دليلك لقواعد فن الأتيكيت السبعه للرسايل او الـ texting etiquette

بقلمآية حسان فيمنوعات visibility4052

الدراسات بتقول انه الناس بتبعت حوالى 5 مليار رساله كل يوم و ده لان اوقات كتير الرسايل بتبقى بالنسبه لنا اسهل و اسرع كتير من مكالمات التليفون خصوصا لو الوقت او المكان مش مناسبين انك تتكلمى فى التليفون لوقت طويل، بس حتى الرسايل ليها قواعد معينه لازم نتبعها مهما كانت  بتتبعت لمين ، امتى ، و ايا كان اللى جوا الرساله علشان كده اعرفى معانا فى المقال ده قواعد فن الأتيكيت السبعه للرسايل ، ايه اللى المفروض تعمليه و ايه اللى مش صح يتعمل ..

قواعد فن الأتيكيت السبعه للرسايل او الـ texting etiquette

1- خلى الرساله مختصرة :

الرساله المفروض تتكون من جملتين او تلاته بالكتير، زى ما بيقول خبراء فن الأتيكيت، فلو مثلا عايزة تحكى لصاحبتك عن خروجه حلوة او حاجه مهمة حصلت معاكى، و انتى بتتكتبى الرساله بتاعتك خدى بالك من حجم شاشة تليفون صاحبتك و ان كانت هتقدر تقرأ رساله طويله ولا لا ، لانه حجم و شكل الرساله بيختلف من تليفون للتانى .علشان كده لو حسيتى انه رسالتك هتبقى طويلة اوى او فيها تفاصيل كتير الافضل إن تبعتي بس العناوين وباقي التفاصيل ممكن تحكيها في مكالمة اول ما تجيلك فرصة .

2- متفضليش تبعتى أكتر من مسج ورا بعض من غير ما يجيلك رد !!

قاعدة تانية مهمة من قواعد فن الأتيكيت السبعه للرسايل هى انك مينفعش تفضلى تبعتى رسايل كتير ورا بعضها لحد ما يوصلك رد ، و دى غلطة بنعملها كتير خصوصا مع اصحابنا القريبين او مع خطيبك مثلا ، بس ده مينفعش لانه رغم انه معظمنا مبقاش يسيب التليفون من ايديه لكن ممكن جدا الرساله توصل متأخر او توصل و ميفتحهاش لانه مشغول مثلا او انه ميكونش فى شبكة ، فبعد ما تبعتى رساله لازم تستنى يجيلك الرد قبل ما تبعتى رسالتك التانية حتى لو الرد جالك متأخر ، لانه ارسال messages كتير و راء بعضها بيعتبر بعيد عن قواعد الأتيكيت . 

3- ابعتى رساله علشان تأكدى على مواعيدك :

لو متفقه انتى و اصحابك تخرجوا تتغدوا سوا او تخرجوا بالليل مثلا حتى لو متفقين بالايميل أو على التليفون ، ممكن تبعتى رساله سريعه تأكدى بيها على اتفاقكوا و الميعاد او المكان اللى هتتقابلوا فيه مثلا زى ” على اتفاقنا النهاردة؟” ، سؤال بسيط هيترد عليه بأيوة او لا و خلاص . كده الموضوع اسرع و هيوفر وقت بالنسبه ليكم انتوا الاتنين لكن لو مثلا خططكم اتغيرت او هتعتذري عن الخروج بيقول خبراء فن الأتيكيت انه فى الحاله دى لازم تتصلى و مينفعش تبعتى رساله لانه ممكن ببساطة الرساله متوصلش او ميشوفهاش زى ما قلنا. و مينفعش كمان تعزمى حد على خروجة او مناسبة برساله لانها بتعتبر casual و من اصول فن الأتيكيت انه العزومات و المناسبات ضرورى تبلغى بيها الناس على التليفون او تعزميهم بشكل شخصى .

4- مينفعش تنهى ارتباط برساله : 

كتير مننا بنفكر انه اننا ننهى علاقة او ارتباط برسالة هيكون اسهل علينا و يوفر علينا الاحراج اللى بيبقى موجود فى المواقف اللى زى دى ، لكن رغم كل الاسباب اللى ممكن تخليكى مش عايزة تنهى الارتباط face to face ، انك تنهى علاقة برسالة بيعبر عن الذوق القليل و ممكن الطرف التانى يحس انك مش مدياله اهمية و الاحترام الكافى . علشان كده اى علاقة او موقف هتنهيه لازم يبقى بشكل شخصى و مينفعش ابدا تعتمدى على الرسايل فيه .

5- استخدمى علامات الترقيم و اكتبى صح : 

المسجات خليتنا نخترع اختصارات كتيرة للكلمات لازم تعبرى بيه عن اللى عاية تقوليه فى رسالتك ، لازم تستخدمى علامات الترقيم زى الفاصلة و النقطة و علامات التعجب و الاستفهام لانها هتساعدك توصلى اللى انتى عايزة تقوليه و هتخلى فهمه اسهل و لازم تخدى بالك كمان انك بتكتبى صح و بأخطاء فى الحروف قليلة علشان تخلى قراية رسالتك اسهل على اللى بيستقبلها ، ولو بتكتبى رسالة لحد اول مرة بتبعتيله حاولى تبعدى عن الاختصارات زى LOL ، OMG و لو كانت مشهورة لانه ممكن يكون ميعرفهاش .

6- متبعتيش Attachments كتير:

رغم انه التليفونات دلوقتى بتدينا option انه يبقى فى ملحقات او attachments فى الرسايل زى الصور او الفيديوهات او حتى التسجيلات الصوتية ، القاعدة دى قواعد فن الأتيكيت السبعه للرسايل بتقول انه مينفعش تبعتى اكتر من attchment واحد لكل رسالة و ده لانه لما بتبعتى اكتر من ملحق او ملحق حجمه كبير فى رسالة بيبقى تقيل جدا على موبايل اللى هيستقبل الرسالة و ممكن يملا مساحة الرسايل كلها عنده ، ، علشان كده لو محتاجة تبعتى attachments كتير و حجمها كبير يفضل تبعتيها بالايميل .

7- اختارى الوقت اللى تبعتى فيه رسالتك : 

لو انتى عارفه انه اللى بتبعتيله المسج ببقى مشغول معظم الوقت يبقى الرسالة انسب حل لانها هتفضل عنده و هيقراها وقت ما يبقى فاضى لكن مهم كمان تختاى الوقت اللى بتبعتى فيه رسالتك، بمعنى انه الوقت اللى مينفعش تردى فيه على التليفون زى مثلا ما تكونى فى اجتماع شغل او قاعدة على الاكل او اى تجمع سواء كان رسمى او لو حتى قاعدة مع عيلتك و اصحابك برده مينفعش تبعتى فيه رسالة لانه لما بتمسكى موبايلك بتشتتى انتباه الناس اللى قاعدين معاكى ، و كمان مينفعش تبعتى رسايل فى وقت تكونى فيه تعبانة او مش نايمة أو وانتى سايقة و لما تبقى بطارية موبايلك هتفصل لانه ممكن الموبايل يفصل و متقدريش تردى على الرد اللى هيجيلك . 

بكده تكونى عرفتى معانا قواعد فن الأتيكيت السبعه للرسايل ، شوفى معانا كمان نصايح و قواعد الأتيكيت فى عالم الانترنت و السوشال ميديا