5 فوايد لصحتك و جمالك من الشور البارد مكونتيش تعرفيهم قبل كده

لو انتى من البنات اللى بتحب تاخد كل يوم الصبح شور سخن ينشطها و يفوقها من اى كسل او تعب و يحسسك بالانتعاش وأنك جاهزة تبدأى يومك، يبقى تعالي اقري معانا الموضوع ده اللى هيخليكى تغيري رأيك خالص و تجربي الشور البارد.. ده عشان الشور البارد له فوايد و مزايا اكتر لجسمك و صحتك مش هتخليكى تستغنى عنه كل يوم الصبح لو بتقدرى تستحملى المية الباردة ..

5 فوايد لصحتك و جمالك من الشور البارد مكونتيش تعرفيهم قبل كده 

1- الشور البارد بيحارب البرد و الانفلونزا :

فى دراسة عملوها علماء المناعة فى التشيك بتقول انه الرجاله اللى بياخدوا شور بارد درجة حرارة المية فيه 14 درجة تلات مرات فى الاسبوع فى خلال 6 اسابيع بيلاحظوا انه عدد كرات الدم البيضاء اندفع عندهم بشكل كبير و ملحوظ. لانه خلال الاستحمام المية الباردة جسمك بيحاول يدفى نفسه فبيبدأ يشتغل الجهاز المناعى و بالتالى عدد كرات الدم البيضاء بتزيد فمن خلالها بيقدر جسمك يحارب اى عدوى و خصوصا البرد و الانفلونزا . و كمان بتحارب الفيروسات و السموم فبتبدأى تحسي انك منتعشة و نشيطة بسبب تدعيم جهازك المناعى ، فلو حاسه انك داخلة على دور برد احسن حاجه تعمليها انك تدخلى تاخدى شور بارد ، او انك تحاولى تاخدى شور بارد من وقت للتانى خلال الاسبوع .

2- تنشيط الدورة الدموية : 

 جسمك كله بيبقى مشدود تحت المية الساقعه و ده مفيد ليكى لانه لما جسمك بيحس المية الساقعه نازلة عليه الشرايين بتنكمش تحت الجلد ، و الانكماش ده بيجبر الدم انه يعدى فى شرايين اضيق نوعا ما وعلشان جسمك يقدر يحافظ على الاعضاء المهمة دافية  فبيزود من اندفاع الدورة الدموية للجسم وده هيخلى جسمك و بشرتك صحيين اكتر . حاولى انك تنوعى الشور بتاعك بين سخن و بارد من وقت للتانى . و ممكن كمان تحسنى من الدروة الدموية لجسمك أنك بعد حمامك السخن تنزلى تحت المية الباردة و تفضلى وقت قليل زى دقيقة مثلا . ده تكنيك بيبقي موجود في ال spa اسمهplunge pool وبيبقي pool صغير فيه مايه ساقعة قوي وبينصحوا بالنزول فيه بعد الخروج من السونه أو الستيم.

3- الشور البارد هيساعدك تخسى : 

تغيير درجة حرارة الشور الصباحى بتاعك ممكن يساعدك انك تخسي و يبقى الدايت بتاعك فعال اكتر، الابحاث بتقول انه المية الباردة هتخليكى ترتعشى من حوالى 10لـ 15 دقيقة ده بيساوى انك تعملى تمارين اليوم بتاعتك بالضبط. وكمان هيساعدك فى انك تزودى نسبة الدهون المفيدة فى جسمك Brown fat اللى بيزود من الطاقة  و تقللى من نسبة الدهون المضرة  White fat . 

4- الشور البارد هيلمع شعرك: 

لو بتعانى من الشعر الجاف و المتكسر ، الحل مش فى البلسم و بس لكن كمان الشور البارد هيساعدك شكل كبير،. لما بنغسل الاطباق بمية سخنة بنلاحظ انه ايدينا بقت مكرمشة وخشنة ، هو ده بالضبط اللى بتعمله المية السخنة لشعرك لانها بتسحب اى ترطيب من  فروة الرأس .علشان كده بننصحك انك تحاوى تغسلى شعرك بمية باردة على قد ما تقدرى علشان تحمى بشرتك و شعرك من الخشونة و الجفاف، مع الوقت هتلاحظى بلمعان اكتر فى شعرك و بشره انعم و لو عندك مشكلة مع حب الشاب ممكن تلاحظى تحسن فيها .

5- تحسين المود: 

ممن تفكرى انه شور ساقع الصبح اول ما تقومى من النوم فكرة مش لطيفة، لكن الحقيقة انه دى هى افضل بداية ليومك لانه الشور البارد بيحسن من المود و بيعزز النشاط بشكل كبير، لانه المية البارد بتحفز المخ انه يفرز مادة اسمها noradrenaline و المادة  دى هى المسؤولة عن تحسين المود ، لانه اول ما المية الباردة بتلمس البشرة الاطراف العصبية بتحسها فورا و بالتالى بتنبه المخ و الجسم كله فبتخليكى انشط و فى مود احسن . 

اعرفي معانا ازاي تغيري حياتك للأفضل في شهر واحد بس !