نصايح فعالة هتساعدك على خسارة الوزن بشكل صحي وبسرعة في شهر واحد بس !

ريهام محمود

في

8387

كلنا عارفين ان زيادة الوزن مشكلة مش بس بتأثر على شكل الجسم لكن كمان تأثيرها بيكون على الصحة بشكل عام عشان كده لازم نحافظ دايما على رشاقتنا لان ده هينعكس بشكل ايجابي على صحتنا, لكن تخسيس الوزن مش بيعتمد بس على الانظمة الغذائية لكن في حاجات لازم نعملها ونغيرها في اسلوب حياتنا عشان الرجيم يجيب النتيجة اللي احنا منتظرينها منه وكمان لازم الحاجات دي تكون اسلوب حياتنا اللي نمشي عليها على طول عشان نحافظ على وزننا ومنرجعش نزيد تاني.

تعالوا نعرف مع بعض نصايح هتساعدك على خسارة الوزن في شهر واحد بس:

1- كلي لحمة اقل ونظمي وجباتك الاسبوعية:

حاولي تقللي من اكل اللحوم وخصوصا اللي فيها دهون يعني ناكل كمية بسيطة كفاية جدا هتدينا نسبة البروتين اللي احنا محتاجينه وناكل وجبات خفيفة صحية اكتر, وكمان مناكلش بشكل عشوائي من غير ما نحدد احنا بناكل ايه ممكن ننظم وجباتنا خلال الاسبوع كل يوم هناكل ايه عشان نقدر نسيطر على السعرات الحرارية اللي بتدخل جسمنا.

2- حددي هدفك وخليكي واقعية:

حددي انتي عايزة تخسري وزن قد ايه بالظبط وحددي لنفسك توقيت بس المهم يكون توقيت واقعي يتناسب مع كمية المجهود اللي انتي بتبذليه او الرجيم اللي انتي ماشية عليه يعني مثلا متتوقعيش انك تخسي 20 كيلو في شهر لان ده غير واقعي خالص ومش هيتحقق وساعتها هيجيلك احباط ومش هتكملي لكن لو مشيتي على نظام غذائي مظبوط ومارستي رياضة بانتظام ممكن في الحالة دي تخسي 7 كيلو في شهر بطريقة صحية جدا.

3- احسبي سعراتك الحرارية:

احسبي السعرات الحرارية اللي لزماكي في اليوم عشان متاكليش اكتر منها ووزنك يزيد, واعرفي انه 3500 سعر حراري في الاسبوع بتساوي على طول 2 كيلو, عشان كده لازم تعرفي كمية السعرات اللي في اكلك وتقسميها بالتساوي على كل وجبة. تقدروا تعرفوا من هنا عدد السعرات الحرارية اللي المفروض تكتسبيها كل يوم.

4- اعملي نشاط بشكل يومي:

عشان تخسي بسرعة وبشكل صحي لازم تمارسي الرياضة بانتظام على الاقل 30 دقيقة يوميا, واختاري اي نشاط رياضي مناسب ليكي زي الجري, ونط الحبل, والرقص, والايروبكس, وتمارين الكارديو, واليوجا, يعني اي نشاط رياضي وممكن تنوعي وتمارسي اكتر من نشاط عشان متذهقيش, وممكن مثلا تتفقي مع اصحابك انكوا تمارسوا النشاطات دي مع بعض عشان تشجعوا بعض اكتر.

5- كلي اكل صحي وبطريقة صح:

كلي اكل صحي وخالي من الدهون وفي نفس الوقت يديكي العناصر اللي جسمك محتاجها يعني لو اكلتي بروتينات في وجبة الفطار يبقى قللي من كمية الكربوهيدرات في وجبة الغدا وده هيخليكي تستهلكي كل العناصر الغذائية اللي جسمك محتاجها بطريقة صحيحة, كلي ببطء واندغي الاكل كويس لان الاكل بسرعة بيخليكي تاكلي كتير وكمان بيأثر بشكل سلبي على عملية الهضم, وفي حاجة كمان مهمة يمكن متاخدوش بالكوا منها او تفكروا انها مش مؤثرة وهي موضوع بتاكلي فين ! بمعنى متاكليش غير في مكان الاكل على السفرة او في المطبخ يعني كلي في المكان المخصص للاكل بس لكن متاخديش الاكل مثلا وتاكلي قدام التليفزيون او قدام الكمبيوتر لان ده هيخليكي تاكلي كميات اكل كبيرة وانتي مش واخدة بالك.

6- قولي لا للمشروبات الغازية واستبدليها بالمية:

حاولي انك تبعدي عن المشروبات الغازية لان فيها نسبة عالية من السعرات الحرارية واستبدليها بشرب المية بكمية كبيرة يوميا لانها وسيلة طبيعية لكسر الغذاء والحفاظ على التوازن, لازم تشربي على الاقل 3 لتر مية يوميا.

7- كلي فاكهة كتير ومتعمليش اي حاجة وانتي بتاكلي:

زودي من اكل الفاكهة لانها بتساعد جدا على الهضم, وتعتبر بديل صحي للكربوهيدرات, وبتحافظ على رطوبة الجسم, وحاولي وانتي بتاكلي متشغليش نفسك بحاجة تانية ركزي في الاكل بس زي ما قولنا في النقطة السابقة لانها مهمة ومؤثرة جدا يعني متشتغليش او تتفرجي على التليفزيون او تقعدي قدام الكمبيوتر او تتكلمي في التليفون وانتي بتاكلي لان ده هيشتت انتباهك انتي اكلتي كمية اكل قد ايه وهيخليكي تاكلي كتير.