افضل 6 اكلات مريحه للبطن لو بتعانى من مشكلات فى الهضم

فيه دراسة بتقول إن مشاكل الجهاز الهضمي زي الانتفاخ, الغازات, كركبة المعدة أو الاسهال بتجي للستات 6 مرات أكتر من الرجالة! عشان كده إنتي ممكن تنقذي نفسك وتقللي من الاكل اللي بيسبب مشاكل الهضم وتبدأي تركزي مع الاكلات اللي ممكن تريح معدتك وتخليكي مرتاحة بعد أي اكلة حلوة او عزومة ، فى الموضوع ده بنات حوا هتقولك على افضل 6 اكلات مريحه للبطن هتفيدك و متتعبش معدتك و كمان مفيدة لجسمك  كله بشكل كبير .

افضل 6 اكلات مريحه للبطن لو بتعانى من مشكلات فى الهضم 

1- البابايا:

البابايا من زمان بتستخدم فى كتير من الاغراض الصحية زى علاج القرح و تهدئة المعدة و الاسهال لانها بتحتوى على انزيم هضم طبيعى اسمه البابين و ده بيساعد على تكسير الاكل و التخلص من البقايا اللى ممكن يكون مسببه اضطراب للمعدة .

2- الشوفان :

الشوفان غنى بنوعين من الالياف القابلة و الغير قابلة للدوبان فى المية، و معدتك بتحتاج النوعين دول من الالياف علشان تهضم الاكل بشكل سليم، و كمان الشوفان بيقلل من نسبة الكوليسترول .

3- التفاح : 

واحده من اهم اكلات مريحه للبطن هى التفاح لانه غنى بالانزيمات الهاضمه و الانزيمات الغير قابله للدوبان و مادة البريستين اللى بيعملوا على انهم يكسروا الاكل و يتخلصوا من اجزاء الاكل اللى صعب هضمها .

4- القرفة :

القرفة بتستخدم عادة فى علاج غثيان الصبح فى حالة الحمل و كمان بتعالج الاسهال، و فعالة جدا فى تكسير الغازات اللى بتتكون فى المعدة بعد الهضم ، حاولى تعتمدى على القرفة فى اكلك بانك تستخدميها فى طبخ اللحوم و الفراخ و كمان فى الحلو زى على الرز بلبن او فطيرة التفاح.

5- الشمر :

الشمر مضاد و علاج طبيعى للغازات اللى بتتكون فى المعدة، علشان كده فى الهند بيقدموه فى المطاعم بعد الوجبات خصوصا لان الاكل الهندى معروف بأنه سبايسى و بيدخل فىيه بهارات كتيرة . حطى حوالى نص معلقة من الشمر على اكلك و هتحسي بفرق كبير . 

6- الافوكادو : 

بيعتبر الافوكادو من الفاكهه الغنية جدا بالبوتاسيوم و الالياف اللى بتريح البطن و تسهل من عملية الهضم ، ممكن تستخدمى شرائح من الافوكادو على سندوتشاتك اللى بتحبيها بدل من انك تستخدمى الكاتشب و المايونيز .

بكده تكونى عرفتى اكتر 6 اكلات مريحة للهضم ، دخليهم فى نظامك الغذائى و هتحسي بتحسن و فرق كبير :)