200 سعر حراري بتساوي كمية قد ايه لكل اكلة ؟
كلنا اكيد عارفين السعرات الحرارية وان كمية السعرات اللي داخلة الجسم هي اللي بتتحكم في وزننا عشان كده كل واحد فينا ليه عدد سعرات حرارية في اليوم لازم ميتخطاش الحد المسموح منها لان زيادة السعرات بتساوي زيادة في الوزن, وخبراء التغذية صرحوا ان الانسان البالغ بيحتاج من 2000 – 2500 سعر حراري يوميا, واحنا اتكلمنا قبل كده بالتفصيل عن عدد السعرات الحرارية اللي بيحتاجها كل جسم كل يوم, لكن هل اتخيلنا قبل كده عدد السعرات الحرارية دي كميتها قد ايه لكل اكله ؟ ده اللي هنعرفه من خلال المقال بتاعنا النهاردة هنعرف 200 سعر حراري بتساوي كمية اكل قد ايه لكتير من الاكلات اللي تقريبا بناكل منها يوميا وطبعا ده هيساعدنا اننا نتحكم في كمية الاكل ونعرف ناكل كمية قد ايه من كل حاجة, وهتتفاجئوا قد ايه اننا بناكل كميات كبيرة اكتر من الحد المسموح لينا من كل اكلة.
تعالوا نعرف كمية الاكل ل200 سعر حراري قد ايه ؟
1- المشروبات الغازية:
الكوكاكولا او المشروبات الغازية بشكل عام 200 سعر حراري بيساوي 496 ملل يعني تقريبا كوبايتين كبار.
2- السجق او السوسيس:
200 سعر حراري بيساوي 66 جرام يعني تقريبا 1 سجق و1/4 .
3- المكرونة:
200 سعر حراري بيساوي 145 جرام من غير اي اضافات تانية يعني الكمية البسيطة جدا زي اللي موجودة في الطبق اللي في الصورة دي.
4- البطاطس المحمرة:
تقريبا من اكل الاكلات اللي كلنا مدمنين عليها هي البطاطس المحمرة وممكن نكون بناكلها يوميا 200 سعر حراري بيساوي 73 جرام بطاطس يعني زي الكمية اللي موجودة في الصورة كده واحنا طبعا بناكل اكتر منها بكتير.
5- ال Gummy Bears:
الحلويات اللي بيبقى فيها نسبة سكريات زي الجيلي كولا والـGummy Bears والحاجات دي, 200 سعر حراري بيساوي 51 جرام منها يعني تقريبا اقل من 20 واحدة منها.
6- ال M&M’s:
200 سعر حراري بتساوي 40 جرام منها.
7- الشيبسي:
الشيبسي كمان من الحاجات اللي كتير مننا بياكلها بكميات اكبر من الحد المسموح منها, 200 سعر حراري منها بيساوي 37 جرام يعني تقريبا كيس شيبسي واحد هيدينا 200 سعر.
8- الجزر:
200 سعر بيساوي 570 جرام من الجزر.
9- الفلفل الحلو:
الفلفل الحلو او الرومي الكبير, 200 سعر حراري بيساوي 740 جرام فلفل.
10- البروكلي:
200 سعر حراري بيساوي 588 جرام بروكلي.
11- البسلة:
200 سعر حراري بيساوي 357 جرام بسلة.
12- الذرة الحلوة:
200 سعر حراري بيساوي 308 جرام من الذرة.
13- الافوكادو:
200 سعر حراري بيساوي 125 جرام.
14- الكرفس:
200 سعر حراري بيساوي كيلو و425 جرام.
15- العنب:
200 سعر حراري بيساوي 290 جرام عنب.
16- التفاح:
200 سعر حراري بيساوي 385 جرام من التفاح.
17- الكيوي:
200 سعر حراري بيساوي 328 جرام.
18- المكسرات:
تشكيلة من المكسرات المملحة مش نوع واحد, 200 سعر بيساوي 33 جرام بس من المكسرات زي الكمية اللي في الصورة دي وطبعا احنا بناكل منها اكتر.
19- تشيز برجر:
ده بشكل خاص للناس المدمنين على الـ Fast food , ال 200 سعر حراري بيساوي 75 جرام تشيز برجر يعني تقريبا نص ساندوتش بس, يعني لما بنروح ناكل ساندوتش التشيز برجر وطبعا جنبه البطاطس المحمرة والمشروب الغازي دي وجبة دمار شامل :) شوفوا بيدخل كام سعر حراري للجسم من الوجبة دي بس.
20- الخبز الاسمر:
الخبز الاسمر اللي بيكون معمول من الردة, 200 سعر حراري بيساوي 90 جرام من الخبز.
21- فرنش باجيت:
الفرنش باجيت اللي دايما بنعمل فيه الساندوتشات, 200 سعر حراري بيساوي 72 جرام من الفرنش باجيت.
22- الدقيق الابيض:
200 سعر حراري بيساوي 55 جرام من الدقيق.
23- جبنة شيدر:
200 سعر حراري بيساوي 51 جرام من الجبنة يعني زي الشريحة اللي في الصورة دي اللي تقريبا تعمل ساندوتش واحد جبنة.
24- الزبدة:
200 سعر حراري بيساوي 28 جرام زبدة.
25- البيض:
200 سعر حراري بيساوي 150 جرام يعني تقريبا 3 بيضات مسلوقين, ونخلي بالنا انهم مسلوقين يعني من غير سمن او زبدة لان البيض المقلي مختلف سعراته الحرارية اكتر بسبب الزبدة او السمنة اللي بنضيفها يعني منجيش ناكل 3 بيضات مقليين زي المسلوق.
26- المشمش المجفف:
200 سعر حراري بيساوي 83 جرام من المشمش المجفف.
27- زبادي بالفراولة قليلة الدسم:
200 سعر حراري بيساوي 196 جرام زبادي, ونخلي بالنا بردوا انها قليلة الدسم لان الكاملة الدسم هتدينا سعرات اكتر.
28- مشروب الشوكولاتة:
200 سعر حراري بيساوي 60 ملل من مشروب الشوكولاتة, يعني زي الكمية اللي في الصورة دي تقريبا ربع كوباية بس.
29- اللبن:
200 سعر حراري بيساوي 333 ملل لبن يعني تقريبا كوباية كبيرة.
30- شوكولاتة سنيكرز:
200 سعر حراري بيساوي 41 جرام سنيكرز يعني تقريبا ¾ واحدة شوكولاتة.
ايه رايكو بقى بعد ما شوفتو الكميات ! طبعا عرفتوا قد ايه بناكل كميات اكل كبيرة من المسموح لينا ناكلها, بس ده هيساعدنا كتير اننا نتحكم في كميات الاكل وعدد السعرات الحرارية اللي بتدخل جسمنا يوميا.
اعرفوا من هنا ايه هو عدد السعرات الحرارية اللي المفروض تكسبيها كل يوم ؟
