افضل الاسرار الجمالية من خبراء التجميل .. اعرفيها معانا
دايما كلنا بنقعد ندور على نصايح المكياج والحاجات اللي تقدر تفيدنا اننا نحط مكياجنا بطريقة صح ومحترفة, ومش بس نصايح المكياج كمان كل حاجة خاصة بالبشرة والشعر وجمالنا بشكل عام, عشان كده احنا النهاردة جمعنا لكل بنات حوا مجموعة من افضل الاسرار الجمالية من خبراء التجميل والمتخصصين في المكياج والبشرة والشعر.
افضل الاسرار الجمالية من خبراء التجميل:
1- ارسمي الايلاينر السايل بأسهل طريقة:
لو انتي مش محترفة في رسم الايلاينر السايل وبتلاقي صعوبة انك تظبطيه النهاردة جايبن لك طريقة سهلة لرسم الايلاينر السايل وهي انها هنرسم الاول خط بقلم الكحل على العين وبعدين نمشي عليه بالايلاينر السايل الطريقة دي هتسهل عليكي جدا رسمة العين وهتطلع معاكي مظبوطة من اول مرة, والطريقة دي مش بس هتظبطلك الرسمة كمان هتثبت الايلاينر فترة اطول من غير ما يسيح.
2- استخدمي مناديل امتصاص الدهون ال Blot Paper:
لو انتي بشرتك من النوع الدهني ومسببة لك مشكلة ودايما فيها لمعة استخدمي مناديل امتصاص الدهون خليها دايما في شنطتك واستخدميها خلال اليوم ودلوقتي في ماركات كتير منزلة منه زي كلين اند كلير و نيكس, وممكن زي ما قولنا قبل كده نستخدم ورق الزبدة اللي بيستخدم في الاكل ننشف بيه الدهون من بشرتنا, وفي كمان طريقة بالمناديل السميكة اللي بتيجي مع المشروبات في اي الكافية زي ستاربكس وغيره المناديل دي ممكن نستخدمها لامتصاص دهون البشرة يعني كل ما تروحي الكافية خدي المنديل في شنطتك واستخدميه للبشرة :).
شوفوا من هنا ازاي تستخدموا ورق الزبدة لامتصاص الدهون من البشرة.
3- لتنعيم الشعر بسرعة:
لو بتعاني من جفاف او خشونة الشعر وعايزة نتيجة سريعة طبقى اي ماسك للشعر من بالليل ونامي بيه لحد الصبح اغسليه, ده هيجيب معاكي نتيجة اسرع.
شوفوا من هنا 7 ماسكات بزيت الزيتون لحل كل مشاكل الشعر.
4- لمكياج عيون ناعم ومثير:
من اكتر حيل المكياج اللي بتدي شكل حلو جدا للعين, حطي الكحل على خط الرموش اللي فوق باللون الاسود, وخط الرموش اللي تحت حطي عليه خط باللون البني.
5- دفي اداة تني الرموش Lash Curler:
اداة تني الرموش بتدي طول اكتر وشكل احلى للرموش وعشان تديكي نتيجة احسن دفيها شوية قبل ما تستخدميها ممكن تحطيها شوية تحت مية دافية او تستخدمي السيشوار عليها من بعيد لمدة ثانية واحدة.
اعرفي من هنا ايه هي اداة تني الرموش Lash Curler ونصايح في استخدامها.
6- استخدمي قلم العين الابيض لتوسيع العين:
من اكتر الحيل الفعالة جدا عشان نبين العين شكلها اوسع هو استخدام قلم العين الابيض نرسم بيه جوه العين على خط الرموش اللي تحت الطريقة دي بتوسع العين وبتظهرها اوي.
7- اشربي مية كتير:
افضل حاجة للبشرة على الاطلاق هي المية حاولي انك تشربي كمية مية كفاية خلال اليوم لانها بتحافظ على نضارة البشرة وبتخليها صحية وناعمة وبتحافظ على رطوبتها.
8- حافظي على نضافة ايديكي:
من اكتر الحاجات اللي ممكن تضر البشرة هي الايد لان طول ما احنا بره او قعدين على الكمبيوتر بنحط ايدينا على وشنا وكل البكتيريا بتتنقل من الايد للبشرة عشان كده لازم نحافظ دايما على نضافتها ممكن نخلي جنب الكمبيوتر دايما مطهر الايد اللي بيتباع في الصيدلية ونستخدمه كل فترة, ولما نخرج نخليه في شنطتنا عشان نستخدمه خلال اليوم.
9- حافظي على شعرك وانتي نايمة:
كلنا بتقابلنا مشكلة اننا نعمل ايه في شعرنا واحنا نايمين عشان نصحى الصبح نلاقيه حلو ومش بايظ ومياخدش مننا وقت قبل الخروج, احسن حاجة اعمليه كحكة او عقدة عالية وثبتيها كويس بالبنس هتصحي الصبح هتفكيها هتلاقي شعرك زي ما هو, وممكن تستخدمي الشامبو الجاف على الجذور عشان تديه لوك فريش اكتر.
10- حافظي على بشرتك من الجفاف:
عشان تحافظي على بشرتك من الجفاف ممكن تستخدمي نوعين غسول مختلفين استخدمي نوع جل تقيل بالليل والصبح ممكن تستخدمي نوع اخف يكون اساسه او مكوناته من اللبن, لان ده بيحافظ على الزيوت الطبيعية اللي بتغذي البشرة ومش هيخليها جافة.
11- عشان الماسكارا تديكي نتيجة احسن:
عشان الماسكارا تدينا نتيجة احسن حتى لو كانت نوع مش غالي الطريقة دي هتديكي نفس نتيجة الانواع الغالية, هنستخدم كارت نحطه فوق العين وبعدين نبدأ نطبق الماسكارا على الرموش ده هيخلينا نتحكم فيها اكتر ونحطها على الرموش بطريقة احسن من الجذور للاطراف ومن غير ما نلطخ فوق العين بالماسكارا وكمان هتدي وسع للعين وطول للرموش اكتر.
اعرفي من هنا ازاي تختاري الماسكارا المناسبة لرموشك.
12- متستخدميش البودرة:
خبراء التجميل بينصحوا انك متستخدميش البودرة بعد سن ال35 ممكن بس تستخدمي منها تاتش بسيط على منطقة الانف, لان البودرة بتدخل في خطوط البشرة وبتبينها اكتر وخصوصا الخطوط اللي تحت العين, ممكن بدل البودر تستخدمي مرطب ملون, ولتحت العين استخدمي كونسيلر.
13- اعملي المرطب الملون بنفسك:
ممكن توفري وبدل ما تشتري مرطب ملون تعمليه بنفسك بسهولة جدا, خدي شوية من الفونديشن السايل على ايدك وحطي عليه شوية من الكريم المرطب اللي انتي بتستخدميه واخلطيهم مع بعض, وكده يبقى المرطب الملون جاهز عندك تقدري تستخدميه على البشرة هيخفي العيوب وفي نفس الوقت هيبقى شكله طبيعي.
14- متنسيش الصن بلوك:
لازم تحرصي انك تحطي الصن بلوك على اي مكان هيتعرض للشمس سواء في الصيف او في الشتا لانه حتى لو في الشتا الشمس بيكون تأثيرها اقل لكن بردو بتأثر على البشرة عشان كده لازم نستخدمه على طول.
شوفي من هنا افضل انواع الصن بلوك لكل نوع بشرة.
15- استخدمي الشامبو الجاف:
احنا اتكلمنا قبل كده عن الشامبو الجاف وازاي نعمله في البيت, هو مفيد في انك تعملي ريفريش للشعر من غير ما تغسليه بس رشي على جذور الشعر هيخلي الشعر نضيف ويديه لوك فريش وريحة حلوة.
16- جربي تسريحة الكحكة:
لو في يوم معندكيش وقت تعملي تسريحة لشعرك او مكسلة اسهل حاجة انك تعملي كحكة لانها تسريحة سهلة وفي نفس الوقت بتدي لوك حلو ودلوقتي في طرق كتير للكحكة غير الطريقة التقليدية تقدروا تنفذوها.
شوفي من هنا اكتر من 20 طريقة جديدة لتسريحة الكحكة.
17- غسل البشرة وترطيبها قبل النوم:
لازم قبل النوم نغسل بشرتنا بالغسول المناسب ليها ونرطبها وخصوصا منطقة تحت العين, والمفروض ده يبقى روتين يومي كل يوم قبل ما ننام عشان نحافظ على بشرتنا نضرة على طول.
اعرفي من هنا ايه افضل انواع غسول ومقشر البشرة.
18- استخدمي زبدة الكاكاو:
متستغنيش ابدا عن استخدام زبدة الكاكاو لشفايفك عشان تحافظي عليها على طول ناعمة وتحافظي على رطوبتها وتحميها من التشقق والجفاف.
19- استخدمي برايمر ومكياج مضيء:
استخدمي دايما البرايمر قبل الميك اب وخصوصا عند منطقة العيون عشان تديها لوك مشرق وتظهريها, وحطي ميك اب مضيء عشان تظهري العين اجمل وتداري الاجهاد والتعب حتى لو مش نايمة كويس وعنيكي مجهدة المكياج المضيء هيظهرها بشكل حلو ومشرق.
20- عشان تحددي الحواجب وتخليها اتقل:
للبنات اللي بيعانوا من الحواجب الخفيفة عشان تحدديهم وتظهريهم اتقل, استخدمي قلم الحواجب بدرجة افتح من لون حواجبك بدرجة واحدة حددي بيه شكل الحواجب, وبعدين ارسمي الحواجب بالفرشة ببودر الحواجب بدرجة بلون حواجبك, وبعدين حطي عليه جل تحديد الحواجب عشان يثبت بودر الحواجب.
شوفوا من هنا 10 حيل واسرار في رسم الحواجب لازم تكوني عرفاهم.
21- عشان تبيضي الضوافر الصفرا:
لو بتعاني من مشكلة الضوافر الصفرا, ممكن تبيضيهم بطريقة بسيطة وفعالة جدا حطي عليهم معجون سنان وافركيهم بفرشة سنان قديمة عندك, وممكن تكرري الوصفة يوميا او حسب احتياجك.
22- استخدمي الكونسيلر بطريقة صح:
لو عندك اي هالات سودا تحت العين استخدمي الكونسيلر لاخفائها بس لازم نستخدمه بطريقة صح عشان يدينا افضل نتيجة, حطي الاول كريم مرطب وبعدين حطي الكونسيلر عشان تمنعي انه يعمل اي تكتلات او خطوط تحت العين.
اعرفوا من هنا نصايح لاختيار الكونسيلر المناسب.
23- استخدمي ادوات المكياج الصح لكل حاجة:
استخدمي ادوات المكياج الصح لكل حاجة من كريم الاساس او البودر او الماسكارا استخدمي لها الفرش او البيوتي بلندر او فرشة الماسكارا الصح عشان تقدري تحطيها بشكل مظبوط ويطلع المكياج بتاعك من غير غلطات وكمان ده هيحافظ على مكياجك فترة اطول, وكمان حافظي على الادوات دايما نضيفة عشان متتكونش عليها بكتيريا وتتنقل لبشرتنا وتضرها.
اعرفوا من هنا ايه هي انواع فرش المكياج واستخداماتهم.
24- اختاري البرا الصح:
اختاري البرا الصح المناسبة لمقاس الصدر عشان تريحك اولا, وتاني حاجة عشان تظبط الصدر وتخلي شكله حلو.
شوفوا من هنا ازاي تختاري حمالة الصدر المناسبة.
25- استخدمي لوشن الجسم باكتر من طريقة:
ممكن تستفادي بلوشن الجسم باكتر من طريقة ممكن تحطي عليه شوية زيت زيتون وتدهني بيه الجسم هيرطبها جدا وينعمها, وممكن تحطي على اللوشن برونزر الجسم عشان تدي لون برونزي سريع للبشرة.
26- احتفظي بكريم العين في شنطتك:
خلي دايما كريم العين في شنطتك وخلال اليوم كل فترة حطي منه تحت عينيكي عشان تجددي اللوك وتنعشي المنطقة اللي تحت العين باستمرار وتحافظي على رطوبتها.
شوفوا من هنا افضل انواع وماركات كريم العين.
27- نامي على مخدة ساتان او حرير:
نامي على مخدة ساتان او حرير عشان تحمي شعرك من التكسر والتقصف لان المخدة القطن بتسبب جفاف الشعر, ولما تيجي تغسلي شعرك حطي الشامبو على فروة الراس بس ودلكية بالراحة ولما تيجي تغسلي الشامبو بالمية هينزل على باقي الشعر هينضفه وكده يبقى تنضيف خفيف للشعر من غير ما يجهده والحيلة دي هتخلي شعرك صحي اكتر.
28- استخدمي كريم ريتينويد:
كريم الريتينويد من العلاجات الفعالة اللي بتحافظ على شباب البشرة وبتحميها من التجاعيد, وبتعالج حب الشباب, وبتقلل من المسام الواسعة والرؤوس السودا, وبيحمي البشرة من التصبغات, وبيعالج النمش, هتغسلي البشرة وتنشفيها كويس وبعدين تاخدي كمية صغيرة جدا من الكريم تفرديها على بشرتك وتسيبيه نص ساعة وبعدين تغسليه بمية دافية.
شوفوا كمان 20 سر من خبراء التجميل لمكياج مثالي زي المحترفين
