10 طرق بسيطة و سهلة هتساعدك فى تحسين الذاكرة

وسط الشغل و شغل البيت و تربية الاولاد ، او حتى مواعيدك مع اهلك و اصحابك و تعب  ومذاكرةا لكليه حاجات كتير بتقع مننا و مبنفتكرهاش و ممكن تكون مواعيد او ارتباطات مهمة ،و ده بيبقى نتيجة الضغط و التفكير الكتير ، و كتير مننا بنفكر انه كل ما بنكبر فى السن طبيعى اننا ننسى حاجات لكن ابحاث كتيرة قالت انه ده مش صحيح، و انه فى عوامل تانية غير الست ممكن تأثر على الذاكرة زى الاكل غير الصحي ، قلة النوم ، الضغط العصبى. فى المقال ده هنقولك على احسن 10 طرق بسيطة و سهلة هتساعدك فى تحسين الذاكرة من غير ما تلجأى لاى ادوية او علاجات ..

10 طرق بسيطة و سهلة هتساعدك فى تحسين الذاكرة 

1- نامى كويس بالليل : 

حاولى تحسنى من روتين نومك و انك تنامى بالليل من بدرى لانه النوم العميق فى الليل و خصوصا لما تنامى و تصحى كل يوم فى نفس المواعيد و يبقى فيه جدول لمواعيد نومك، ده ممكن ميبقاش سهل لكن مع الوقت هتلاقى مواعيد نومك اتظبطت و هتحسي بفرق كبير مش بس فى ذاكرتك لكن كمان فى نشاطك و جمالك بشكل عام ، و حاولى تلتزمى بمواعيد نومك و تنامى بدرى حتى فى ايام الاجازات .

ابدأى اعملى تمارين :

التمارين المنتظمة بتحسن من سريان الدم فى المخ و بتحفز دماغك فى انه يستوعب و يخزن بشكل اكبر، حاولى انه يومك يتضمن اى نشاط رياضى و لو بسيط زى الجرى او المشى و التزمى بيه كل يوم او يوم و يوم و ده هيساعد ذاكرتك تتحسن. خبراء الصحة بيوصوا بأنه نتمرن حوالى 150 دقيقة على الاقل فى الاسبوع ، و لو معندكيش وقت للتمارين يبقى جربى تمشى حوالى 10 دقايق فى اليوم كل يوم .

3- مرنى مخك :

 التمرينات العقلية او تمرين المخ بتحافظ على صحة المخ وبتقوى الذاكرة، ممكن ذاكرتنا تتغير لكن المهم اننا نحافظ على مخنا نشيط و شغال و ده هيحسن الذاكرة و يساعدك تسترجعيها بشكل كبير.علشان كده حاولى تمرنى مخك بأنك تقرى او تحلى تمارين عقلية زى السودوكو او الكلمات المتقاطعه مثلا واحاولى كمان توسعى ثقافتك و معلوماتك العامة ، التمارين العقلية ممكن تبقى ممتعه واسهل من التمارين الجسدية بشكل كبير و بتساعد على تحسين الذاكرة بطريقة سريعه و ملحوظة .

4- خلى علاقاتك الاجتماعية صحية :

علاقتنا الاجتماعية بتعتبر نوع من التمارين العقلية لاننا طول الوقت بنبقى بنرتب مواعيد و بنخطط لمفاجآت او بنفكر فى حلول لاصحابنا و قرايبنا ، علشان كده بتعتبر العلاقات الاجتماعية الصحية البعيدة عن التوتر و القلق مهمة لصحتك و لذاكرتك. ابحاث كتيرة بينت انه الصداقات و العلاقات القريبة من الناس اللى بنحبهم مش بس بتاثر على صحتنا النفسية بشكل ايجابى ولكن كمان على صحتنا العقلية. ده معناه انه ضرورى تحاولى توسعى من دايرتك الاجتماعية، تتطوعى فى عمل خير او مثلا تنضمى لنادى و تكونى صداقات و معارف جديدة .

5- ركزى على نفسك و اعملى تمرينات تأمل : 

التأمل تمرين عقلى مهم و ميد و بيساهم فى تحسين الذاكرة بشكل فعال ،و بيعتبر واحدة من احسن الطرق لتقوية الذاكرة و تصفية الذهن. حاولى توفرى لنفسك 3 دقيقة كل يوم فى اوضة فاضية بعيدة عن الدوشة و تقعدى فيها لوحدك و تولعى شمع ريحته حلوه و متعمليش اى حاجه غير انك تسترخى و متفكريش فى اى حاجه، و لو ضرورى تفكرى يبقى تفكرى فى مميزاتك و الحاجات الحولوة اللى فيكى بس و متفكريش فى اى مشاكل او سلبيات. التأمل مهم جدا قبل مناسباتك المهمة او لو عندك انترفيو او ميتنج مهم مثلا ، حاولى تقعدى لو حدك و تتنفسي بهدوء و بشكل عميق . 

6- كلى فواكه و خضروات غنية بفيتامين E : 

حاولى تهتمى بانه نظامك الغذائي يتضمن فيتامين B بشكل كافى ، لانه بيساعد على تدعيم الذاكرة و تقويتها و خصوصا فيتامين B12 اللى بيقوى خلايا المخ و فيتامين B6 اللى بيقوى الناقلات العصبية اللى بتنقل الاشارات من المخ للاطراف و اجهزة الجسم. 

7- كلى اطعمه تقوى المخ: 

النظام الغذائى اللى اساسه الفاكهه و الخضروات و الحبوب الكاملة و البروتين بيعتبر زى وقود للمخ، و خصوصا الاطعمه الغنية بالاوميجا 3 ، علشان كده نظام اكلك لازم يبقى فيه خضار و فاكهه بوفرة و كمان اسماك .

8- خدى بالك لو عندك مرض مزمن : 

لازم تاخدى بالك من نفسك كويس لو عندك مرض مزمن  زى الغدة الدرقية ، الربو او امراض الكليتين  او  الاكتئاب و بتحاولى تحافظى على ذاكرتك و تقويها. تابعى دكتورك بانتظام و اتبعى تعليماتهم و انتبهى انه بعض الادوية ممكن يكون ليها تأثير على ذاكرتك فلازم تراجعى مع الدكتور قبل ما تخديها .

9- متعمليش حاجات كتير فى نفس الوقت : 

تنفيذ اكتر من حاجه فى نفس الوقت او الـ multitasking بيخلوكى ابطأ و ممكن تنسي تعملى حاجات ، لانه لما تنفذى اكتر من حاجه فى نفس الوقت تركيزك بيقل و ممكن تبدأى تغلطى فى اللى بتعمليه، حاولى بدل ما تعملى 5 حاجات فى نفس الوقت تركزى انك تعملى حاجه حاجه و تركزى و انتى بتعمليها هتلاقى نفسك انجزتى شغل اكتر فى وقت اقل و من غير اخطاء، بالطريقة دى هتقللى من التوتر و الضغط العصبى و هتنامى افضل بالليل و ده هيساعد على تحسين الذاكرة .

10- اشربى الشاى الاخضر و القهوة :

الكافيين له تأثير ايجابى على الذاكرة ، الابحاث فى جامعة هوبكينز بتقول انه الكافيين بيساعدك تفتكرى حدث او حاجه معينة 24 ساعه زيادة بعد ما تنتهى و الشاى الاخضر بيحتوى على مادة الـ polyphenols اللى بتعتبر مضاد قوى للاكسدة و بتحافظ على خلايا المخ .