15 طريقة تستخدمي بيهم اللبن لجمال البشرة والشعر

ريهام محمود
ريهام محمود
في
بشرة
9404

اللبن من الحاجات اللي ليها فوايد كتير جدا للبشرة والشعر وده لانه بيحتوي على كتير من العناصر الغذائية الحيوية والفيتامينات زي فيتامين B12, B6, وفيتامين D, وA, والبيوتين, الكالسيوم, والبروتين وغيرها من العناصر والفيتامينات المفيدة لصحة الجلد والشعر, واحنا النهاردة من خلال موضوعنا جايبين مجموعة وصفات باللبن لجمال بشرة وشعر كل بنات حوا.

15 طريقة تستخدمي بيهم اللبن لجمال البشرة والشعر:

– استخدامات اللبن للبشرة والجسم:

1- منظف للوجه:

الحليب الخام من غير اي اضافات عليه يعتبر منظف ومطهر طبيعي للبشرة بينضفها من كل الاوساخ والاتربة والجلد الميت, والميزة انه مش بيسد المسام يعني مش هتعاني من مشكلة البثور او الرؤوس السودا, بس هتاخدي معلقتين لبن وتجيبي قطنة تحطيها فيه وتفركي بيها بشرتك ورقبتك وسيبيه لحد ما ينشف وبعدين اغسليه بمية دافية هتلاقي نتيجة فورية من اول استخدام وهتلاحظي نضافة ونعومة بشرتك حتى كمان مش هتحتاجي مرطب بعده لانه هو بيرطب البشرة جدا.

2- مرطب طبيعي:

لو بتعاني ان بشرتك جافة اوي وخشنة الحل في الماسك ده وهو عبارة عن موز ولبن, هنجيب موزة نهرسها كويس نخليها ناعمة ونضيف عليها لبن ساقع ونخلطهم مع بعض كويس ونفرد الخليط ده على البشرة ونسيبه 30 دقيقة وبعدين نغسل البشرة بالمية, الماسك ده هيرطب البشرة ويخليها ناعمة جدا وهيخلصك من جفاف البشرة في يومين بس, والماسك ممكن تستخدميه للجسم كله.

3- اللبن لتقشير البشرة:

اللبن بيحتوي على حمض الفا هيدروكسي والمركب ده من المركبات اللي موجودة تقريبا في معظم منتجات التجميل والعناية بالبشرة لانه بيساعد على تأخير تجاعيد وشيخوخة البشرة وبتخلي الجلد شكله صحي لاطول فترة ممكنة, وممكن نعمل ماسك تقشير باستخدام اللبن مع اضافات تانية هتساعدنا على التقشير, هنخلط 2 معلقة كبيرة شوفان مع ½ معلقة عسل نحل و 2 معلقة كبيرة لبن و1/2 معلقة صغيرة عين جمل مطحون “اختياري”, هنمزج المكونات مع بعض كويس هندلك البشرة بالخليط بالراحة في حركات دائرية لمدة دقيقتين وبعدين نسيبه على البشرة 10 دقايق كمان ونغسله بالمية.

4- تنقية ونضارة البشرة:

لو بشرتك مجهدة ومش نضرة, الماسك ده هيرجع لبشرتك نضارتها ويخليها منورة وشكلها صحي جدا, هنجيب 2 معلقة كبيرة لبن نضيف عليهم معلقة كبيرة عسل نحل وكبسولة فيتامين E, وشريحة خيار مهروسة او جل صبار الالوفيرا وممكن تضيفيهم الاتنين هنخلط المكونات كلها مع بعض كويس ونحط الخليط على الوش والرقبة ونسيبه 30 دقيقة وبعدين نغسله.

5- اللبن كتونر للبشرة:

ممكن نستخدم اللبن كتونر طبيعي للبشرة, هنخلط معلقة كبيرة لبن مع معلقة كبيرة شاي اخضر وبقطنة هنحط الخليط ده على البشرة ونسيبه من 10 – 15 دقيقة لحد ما ينشف وبعدين نغسله, ممكن نستخدمه يوميا وهنلاحظ اختلاف كبير في بشرتنا وانها بقت منورة ونضرة.

6- حمام اللبن لتجديد الجلد:

حمام اللبن من الحاجات المعروفة جدا من ايام كليوباترا اللي كانت كل يوم بتعمل حمام اللبن لجسمها, الحمام ده بيجدد الجلد وبيرطبه وبينعمه جدا, ده غير انه بيعمل استرخاء للجسم وبيخلصك من التوتر, هنملى البانيو مية دافية ونضيف لها 2 لتر لبن, وكوباية عسل نحل, و 5 معالق صودا الخبز “الكربوناتو”و عصير 3 ليمونات و6 نقط زيت زيتون هنخلط كل المكونات دي كويس مع المية وتقعدي فيها من 15 – 20 دقيقة وخلال الوقت ده نفرك البشرة بفرشة الجسم او ليفة بحركات دائرية وبعد الحمام نغسل الجسم بمية عادية.

7- ترطيب وتنعيم واسترخاء القدمين:

لو بتلبسي دايما كعب عالي او بتلبسي الشوز لفترات طويلة ودايما عندك الم في رجلك ممكن تعملي خليط لاسترخاء الرجل وكمان بيرطبها وبينعمها, هنجيب طبق نحط فيه لتر مية دافية ونضيف عليها 2 كوب لبن سخن وكام نقطة عصير ليمون و4 معالق كبيرة ملح وكام نقطة من اي نوع شامبو, ننقع الرجل في الخليط ونفرك الكعب بحجر خفاف وبعدين ننشفها وندهنها ببادي لوشن, ولو عايزة تنعميها اكتر ممكن بعد ما تدهنيها تلبسي شراب وتنامي بيه هتصحي الصبح هتلاقي رجلك ناعمة جدا.

8- علاج البقع الداكنة:

اللبن من الحاجات المفيدة جدا اللي بتساعد في علاج البقع الداكنة وتبييض البشرة بسهولة, هنجيب اللبن ونضيف عليه عصير بطاطس ونخلطهم كويس ونحط الخليط على البشرة بالليل ونسيبه للصبح, مع الاستمرار في الاستخدام هتلاحظي ان البقع اختفت من بشرتك, وغير كده اللبن هيساعد على ترطيب البشرة.

9- تقليل حجم مسام البشرة:

المسام الواسعة من المشاكل اللي بتقابل بنات كتير وخصوصا اللي بشرتهم دهنية بتكون عندهم المشكلة دي اكتر, اول حاجة عشا نتخلص من المشكلة دي اننا نغسل البشرة مرتين في اليوم, ونجرب ماسك اللبن والبيض هنجيب بيضة ونضيف عليها شوية لبن وندهن البشرة بالخليط ونسيبة 40 دقيقة وبعدين نغسله بمية دافية, وممكن نستخدم الماسك ده بعد ما نعمل حمام بخار للبشرة هيبقى افضل, مع الاستمرار على الماسك ده هتتخلصي من مشكلة المسام الواسعة ومش هتعاني منها ابدا.

10- تفتيح لون البشرة:

اللبن يعتبر مفتح طبيعي للبشرة, هنجيب 4 حبات لوز نطحنهم ونضيف عليهم شوية لبن وعصير برتقان ونمزجهم كويس لحد ما تتكون عندنا عجينة بقوام مناسب هنحط الماسك على البشرة ونسيبه من 40 – 50 دقيقة وبعدين نغسله بمية دافية.

11- علاج حب الشباب والندبات الناتجه عنه:

حب الشباب والندبات اللي بتنتج عنه من اكتر المشاكل اللي معظمنا بيعاني منها لكن اللبن من اكتر المكونات اللي بتساعد على علاج المشاكل دي, لعلاج حب الشباب ادهني بشرتك باللبن وسيبيه 15 دقيقة وبعدين اغسليه بمية دافية.

لعلاج ندبات حب الشباب هنجيب بطاطس نسلقها ونهرسها ونضيف عليها طماطم مهروسة وكربوناتو ونضيف اللبن لحد ما تبقى عندنا عجينة قوامها مناسب ونحط الخليط على البشرة ونسيبه 30 دقيقة وبعدين نغسله بمية دافية.

12- علاج التجاعيد والخطوط الرفيعة:

– التجاعيد والخطوط الرفيعة في البشرة بتظهر بسبب جفاف البشرة وان مافيش فيها رطوبة كفاية, والماسك ده هيساعد جدا على حل مشكلة الخطوط والتجاعيد, هنخلط لبن مع زيت بذور الكتان “من عند العطار” وموز مهروس واناناس, هنمزجهم مع بعض كويس ونحطه على البشرة ونسيبه من 30 – 35 دقيقة وبعدين نغسله بمية دافية.

– وممكن نعمل ماسك تاني هنخلط فيه لبن مع البابايا وكبسولة فيتامين اي, وعصير ليمون وعسل نحل نمزجهم مع بعض كويس ونحط الخليط على البشرة ونسيبه 40 دقيقة وبعدين نغسله بمية دافية.

– مهم جدا كمان عشان نحافظ على بشرتنا على طول رطبة ونحميها من الجفاف اننا نشرب من 8 – 10 كوبايات مية يوميا, وننام 8 ساعات, وناكل اكل صحي.

استخدامات اللبن للبشرة والجسم
استخدامات اللبن للبشرة والجسم

– استخدامات اللبن للشعر:

13- ماسك لعلاج الشعر الجاف والتالف:

لو بتعاني من جفاف وتلف الشعر والتقصيف الماسك ده هيعالج لك المشكلة, هنخلط 3 معالق كبيرة لبن مع ½ موزة ومعلقة كبيرة عسل نحل ومعلقة كبيرة زيت زيتون ونضربهم مع بعض كويس في الخلاط لحد ما يبقى الخليط ناعم هنحطه على الشعر ونغطيه بكيس بلاستيك او طاقية الشعر ونسيبه لمدة ساعة وبعدين نغسله.

14- بلسم للشعر:

ممكن نعمل بلسم مرطب للشعر باستخدام اللبن, هنخلط لبن مع زبادي مع زيت اطفال ومايونيز بكميات متساوية تكفي طول وكثافة شعرك هنحط الخليط على الشعر ونغطيه بطاقية او كيس بلاستيك ونسيبه 40 دقيقة وبعدين نغسله بمية دافية وشامبو.

15- علاج تساقط الشعر:

تساقط الشعر من اكتر المشاكل اللي بتقابلنا كلنا واللبن من الحاجات اللي هتساعدنا على التخلص من مشكلة التساقط ومش بس كده كمان بيساعد على نمو الشعر, هنخلط زبادي مع قهوة وبيض وزيت زيتون وزيت لوز وكمية بسيطة من اللبن نمزج كل المكونات دي كويس مع بعض ونحط الخليط على الشعر ونغطيه بكيس بلاستيك ونسيبه لمدة ساعة وبعدين نغسله بمية دافية وشامبو.

استخدامات اللبن للشعر
استخدامات اللبن للشعر

نتمنى ان الوصفات تفيدكم ياللا جربوها وقولولنا على النتايج :).

اعرفي كمان فوايد الموز واستخداماته للبشرة والشعر

فوايد الموز للبشرة والشعر
فوايد الموز للبشرة والشعر

مقالات متعلقه

5 علاجات طبيعية بتستخدمها كارينا كابور لبشرة نضرة وشباب

5 علاجات طبيعية بتستخدمها كارينا كابور لبشرة نضرة وشباب

10 نصايح جمالية دخليهم في روتينك هيفرقوا معاكي

10 نصايح جمالية دخليهم في روتينك هيفرقوا معاكي

10 وصفات طبيعية لتغذية بشرتك في الشتا

10 وصفات طبيعية لتغذية بشرتك في الشتا