وبليفة خشنة بحركات دائرية عشان تتخلصي من خلايا الجلد الميتة.. ممكن تشوفوا من هنا وصفات طبيعية لتقشير الجلد.

2- ترطيب البشرة:

رطبي البشرة بشكل يومي بكريم مرطب لنوع بشرتك وكل ما تغسلي البشرة لازم ترطبيها على طول.. شوفوا من هنا الطريقة والوقت الصح لاستخدام الكريم المرطب.

3- استخدمي قناع الجيلاتين لازالة الرؤوس السودا:

استخدمي قناع الجيلاتين بانتظام كل 15 يوم عشان تتخلصي من الرؤوس السودا, اخلطي الجيلاتين مع اللبن وحطيه في الميكروويف لمدة 10 ثواني وحطيه على بشرتك لحد ما ينشف وبعدين قشرية من على البشرة, وممكن تشوفوا من هنا بالتفصيل خطوات ماسك الجيلاتين لازالة الرؤوس السودا.. شوفوا من هنا طريقة ماسك الجيلاتين لعلاج الرؤوس السودا.

4- اغسلي بشرتك قبل النوم:

قبل ما تنامي اغسلي وشك بالغسول المناسب لبشرتك او بمية دافية عشان تنضفي المسام من الاتربة والبكتيريا.. شوفوا من هنا افضل انواع غسول البشرة.

5- حطي صن بلوك:

لو بتنزلي في الشمس لازم متنسيش الصن بلوك قبل ما تعرضي بشرتك للشمس عشان تحميها من الاشعة فوق البنفسجية لانها من اكتر الاسباب اللي بتسبب التجاعيد المبكرة للبشرة, وبقع الجلد, والنمش, وحتى سرطان الجلد.. تقدروا تشوفوا من هنا افضل انواع الصن بلوك لكل نوع بشرة.

6- اشربي مية كتير:

اشربي كمية كفاية من المية يوميا لان ليها دور مهم جدا في ترطيب البشرة وحمايتها من الجفاف, وبتنقيها من الشوائب.

7- استخدمي جل الصبار:

جل صبار الالوفيرا من الحاجات المفيدة جدا للبشرة, ممكن تحطي منه يوميا تحت العين وحوالين الفم وتنامي بيه وتغسليه الصبح, الطريقة دي بتحمي البشرة من التجاعيد والخطوط الرفيعة اللي بتظهر في الاماكن دي بشكل خاص, ممكن تكرري الوصفة من مرتين لتلات مرات في الاسبوع.

8- اتخلصي من القلق:

حاولي انك تتخلصي من القلق والتوتر والاجهاد لان الحالة النفسية من اكتر الحاجات اللي بتأثر بشكل سلبي جدا على البشرة.

9- زيلي المكياج:

متنسيش خطوة ازالة المكياج قبل النوم يعني منكسلش ابدا وننام بيه لانه بيسد مسام البشرة وبيسبب ظهور الحبوب وبيخلي شكلها مش صحي.. ممكن تشوفوا من هنا طرق لعمل مزيل المكياج في البيت بمكونات طبيعية.

10- اشربي ديتوكس:

حاولي على الاقل مرة في الشهر اشربي مشروب الديتوكس اللي بيسموه دايما مشروب الجمال لانه بيطرد السموم من الجسم وبيحافظ جدا على نضارة البشرة, ممكن تخلطي بنجر مع عصير برتقان وجزر وتفاح ونص خيارة وشوية كرفس اضربيهم مع بعض في الخلاط واشربيهم المشروب ده بيرطب البشرة وبيطرد السموم.. ممكن تشوفوا من هنا 5 وصفات لمشروبات الديتوكس.

11- مارسي رياضة:

الرياضة مهمة جدا مش بس لصحة الجسم كمان لصحة البشرة لانها بتعزز عملية الايض وده بيحفز عملية تجديد البشرة وهيحافظ عليها دايما صحية.

12- قشري البشرة:

حافظي على تقشير البشرة بانتظام كل 15 يوم باي كريم مقشر او بمقشر طبيعي باستخدام مكونات طبيعية زي خلط الزبادي والسكر وفرك البشرة في حركات دائرية, ده بيساعد على تقشيرها وتجديد خلايا الجلد.. شوفوا من هنا طريقة تقشير البشرة في البيت بمكونات طبيعية كأنك في ال SPA.

13- نامي كويس:

خدي ساعات كافية من النوم يوميا لان قلة النوم بيخلي البشرة مجهدة ومرهقة وباهتة, عشان كده لازم ننام كويس جدا ونوم عميق متواصل مش متقطع.

14- اعملي ماسكات للبشرة:

اهتمي انك تعملي ماسكات طبيعية للبشرة من مرتين لتلات مرات في الاسبوع, بالنسبة للبشرة الدهنية ممكن تستخدموا ماسكات بالشوفان, وللبشرة الجافة ممكن تستخدموا قناع الافوكادو لانه مغذي للبشرة وبيرطبها, ولو بشرتك مختلطة ممكن تستخدمي ماسك العسل والبابايا.

شوفوا من هنا 10 وصفات بالشوفان لجمال البشرة والشعر.

15- خدي بيوتين:

البيوتين من اكتر انواع الفيتامين اللي بتعزز عملية تجديد البشرة وبتحافظ عليها صحية وكمان مفيدة جدا لصحة الضوافر وبتخليها تنمو بشكل اسرع, ممكن تاخدي كبسولة واحدة كل يوم الصبح, والبيوتين هو فيتامين سولوتابل وده موجود بشكل طبيعي في المية عشان كده لازم نشرب كمية مية كفاية يوميا.

16- استخدمي الطين:

طين البحر الميت من الحاجات المفيدة اوي للبشرة وخصوصا الدهنية وللي بيعانوا من الدهون في منطقة التي زون T-Zone اخلطي الطين بالمية وحطيه على البشرة, واستخدميه بانتظام من مرتين لتلات مرات في الاسبوع.

17- استخدمي الخيار:

الخيار يعتبر صديق البشرة لانه بيرطبها وبيفتحها وبيحافظ على نضارتها, وزي ما كلنا عارفين شرايح الخيار من الحاجات المعروفة جدا لعلاج الهالات السودا, وعصير الخيار مفيد جدا للبشرة بشكل عام لو انتظمتي على استخدامه لانه يعتبر بلسم ومرطب للبشرة وبيساعد على تجدديها.

شوفوا من هنا 15 وصفة من الخيار لجمال بشرتك.

18- استخدمي اكياس الشاي:

اكياس الشاي مفيدة اوي للهالات السودا وعلاج انتفاخات العين, حطيه على عينك لعلاج الهالات وللانتفاخات ممكن تحطيه في التلاجة شوية قبل ما تحطيه على العين هيجيب معاكي نتيجة احسن, وممكن تستخدمي الشاي الاخضر مرتين في الاسبوع للبشرة كلها بيساعد على شد المسام وبيحمي البشرة من الشيخوخة وكمان ليه تأثير مضاد للبكتيريا.

شوفوا من هنا وصفات للبشرة من الشاي الاخضر.

19- اتجنبي رش البرفيوم على البشرة:

لما تيجي ترشي البرفيوم خلي بالك انك ترشي بعيد عن البشرة لان المكونات اللي فيه ممكن تضرها وتكسر الكولاجين اللي تحت الجلد.

20- اختاري نوع المكياج بعناية:

لما نيجي نختار المكياج ومستحضرات العناية بالبشرة بشكل عام لازم نختار انواع وماركات مضمونة ومعروفة عشان منضرش بشرتنا وافتكري دايما ان الجلد بيمتص على طول اي حاجة بتتحط عليها عشان كده لازم نخلي بالنا من اي حاجة بنحطها على البشرة ونختار الحاجات اللي متضرهاش.