6 طرق لعمل بلسم الشعر بمكونات طبيعية لشعر ناعم وصحي

كلنا بنتمنى يكون شعرنا صحي وناعم ودايما في حالة بحث عن ماسكات ووصفات للشعر عشان نعالجه من اي مشاكل ونحافظ عليه , واحنا النهاردة جايبين لكل بنات حوا وصفات لعمل بلسم الشعر بمكونات طبيعية تقدري تعمليه بنفسك في البيت بسهولة وفي نفس الوقت نتايجة هايلة للشعر بينعمه ويرطبه وبيخليه بيلمع وصحي.

6 طرق لعمل بلسم الشعر بمكونات طبيعية:

1- الوصفة الاولى:

هنخلط معلقة صغيرة خل ابيض مع معلقة صغيرة جلسيرين ونضيف عليهم بيضة ونضربهم مع بعض كويس وبعدين نضيف لهم كمية من زيت الخروع لحد ما تلاقي عندك كمية مناسبة تكفي طول وكثافة شعرك ونمزجهم مع بعض ونحط الخليط على الشعر كله ونغطيه بطاقية الشعر او بكيس بلاستيك ونسيبه 30 دقيقة ووبعدين نغسله بالمية والشامبو وهتلاقي نتايج فورية بعد الماسك, كرري الوصفة مرتين في الاسبوع على الاقل.

2- الوصفة التانية:

زيت جوز الهند من اكتر الحاجات المرطبة للشعر, هنجيب زيت جوز الهند ونحطه على الشعر كله من الجذور للاطراف ونسرح الشعر بالمشط عشان نتأكد ان الزيت اتوزع كويس على الشعر كله وبعدين هنجيب فوطة نحطها في مية سخنة ونطلعها نعصرها كويس ونلف بيها شعرنا ونسيبه ساعة وبعدين نغسله بالشامبو, الماسك ده بيرطب الشعر بعمق وبيديه لمعة.

3- الوصفة التالتة:

هنخلط زبادي مع كام نقطة عصير ليمون ونحطهم على الشعر وفروة الراس ونسيبه نص ساعة وبعدين نغسله بالشامبو, الوصفة بتنضف الشعر وفروة الراس وبتعالج القشرة كمان وبتدي لمعة ورطوبة للشعر.

4- الوصفة الرابعة:

اهرسي ثمرة افوكادو وضيفي عليها كمية من زيت الزيتون لحد ما يتكون عندك خليط متجانس, حطي الخليط على الشعر وسيبيه لمدة ساعة وبعدين اغسليه بالشامبو, الافوكادو بتحتوي على دهون طبيعية بترطب الشعر وزيت الزيتون فيه خصائص مغذية للشعر.

5- الوصفة الخامسة:

هنجيب موز كمية حسب ما تكفي طول وكثافة شعرنا ونضيف عليه بيض لحد ما يبقى عندنا خليط كريمي كده سهل الفرد على الشعر هنحطه على شعرنا ونغطيه بكيس بلاستيك ونسيبه من ساعتين لتلات ساعات وبعدين نغسله بالشامبو.

6- الوصفة السادسة:

الوصفة دي باستخدام زيت اللوز الحلو بس من غير اي اضافات هندلك الشعر كله وفروة الراس بالزيت ونسيبه من بالليل للصبح نغسله بالشامبو, زيت اللوز فيه خصائص مغذية وبيعمل ترطيب عميق للشعر, وبيحمي الشعر من عوامل الجو والشمس, وكمان بيمنع الشيب المبكر, وممكن نكرر الطريقة دي قبل كل مرة بنغسل فيها شعرنا يعني مرة او مرتين في الاسبوع حسب بتغسلي شعرك كل قد ايه.

كل الوصفات نكررها من مرتين لتلات مرات في الاسبوع عشان نوصل للنتايج اللي احنا عايزينها.

شوفي كمان طريقة عمل سبراي لعلاج الشعر الجاف في البيت بخطوات سهلة وبسيطة