افضل 5 اماكن في الكف للعلاج بالضغط ممكن نتحكم بيهم في جسمنا !
العلاج بالضغط او المعروف بعلم المنعكسات العلاج ده بيعتمد على الضغط على اماكن في الايد بتكون متصلة باعضاء رئيسية في الجسم, بيكون كل جزء في الايد متصل بجزء معين في الجسم وبالضغط عليه في كف الايد بينعكس على الجزء المتصل بيه في الجسم, لان لما بنضغط على المكان بتتبعت اشارة من خلال الجهاز العصبي للمخ وبالتالي بيبدأ في حل المشكلة.
ومن خلال موضوعنا النهاردة هنقولكم على افضل خمس اماكن في الايد لعلاج الالم في الجسم منها الم المعدة, الام عظام الكتف, وعلاج الصداع, والعيون, وغيرها من الحاجات اللي هنعرفها مع بعض.
والعلاج بيبدأ الاول بتحديد المنطقة في الايد وبعدين تدلكيها بحركات دائرية بطيئة بصوباع الابهام, والايد اليمين خاصة بالاعضاء الموجودة في الجنب اليمين من الجسم, والايد الشمال خاصة بالاعضاء الموجودة في الجنب الشمال.
تعالوا نعرف مع بعض افضل 5 اماكن في الكف نتحكم بيهم في جسمنا:
1- لعلاج الام المعدة ومشاكل الهضم:
لو عندك اي مشكلة في معدتك الم, او امساك مزمن او اي مشاكل في الهضم, يبقى النقطة المتوضحة في الصورة دي هي اللي هتضغطي عليها بالابهام لان ده هو المكان المرتبط بالمعدة وبالتالي لما تضغطي عليه هتريح معدتك بشكل سريع.
2- لعلاج الام عظام الكتف:
لو عندك مشاكل او الم دايما بيجيلك في الكتف يبقى النقطة اللي في صوباعك الصغير زي ما متوضح في الصورة هو اللي هتضغطي عليه وزي ما قولنا الضغط يبقى بحركات دائرية بشكل بطيء, وللكتف اليمين اضغطي على الصوباع في الكف اليمين, وللكتف الشمال اضغطي على الصوباع في الكف الشمال.
3- لعلاج الصداع والمخ والعيون:
النقطة دي متصلة بالجزء اللي فوق او الاعضاء اللي في الراس زي المخ والعيون, يعني لو عندك صداع او عينيكي بتوجعك او مرهقة اضغطي على النقطة دي في الكف.
4- لعلاج مشاكل الرئتين والقلب والصدر:
لو عندك اي مشاكل او حاسة بتعب في منطقة الصدر او في الرئتين او القلب هي دي انسب نقطة للضغط عليها لكل المشاكل او الالم اللي بيجيلك في المناطق دي.
5- لعلاج مشاكل الكليتين والغدد:
لو عندك اي مشاكل في الكلى او في الغدد دي هتكون هي النقطة اللي هتضغطي عليها في الكف عشان تعالجي مشاكل الكليتين وحوالين الكليتين والغدد, ومننساش بردو للكلية اليمين الكف اليمين, والكلية الشمال الكف الشمال.