اعرفي معانا طرق لعمل مزيل مكياج طبيعي بنفسك في البيت

بقلمريهام محمود فيمكياج visibility17600

كلنا عارفين قد ايه ازالة المكياج من الخطوات المهمة جدا اللي لازم نعملها عشان نحافظ على صحة بشرتنا لاننا لو كسلنا في ازالة المكياج او نمنا بيه ده بيسبب مشاكل كتير للبشرة لانه هيتسبب في سد مسام البشرة وبالتالي ده هيسبب ظهور البثور والحبوب وهيخلي البشرة شكلها مش صحي بشكل عام عشان كده لازم نتهم جدا بخطوة ازالة المكياج, وتوفيرا للفلوس لان اكيد مش كلنا عندنا ميزانية اننا نجيب كل حاجة وكمان عشان نحافظ على بشرتنا اكتر بالحاجات الطبيعية جايبين النهاردة لكل بنات حوا اكتر من طريقة لعمل مزيل المكياج في البيت بمكونات طبيعية وبسيطة ومش مكلفة.

تعالوا نعرف مع بعض طرق عمل مزيل مكياج طبيعي:

1- الوصفة الاولى:

الوصفة الاولى بتحتوي على اربع مكونات هي مية الورد, وزيت الجوجوبا, وزيت الزيتون, ومية, والمكونات دي كلها ليها تأثير فعال مش بس في ازالة المكياج كمان في تنضيف البشرة من البكتيريا, منع تلف خلايا البشرة, وبتقلل من مسام البشرة, بتحمي من البشرة من التجاعيد وبتحفز انتاج الكولاجين, بترطب البشرة, بتحميها من الجفاف وبتهديها من اي التهاب او تهيج.

المكونات:

– 4 معالق كبيرة مية ورد.

– 2 معلقة كبيرة زيت الجوجوبا.

– 2 معلقة كبيرة زيت زيتون.

– 3 معالق كبيرة مية.

الطريقة:

هنجيب اي ازازة صغيرة فاضية عندنا وهنحط فيها مية الورد مع زيت الجوجوبا وزيت الزيتون والمية ونقفلها ونرجها كويس عشان نخلط المكونات مع بعض وكده يبقى المزيل جاهز عندنا للاستخدام وقبل كل استخدام نرج الازازة ونجيب قطنها نبلها بالخليط وتمسحي بشرتك كلها هتزيل كل اثار المكياج من البشرة والعيون.

مزيل مكياج طبيعي
مزيل مكياج طبيعي

2- الوصفة التانية:

المكونات:

– 56 جرام زيت جوجوبا “تقريبا ¼ كوباية”.

– كبسولة زيت فيتامين E.

– 3 نقط من اي زيت عطري.

الطريقة:

هنجيب اي برطمان او ازازة فاضية هنحط فيها زيت الجوجوبا ونضيف له كبسولة فيتامين E والزيت العطري ونرج الازازة عشان نخلط المكونات, ونستخدمه على قطنة لازالة مكياج البشرة ومكياج العيون.

مزيل مكياج طبيعي
مزيل مكياج طبيعي

3- الوصفة التالتة:

الوصفة دي لازالة مكياج البشرة والعيون بشكل خاص وكمان بيزيل الماسكارا اللي ضد المية, وغير انه مزيل بيخلي البشرة شكلها صحي, وبيمنع التجاعيد وشيخوخة البشرة.

المكونات:

– ¼ كوباية زيت زيتون.

– ¼ كوباية مية ورد.

المكونات:

هنخلط زيت الزيتون ومية الورد نحطهم في ازازة مع بعض ونرجها عشان نخلطهم كويس, وكده يبقى المزيل جاهز عندنا ونرجه قبل كل استخدام ونستخدمه بنفس الطرق اللي قبل كده.

مزيل مكياج طبيعي
مزيل مكياج طبيعي

4- الوصفة الرابعة:

المكونات:

– زيت بيبي جونسون.

– شامبو جونسون للاطفال.

الطريقة:

هنخلط كميات متساوية من زيت بيبي جونسون وشامبو جونسون للاطفال والكمية حسب ما احنا عايزين وممكن نضيف لهم مية “اختياري” هنحطهم مع بعض في ازازة ونرجها ونستخدمه لازالة مكياج البشرة والعيون.

 ممكن كمان نستخدم زيت بيبي جونسون لوحده كمزيل للمكياج.

مزيل مكياج طبيعي
مزيل مكياج طبيعي

5- الوصفة الخامسة:

الوصفة دي مزيل لمكياج العيون وهي باستخدام مكون واحد بس هو زيت جوز الهند هنجيب الزيت وناخد منه على صوابعنا ندلك بيه فوق العيون والرموش وبعدين نجيب قطنة ونمسح بيها كل المكياج اللي على العين والرموش وبيزيل كمان المكياج الووتر بروف او اللي ضد المية.

مزيل مكياج طبيعي
مزيل مكياج طبيعي

اعرفي كمان 11 غلطة بنعملها في ازالة المكياج

11 غلطة بنعملها فى ازالة المكياج
11 غلطة بنعملها فى ازالة المكياج