8 اسرار مكياج من خبراء التجميل لمكياج عيون مثالي
مكياج العيون من الخطوات المهمة اللي لازم نهتم بيها اوي في مكياجنا لانه بيظهر جمال الوش كله, بس اكيد مش لازم تكوني محترفة عشان تطلعي مكياج عيونك بشكل حلو ومثالي لان احنا النهاردة جايبين لكل بنات حوا مجموعة اسرار من خبراء التجميل والمتخصصين في المكياج تعتبر هي المفتاح لمكياج عيون ناجح.
تعالوا نعرف مع بعض 8 اسرار مكياج من خبراء التجميل لمكياج عيون مثالي:
1- رسمة الحواجب:
العيون عشان تظهر بشكل حلو لازم اننا نهتم برسمة الحواجب لانها بتحدد شكل العين اكتر وبتظهرها ومش بس شكل العين كمان بتأثر على شكل الوش كله, الحواجب ممكن توسع العين وممكن تضيقها على حسب احنا رسمينها ازاي, عشان كده لازم نهتم اوي برسمه الحاجب ونختار الرسمة الصح اللي تليق على وشنا, ممكن نستخدم قلم الحواجب, او جل الحواجب عشان ندي حجم وسمك اكبر للحاجب ونظهره.. تقدري تشوفي من هنا رسمة الحواجب المناسبة لشكل كل وش.
2- استخدمي قلم كحل ابيض:
من الحاجات اللي بتدي وسع للعين اوي وبتديها لوك مشرق هو قلم الكحل الابيض او باللون العاجي او اللؤلؤي الالوان دي بتدي للعين وسع ولوك حلو جدا.
3- استخدمي هايلايتر:
عشان تنوري العين وتظهري شكلهم استخدمي الهايلايتر او ايشادو بلون اللؤلؤ, وانسب الاماكن اللي ممكن تحطيهم فيها عشان يبقى شكله حلو ويظهر العين هي عضمة الحاجب, والزاوية الداخلية للعين, ووسط الجفن.
4- استخدمي اداة تني الرموش Lash Curler:
من افضل الحيل اللي بتدي طول اكتر للرموش وبتظهر شكل العين هي استخدام اداة تني الرموش استخدميها على الرموش قبل تطبيق الماسكارا, ولما تيجي تحطي الماسكارا ابدأي من الجذور واطلعي واحدة واحدة بالفرشة على الرموش, ممكن كمان تستخدمي الرموش الصناعية عشان تظهري شكل العين اكبر.. اعرفي من هنا ايه هي اداة تني الرموش ونصايح في استخدامها.
5- حطي ايشادو بيج:
الالوان الفاتحة للايشادو من افضل الالوان اللي ممكن نختارها عشان تدي وسع للعين وفي نفس الوقت تمشي مع اي حد ومع اي لون عين, ممكن نطبق اللون البيج الفاتح على الجفن المتحرك كله ونجيب لون اغمق درجة نحطه بس على الزاوية الخارجية للعين وبعدين ارجعي حطي اللون الفاتح تاني على تنيه الجفن ده هيساعد جدا انه يبرز شكل العين ويظهرها.
6- استخدمي ايشادو غامق على خط الرموش:
من الحيل اللي ممكن تعمليها عشان تظهر شكل العين اكتر انك تحطي لون ايشادو غامق على خط الرموش اللي فوق واللي تحت وتدمجيها كويس لحد ما تخفي الخط اللي ما بين اللون الغامق والفاتح يعني يبقوا الاتنين متداخلين في بعض.
7- استخدمي ايشادو باللون الازرق:
اللون الازرق من الالوان اللي بتظهر شكل العين وتحددها اوي واللون دي يليق جدا مع اللي العيون البني, والخضرا, والزرقا بيطلع حلو اوي على التلات الوان دول بالذات وبيدي العين عمق اكتر.. اعرفي من هنا الوان الايشادو اللي تليق مع لون عينيكي.
8- متخافيش من استخدام الالوان:
في بنات كتير بتخاف تجرب او تستخدم الوان ايشادو جديدة لكن حاولي تغيري وتجددي وتستخدمي الوان مبهجة تظهر شكل عينيكي اكتر, ولو انتي محتارة اوي في اختيار الالوان اختاري لون بنفس درجة لون قزحية العين بتاعتك “اللي هي الدايرة الكبيرة بتاعة العين” وحطيه كلون اساسي وكملي لوك مكياج العيون بألوان تانية تمشي معاه.