اعرفي معانا ازاي تستخدمي الثوم لعلاج حب الشباب والندبات الناتجه عنه
حب الشباب من المشاكل اللي بيعاني منها معظم البنات ومشكلته انه بيستمر معانا من سن المراهقة لحد سن البلوغ يعني مالوش سن معين ممكن يروح او يختفي فيه من البشرة, وكتير بيعانوا من حب الشباب مش بس في الوش كمان في الرقبة ومنطقة الصدر والذراعين والضهر, واحنا النهاردة جايبين لكل بنات حوا اللي بيعانوا من حب الشباب في اي مكان في البشرة طريقة علاجه بالثوم وليه الثوم بيساعد على علاج حب الشباب ؟ وازاي نستخدمه.
– ليه الثوم بيساعد في علاج حب الشباب ؟
1- الثوم غني بالعناصر المضادة للبكتيريا والفيروسات, وفيه خصائص بتمنع انسداد المسام اللي بتسبب ظهور حب الشباب, وبالتالي بيساعد على علاجة وكمان الوقاية منه وتقليل ظهوره.
2- كمان الثوم فيه مواد مضادة للاكسدة اللي بتساعد على مكافحة الجذور الحرة اللي بتسبب تجاعيد البشرة وتلف الجلد.
3- الثوم بيحتوي على مادة الاليسين اللي بتقتل البكتيريا اللي بتسد مسام البشرة وبتسبب حب الشباب, ومضادات الالتهاب اللي بيحتوي عليها الثوم بتساعد على منع الالم والالتهاب اللي ممكن يسببه حب الشباب.
4- بيساعد على تحسين الدورة الدموية وده بيساعد الجلد انه يستقبل كل الفيتامينات والمعادن الضرورية اللي محتاجها بشكل صحيح وبالتالي بيحافظ على صحة الجلد.
5- الثوم بيحتوي على مركبات الكبريت اللي تعتبر عنصر تجفيف لحب الشباب, وبتساعد على علاجه وكمان بتزيل الندوب اللي بتنتج عنه.
6- غني بالمصادر اللي بتساعد على مكافحة حب الشباب زي فيتامين سي وبي 6, والمعادن والسيلينيوم والنحاس والاليسين والزنك وغيرها من المواد المغذية اللي بتسيطر على حب الشباب وبتمنع ظهوره.
– ازاي نستخدم الثوم لعلاج حب الشباب:
الثوم ممكن نستخدمه باكتر من طريقة ممكن نستخدمه لوحده او مع مكونات تانية في وصفات لعلاج ومنع حب الشباب, ممكن تدخليه في نظامك الغذائي وكل اكلك بشكل يومي, ممكن تندغي كل يوم فص ثوم تلات مرات في اليوم بشكل منتظم بيساعد جدا في علاج حب الشباب.
تعالوا نشوف مع بعض مجموعة وصفات بالثوم لعلاج حب الشباب:
1- وصفة فصوص الثوم:
هنجيب تلات فصوص ثوم نهرسهم ناعم ونحطه على البشرة او على الاماكن اللي فيها الحبوب لمدة دقايق وبعدين نغسله بمية باردة, وننشف البشرة ونحط كريم مرطب, كرري الوصفة دي يوميا بانتظام لحد ما تتخلصي من الحبوب, بس لو بشرتك حساسة اوي متعمليش الوصفة دي.
2- وصفة الثوم والمية:
– هنهرس 3 فصوص ثوم كويس جدا لحد ما نخرج منه العصير, هنضيف الثوم لكوباية مية ونقلبها كويس ونسيبها من 10 – 12 دقيقة, بعد كده هنجيب قطنة نبلها من المية دي ونمسح بيها بشرتنا او الاماكن اللي فيها حب شباب ونسيبها على البشرة لحد ما تنشف خالص وبعدين نغسلها بالمية, وممكن المية اللي نستخدمها مع الثوم تكون مية دافية, كرري الوصفة يوميا.
– في طريقة تانية ممكن نهرس الثوم ناعم جدا وبعدين نحط معاه ملعقة كبيرة مية ولو بشرتك حساسة يبقى زودي المية يعني الطريقة الاولى هتبقى انسب للي بشرتهم حساسة, وبعدين نفرك الخليط على البشرة ونسيبه من 10 – 15 دقيقة لو اول مره تعملي الماسك وبعد فترة من استخدامه ممكن تنامي بيه وتغسليه الصبح بالمية.
3- وصفة الثوم والزبادي:
– هنهرس 4 فصوص ثوم ناعم ونضيف عليهم معلقة كبيرة زبادي ونقلبهم مع بعض كويس ونحط الخليط على البشرة وندلكه لمدة دقايق وبعدين نسيبه لحد ما ينشف ونغسله بالمية.
– ممكن نعمله بطريقة تانية هنخلط ½ معلقة صغيرة ثوم مفروم مع معلقة صغيرة عسل نحل و2 معلقة كبيرة زبادي هنقلب المكونات مع بعض كويس ونحط الخليط على البشرة ونسيبه من 20 – 30 دقيقة وبعدين نغسله, ممكن نحط بدل الثوم المفروم زيت الثوم من 2- 4 نقط.
4- وصفة الثوم وخل التفاح:
هنهرس 3 فصوص ثوم ناعم اوي لحد ما نخرج منه العصير ونضيف عليه كمية مساويه ليه من خل التفاح ونقلبهم كويس, هنجيب قطنة نبلها من الخليط ونمسح بيها اماكن الحبوب ونسيبه من 5 – 10 دقايق وبعدين نغسله بمية دافية, كرري الوصفة يوميا.
5- وصفة الثوم وزيت الزيتون:
– هنهرس 4 فصوص ثومم ناعم ونضيف عليهم 4 معالق كبيرة زيت زيتون ونحط الخليط ده في ازازة محكمة الغلق ونسيبه في التلاجة 48 ساعة, كلي معلقة كبيرة من الخليط واشربي معاه مية مرتين في اليوم, ولنتايج احسن اشربي 8 كوبايات مية في اليوم لان المية بتساعد على تحسين البشرة مع الخليط.
– وممكن تعملي الخليط كماسك تحطيه على البشرة ربع ساعة وبعدين تغسليه بمية باردة, كرري الوصفة يوميا.
6- وصفة الثوم وصبار الالوفيرا:
– هنفرم من 3 – 5 فصوص ثوم ناعم لحد ما نخرج منه العصير هناخد العصير بس نخلطه مع 2 معلقة صغيرة جل الالوفيرا, دلكي بشرتك بالخليط ده وبعدين نسيبه 15 دقيقة ونغسله بالمية, كرري الوصفة يوميا.
– ممكن نعمله بطريقة تانية هننقع من 2 – 3 فصوص ثوم مهروسين في شوية مية لمدة من 10 – 15 دقيقة وبعدين نحط عليهم معلقة صغيرة جل الصبار ونقلبهم كويس مع بعض ونحط الخليط على البشرة ونسيبه لحد ما ينشف ونغسله بالمية, كرري الوصفة يوميا.
7- وصفة الثوم والعسل والكركم:
هنهرس 6 فصوص ثوم ونضيف لهم 3 معالق صغيرة من عسل النحل و1/4 معلقة كركم, نقلب المكونات كويس ونحط الخليط على البشرة ونسيبه لحد ما ينشف وبعدين نغسله بالمية, كرري الوصفة يوميا.
8- وصفة زيت الثوم:
– هنجيب زيت الثوم وبقطنة نبلها بالزيت ونمسح بيها على اماكن الحبوب وندلكها بالراحة ونسيبه على البشرة 10 دقايق ونغسله وممكن نسيبه على البشرة من بالليل للصبح واغسليه بمية دافية وغسول مناسب لبشرتك, كرري الوصفة يوميا.
– وممكن نعمله بطريقة تانية هنخلط من نقطتين زيت ثوم مع نقطتين من زيت الصفصاف, وبقطنة نمسح على اماكن الحبوب بالخليط ونسيبها دقايق وبعدين نغسلها بالمية.
9- وصفة الثوم وبياض البيض:
بياض البيض غني جدا بالعناصر المغذية اللي بتحافظ على الجلد صحي, وبتقلل المسام الواسعة في البشرة, وبتقلل من الدهون الزيادة.
هتجيبي الثوم تقطعيه شرايح او تسمي الفص نصين وتفركي بيه البشرة لحد ما العصير بتاعه يطلع على بشرتك سيبيه 5 دقايق لحد ما ينشف وبعدين حطي عليه بياض البيض وسيبيه لحد ما ينشف وبعدين اغسليه بمية دافية, كرري الوصفة يوميا.
10- وصفة الثوم والزيت:
هنفرم 3 فصوص ثوم ونجيب زيت زيتون او زيت جوز هند ونحطه على نار هادية ونضيف ليه الثوم المفروم ونخليهم مع بعض على النار لمدة 15 دقيقة مع التقليب المستمر لحد ما الثوم يبقى لونه بني نرفعه من على النار ونسيبه يبرد وناخد منه بصوابعنا وندلك بيه البشرة ونسيبه 30 دقيقة وبعدين نغسله بمية دافية وممكن نسيبه من بالليل للصبح على البشرة, كرري الوصفة يوميا, ممكن تحتفظي بالخليط ده في ازازة محكمة الغلق في التلاجة وممكن يقعد معاكي تلات ايام.
– طرق اكل الثوم لعلاج حب الشباب:
1- الطريقة التانية لعلاج حب الشباب بالثوم هي عن طريق اكله يعتبر علاج فعال جدا في حب الشباب, وبيقوي جهاز المناعة, وبيحسن كمان الصحة كلها بشكل عام, افضل طريقة للعلاج انك تاخدي كل يوم 3 فصوص ثوم مرة واحدة في اليوم لمدة شهر للتخلص من المشكلة نهائيا.
2- وممكن ناكله باكتر من طريقة ممكن نفرم فصين ثوم كويس جدا لحد ما يخرج منه العصير ونضيفه لكوباية مية او عصير ونشربه مرة في اليوم بالليل قبل النوم.
3- ممكن نجيب كام فص ثوم ونقطعهم شرايح وناكل منهم على مدار اليوم اكتر من مرة, او ممكن تضيفي شرايح الثوم للسلطة او اي اكل انتي هتاكلي منه.
4- ممكن تفرمي الثوم وتضيفي له عصير تفاح لحد ما يتكون عندك عجينة , وكلي منها مرة واحدة في اليوم, وممكن بدل عصير التفاح تحطي مع الثوم جبنة بيضا اي نوع او زبادي وتاكليها مرة في اليوم.
5- في طريقة تانية كمان اننا نفرم كام فص ثوم بس نسيبه خشن شوية يعني يبقى قطع صغيرة ونحطه في طاسه نحمره لحد ما لونه يبقى بني وبعدين نضيف له زيت زيتون واي نوع جبنه وفلفل اسود وقلبيهم مع بعض كويس وكلي الخليط يوميا مرة في اليوم.
– وصفات بالثوم لعلاج ندبات حب الشباب:
الثوم مش بس بيعالج حب الشباب كمان بيساعد على علاج ندبات حب الشباب او الحفر اللي بتسببها الحبوب على البشرة لانه غني بالمواد المضادة للاكسدة اللي بتمنع الجذور الحرة اللي بتتسبب في ندبات حب الشباب, كمان غني بالكبريت والزنك وفيتامين اي اللي بيساعد على تكوين انسجة الجلد السليم لانه بيمسح خلايا الجلد القديمة والميتة, وبيجدد خلايا البشرة وبالتالي بيساعد في علاج ندبات حب الشباب.
1- وصفة الثوم وزيت الزيتون والعسل:
– ممكن تعملي الثوم لوحده اغسلي وشك بمية دافية ونشفيه وهاتي فصين ثوم افرميهم ناعم واخلطيهم مع مية ودلكي البشرة بالخليط لمدة دقايق وبعدين سيبيه على البشرة 5 دقايق واغسليه بالمية.
– الطريقة التانية هنفرم فصين ثوم ونضيف لهم 2 معلقة صغيرة زيت زيتون ومعلقة كبيرة عسل نحل, نخلطهم مع بعض كويس وناخد الخليط نحطه على اماكن الندبات ونسيبه من 20 – 25 دقيقة ونغسله بمية دافية.
2- وصفة الثوم المغلي:
الوصفة دي بتساعد على علاج ندبات واي اثار من حب الشباب.
هنفرم من 4 – 5 فصوص ثوم ناعم وبعدين هنحط 250 مل “تقريبا كوباية” من المية على النار ونسيبهم يغلوا وبعدين نضيف لها الثوم اللي احنا فرمناه ونسيبه يغلي معاه من 30 – 35 دقيقة نرفعه من على النار ونسيبه يبرد, هناخد من الخليط ده نحطه على البشرة ونسيبه لحد ما ينشف وبعدين نغسله بالمية, كرري الوصفة يوميا.
– النصايح والتحذيرات في استخدام وصفات الثوم:
– لو بشرتك حساسة اتأكدي انك تخلطي الثوم بالمية او بمية الورد او العسل او زيت الزيتون يعني متحطيهوش خام لوحده عشان تقللي من تأثيره على البشرة, ومتسيبيش الثوم فترة طويلة على البشرة لانه ممكن يجيب تيجة عكسية بس فترة زي اللي محددنها في الوصفات متزوديش عنها.
– الحوامل ميجربوش الوصفات دي الا باستشارة دكتور, وكمان الاطفال ميستخدموش الوصفات.
– ونأكد تاني على النقطة دي لو بشرتك حساسة ومش هتقدري تحطي الثوم على البشرة يبقى ممكن تدخليه بشكل يومي في نظامك الغذائي مع اكلك, وا تاخديه بطرق الاكل اللي احنا قولناها.
– استخدمي الثوم الطازة مش المحفوظ لان الثوم الطازة افيد وبيبقى محتفظ بكل العناصر بتاعته بعكس المحفوظ.
– جربي اي وصفة على جزء صغير من البشرة زي ما بنقول دايما عشان تتأكدي ان بشرتك مش حساسة منه ومش هيسبب اي مشاكل, وبالنسبة لاكله متاكلوش منه كميات كبيرة بس زي الكميات اللي احنا قايلينها في الوصفات.
– لو في اي حد بياخد ادوية معينة لاي حاجة الافضل تستشيري الدكتور قبل ما تاخدي الثوم باي طريقة عشان تتأكدي انه مش بيتعارض مع اي علاج, وكمان لو حد عامل جراحة او عملية يتجنب استخدام الوصفات والطرق دي.
– عشان نتخلص من ريحة الثوم من على البشرة نمسحها بعد الماسك بزيت زيتون او ليمون, او ننقع الثوم قبل ما نستخدمه في شوية لبن ساعة على الاقل وبعدين نستخدمه في الماسك.
– وعشان نتخلص من ريحة الثوم في الفم نغسل سنانا بالمعجون بعد ما ناكل الثوم على طول.
– المفروض ان نتيجة العلاج هتبدأ تظهر بعد 10 ايام من الاستخدام, بس طبعا بيختلف من بشرة للتانية ممكن بشرة تاخد وقت اطول شوية.
– وطبعا لافضل النتايج نستخدم الثوم مع نظام غذائي صحي لان الاكل اللي بناكله بيأثر على بشرتنا, ونمارس رياضة بانتظام, نتجنب اكل السكر بكميات زيادة, ونتجنب الكربوهيدارت او النشويات لانها بتزود الحبوب, وكلي فاكهة وخضار طازة كتير, اشربي مية كتير على الاقل 8 كوبايات في اليوم.
شوفوا كمان طريقة شامبو الثوم لعلاج تساقط الشعر
