طريقة تقشير البشرة في البيت بمكونات طبيعية كأنك في ال SPA!
تقشير البشرة من الحاجات المهمة جدا اللي بتحتاجها البشرة عشان تجديدها و عشان نحافظ عليها نضرة وصحية, وتقشير البشرة في مراكز التجميل ال SPA بيتعمل في اكتر من خطوة منها البخار, والتدليك, واستخدام الكريمات لكن طبعا معظمنا مش بيبقي عنده وقت للأسف عشان نروح السبا بشكل منتظم ده غير إن كمان فيه كتير من بنات حوا بيعشقوا المكونات الطبيعية عشان ريحتها ومفعولها السحري عشان كده احنا النهاردة جايبين لكل بنات حوا خطوات تقشير البشرة زي مراكز التجميل بالظبط تقدري تعمليها في البيت بنفسك في أي وقت وباستخدام مكونات طبيعية متوفرة في البيت.
– خطوات تقشير البشرة:
1- التنضيف:
اول خطوة هنعملها هي تنضيف البشرة هنغسل بشرتنا والرقبة كويس جدا بالغسول المناسب لنوع البشرة عشان نشيل اي اتربة او اوساخ وبعد الغسيل ممكن نستخدم مزيل مكياج لو حاطين عشان يزيل او اي اثار مكياج من على البشرة.. تقدروا تشوفو من هنا افضل انواع غسول ومقشر البشرة.
2- البخار:
البخار خطوة مهمة جدا لانه بيفتح مسام البشرة وبيخليها مستعدة لاستقبال الماسكات والاستفادة بيها اكتر, حطي مية على النار وممكن تضيفي عليها اعشاب زي البابونج او البقدونس او ضيفي شرايح الخيار او الليمون وسيبي المية تغلي وبعدين ارفعيها من على النار وغطي راسك بفوطة وعرضي بشرتك للبخار لمدة 10 دقايق.
3- التقشير:
التقشير بيساعد على ازالة الجلد الميت من البشرة وبيجدد خلايا البشرة, بيكون بفرك البشرة بحركات دائرية بأطراف الصوابع ونركز اكتر حول الانف والجبين وعلى المناطق اللي فيها دهون زيادة, وبعدين نغسل البشرة كويس بالمية.. تقدروا تشوفوا من هنا وصفات طبيعية لتقشير الجلد.
4- تطبيق قناع البشرة:
الخطوة دي بعد ما جهزنا بشرتنا ونضفناها هنبدأ نحط اي ماسك على البشرة كلها ماعدا منطقة حوالين العين, ونسيبه من 10 – 20 دقيقة وبعدين نغسله.. ممكن تشوفو من هنا 5 ماسكات طبيعية لجمال ونضارة البشرة.
5- ترطيب البشرة:
اخر خطوة هتكون ترطيب البشرة كويس بالكريم المرطب المناسب لنوع بشرتك وحطي الكريم على البشرة كلها ومتنسييش الرقبة لاننا دايما بننساها في الماسكات او الترطيب حطي الكريم المرطب على الاماكن المكشوفة كلها.. اعرفي من هنا افضل انواع مرطب البشرة حسب نوع كل بشرة.
– تعالوا نعرف الماسكات الطبيعية اللي ممكن نستخدمها:
1- العسل:
– العسل من اكتر المكونات المناسبة للبشرة الجافة لانه يعتبر مرطب طبيعي, ممكن تستخدمي اي نوع عسل نحل تحطيه على البشرة وتسيبيه 10 دقايق وبعدين تغسليه بمية دافية, وممكن كمان تعملي زيت زيتون على البشرة بنفس الطريقة.
– او تخلطي زيت الزيتون مع عسل نحل وخل بكميات متساوية وتحطيهم على البشرة وتسيبيهم لمدة 15 دقيقة, وبعدين تغسلي البشرة بمية دافية.
2- الزبادي:
الزبادي من الحاجات المفيدة جدا للبشرة والميزة فيه انه مناسب لاي نوع بشرة, حطي طبقة رقيقة من الزبادي على البشرة وسيبيها 10 دقايق على الاقل وبعدين اغسلي بشرتك ونشفيها ورطبيها.
3- الشوفان:
– الشوفان معروف انه مقشر وبيجدد البشرة, نطحن الشوفان في الخلاط لحد ما يبقى عندنا دقيق ناعم نضيف عليه مية لحد ما تتكون عندنا عجينة قوامها مناسب نحطها على البشرة ونسيبها عشر دقايق وبعدين نغسله.
– وممكن تعجني دقيق الشوفان بمية دافية وتحطي عليه اضافات تانية زي النعناع او الريحان او الزعتر او اكليل الجبل, وكل الاضافات دي مناسبة لكل انواع البشرة, او نضيف ليمون او بقدونس للبشرة الجافة, او المرمرية للبشرة الدهنية.
4- بذور الكتان:
بذور الكتان غنية اوي بالاوميجا 3 المفيدة جدا لتجديد خلايا البشرة وبتحافظ عليها صحية, وهنعمله بطريقة بسيطة جدا هنجيب بذور الكتان ننقعها شوية في المية لحد ما نلاقي البذور حجمها كبر وطريت هناخدها نحطها على البشرة ونسيبها لحد ما ينشف وبعدين نغسله بمية دافية.
5- بياض البيض:
بياض البيض فيه عناصر كتير بتساعد على تغذية وشد البشرة, هنحطه بس على البشرة لوحده من غير اي اضافات ونسيبه لحد ما ينشف وبعدين نغسله.
6- طين البحر الميت:
من الحاجات المفيدة اوي كمان طين البحر الميت وهنلاقيه عند العطار, نجيبه ونعجنه بالمية لحد ما يتكون عندنا عجينة نحطها على البشرة ونسيبها لحد ما تنشف وبعدين نغسل البشرة.