9 وصفات طبيعية فعالة لعلاج الرؤوس السودا

ريهام محمود
ريهام محمود
في
بشرة
9910

الرؤوس السودا من المشاكل اللي تقريبا كل البنات بيعانوا منها وخصوصا في منطقة الانف لان دي اكتر منطقة بتظهر فيها, واحنا اتكلمنا قبل كده عن الرؤوس السودا واسبابها وقولنا وصفات طبيعية لعلاجها واحنا النهاردة جايبين لكم مجموعة وصفات جديدة فعالة لعلاج الرؤوس السودا وازالتها من الانف والبشرة كلها.

9 وصفات طبيعية فعالة لعلاج الرؤوس السودا:

1- وصفة الليمون والعسل والسكر:

هنجيب ليمونة ونقطعها نصين ناخد نص منها نحط عليه عسل لحد ما يغطي سطح الليمونة كلها وبعدين نرش عليه رشتين سكر والافضل كمان لو استخدمنا سكر بني, هندلك البشرة بالراحة في حركات دائرية ونركز اكتر على الاماكن اللي فيها رؤوس سودا, ونكرر الوصفة دي مرة واحدة في الاسبوع.

وصفة الليمون والعسل والسكر
وصفة الليمون والعسل والسكر

2- وصفة الفازلين والغلاف البلاستيك:

افضل وقت لاستخدام الوصفة دي بعد الحمام عشان بتكون مسام البشرة متفتحة, او ممكن تبلي فوطة بمية سخنة وتحطيها على منطقة الانف عشان تفتح المسام, الخطوة اللي بعد كده هندهن الانف بالفازلين ونلف عليها غلاف بلاستيك من اللي بنستخدمه في لف الاكل ونحط عليه فوطة سخنة ونسيبها لحد ما تبرد وبعدين نشيل الغلاف البلاستيك ونمسح الفازلين بمنديل, وبعدين نضغط بالراحة على منطقة الانف هنلاقي الرؤوس بتطلع بكل سهولة, في الاخر هنمسح بشرتنا كلها بقطنة فيها لوشن او اي كريم مرطب بتستخدميه, والطريقة دي ممكن تعمليها من مرة لمرتين بس في الشهر.

وصفة الفازلين والغلاف البلاستيك
وصفة الفازلين والغلاف البلاستيك

3- وصفة زيت جوز الهند والزيوت الاساسية:

هنجيب 1/4 كوباية زيت جوز هند نحطها في طبق وندخله الميكروويف لمدة من 10 – 15 ثانية لحد ما يسيح او ممكن نسيحه في حمام مية مية سخنة ولما يسيح خالص هنضيف عليه 10 نقط من زيت الليمون وزيت اللافندر وزيت شجرة الشاي ونقلبهم كويس مع بعض ونحتفظ بالخليط في اي برطمان او علبة عندنا ونستخدمة على البشرة  هنغسلها كويس ونجيب قطنة ونمسح بيه البشرة كلها مرة الصبح ومرة بالليل يوميا, مع الاستمرار هيعالج الرؤوس السودا وهينقيها ويخليها صافية وهيرطبها اوي, وممكن نحتفظ بباقي الخليط عادي في درجة حرارة الغرفة.

وصفة زيت جوز الهند والزيوت الاساسية
وصفة زيت جوز الهند والزيوت الاساسية

4- وصفة القرفة ودقيق الشوفان:

هنخلط معلقة من دقيق الشوفان مع معلقة قرفة مطحونة ونضيف عليهم مية دافية بالتدريج لحد ما يبقى عندنا خليط سميك, ناخد منه باطراف صوابعنا وندلك البشرة كويس بحركات دائرية  لمدة دقيقة وبعدين نغسل البشرة بمية باردة, ممكن تحسي بلسعة خفيفة على البشرة بسبب القرفة بس تأثيرها هيروح بمجرد ما تغسلي وشك, والوصفة دي ممكن تكرروها من مرة لمرتين في الشهر.

وصفة القرفة ودقيق الشوفان
وصفة القرفة ودقيق الشوفان

5- وصفة الفحم والطين الاخضر:

هنخلط 1/2 معلقة صغيرة فحم مطحون “هتلاقوا في الصيدلية اقراص فحم نجيبها ونطحنها او كبسولات هنجيبها ونفتحها وناخد المسحوق اللي جواها” مع معلقة صغيرة طين اخضر “من عند العطار”, وهنضيف عليهم ½ معلقة صغيرة مية دافية ونقلبهم كويس مع بعض لحد ما يبقى عندنا خليط ناعم, هنحط الخليط على البشرة ونسيبه لحد ما ينشف وبعدين نغسل البشرة بمية باردة, ونكرر الوصفة دي من مرة لمرتين في الاسبوع.

وصفة الفحم والطين الاخضر
وصفة الفحم والطين الاخضر

6- وصفة زيت جوز الهند والقهوة:

هنجيب ¼ كوباية زيت جوز هند ونسيحه في الميكروويف او في حمام مية سخنة وبعد ما يسيح نضيف له ½ كوباية قهوة, هنغسل بشرتنا وناخد من الخليط ندلك بيه البشرة في حركات دائرية لمدة دقيقة وبعدين نسيبه 5 دقايق كمان ونغسله بمية باردة, كرري الوصفة مرة واحدة في الاسبوع, والخليط الباقي ممكن تقسميه وتحطيه في قوالب التلج او قوالب الكب كيك وتحتفظي بيه في الفريزر ولما تيجي تستخدميه طلعي مكعب سيحيه في حمام مية واستخدميه بنفس الطريقة اللي قولناها.

وصفة زيت جوز الهند والقهوة
وصفة زيت جوز الهند والقهوة

7- وصفة جل الالوفيرا والطين الابيض والزيوت العطرية:

هنخلط 2 معلقة صغيرة طين ابيض “من عند العطار” مع معلقة صغيرة جل صبار الالوفيرا وملعقة صغيرة مية ومعاهم 3 نقط من زيت اللافندر قلبي المكونات مع بعض كويس لحد ما يبقى عندك خليط ناعم, حطي الخليط على البشرة وسيبيه 10 دقايق وبعدين اغسليه بمية دافية, كرري الوصفة مرتين في الشهر.

وصفة جل الالوفيرا والطين الابيض والزيوت العطرية
وصفة جل الالوفيرا والطين الابيض والزيوت العطرية

8- وصفة دقيق الشوفان والعسل والزبادي وزيت الزيتون:

هنخلط ¼ كوباية دقيق شوفان, مع 2 معلقة صغيرة زبادي, و 2 معلقة صغيرة عسل نحل, و 2 معلقة صغيرة زيت زيتون, هنضرب المكونات كلها مع بعض كويس في الخلاط وناخد منه ندلك بيه البشرة في حركات دائرية من 1 – 2 دقيقة وبعدين نغسله بمية دافية, ولو بشرتك حساسة اوي يبقى متفركيش بشرتك بالخليط حطيه بس كماسك وسيبيه من 5 – 7 دقايق وبعدين اغسليه, كرري الوصفة من مرة لمرتين في الاسبوع, وممكن نحتفظ بباقي الخليط في التلاجة لحد ما نيجي نستخدمه تاني.

وصفة دقيق الشوفان والعسل والزبادي وزيت الزيتون
وصفة دقيق الشوفان والعسل والزبادي وزيت الزيتون

9- وصفة السكر والعسل وزيت الزيتون:

هنخلط ¼ كوباية سكر ابيض مع ¼ كوباية سكر بني ونضيف عليهم ¼ كوباية زيت زيتون ومعلقة كبيرة عسل نحل ونقلبهم كويس مع بعض, هناخد من الخليط نفرك بيه البشرة في حركات دائرية وبعدين نغسله بمية دافية, نكرر الوصفة مرة واحدة في الاسبوع, ونحتفظ بباقي الخليط في اي برطمان عندنا في درجة حرارة الغرفة.

وصفة السكر والعسل وزيت الزيتون
وصفة السكر والعسل وزيت الزيتون

شوفوا كمان ماسك سحري لعلاج الرؤوس السودا

ماسك سحرى لعلاج الرؤوس السوداء
ماسك سحرى لعلاج الرؤوس السوداء

مقالات متعلقه

4 طرق بسيطة لازالة الرؤوس السودا عن طريق تعديل نظامك الغذائي

4 طرق بسيطة لازالة الرؤوس السودا عن طريق تعديل نظامك الغذائي

فوايد محلول الملح للبشرة..وازاي تستخدميه

فوايد محلول الملح للبشرة..وازاي تستخدميه

ازاي تستخدمي الكركدية لتفتيح البشرة وتجديد خلايا الجلد

ازاي تستخدمي الكركدية لتفتيح البشرة وتجديد خلايا الجلد