اعرفي معانا ازاي تستخدمي البنجر لجمال البشرة والشفايف والشعر
البنجر من الخضروات المفيدة جدا للصحة لو دخلناه في نظامنا الغذائي كأكل او شربنا العصير بتاعه لانه بيحافظ على ضغط الدم, وبيحمي من خطر الاصابة بفقر الدم, لكن البنجر فوايده مش بتقتصر على الصحة بس كمان ليه فوايد جمالية على البشرة والشفايف والشعر وده اللي هنعرفه النهاردة من خلال المقال بتاعنا.
ازاي تستخدمي البنجر لجمال البشرة والشفايف والشعر:
1- البنجر لتفتيح البشرة وتجديدها:
زي ما قولنا البنجر غني جدا بالمواد المضادة للاكسدة والبروتينات ود بيساعد في تجديد خلايا البشرة, وحماية الجلد من التلف ومن السموم الضارة, بيساعد على تفتيح البشرة, وعلاج بقع البشرة والهالات السودا.
– اخلطي عصير بنجر مع كريمة اللبن وضيفي لهم معلقة كبيرة دقيق حمص ومعلقة كبيرة مية ورد, اخلطيهم مع بعض كويس وحطيه على بشرتك وسيبيه لحد ما ينشف وبعدين اغسليه بمية دافية, الوصفة بتساعد على تنعيم البشرة وتفتيحها.
– اخلطي من 2 – 3 معالق كبيرة زبادي مع من 3 – 5 معالق كبيرة عصير بنجر وحطي عليهم كام نقطة جليسرين, وبقطنة حطي الخليط على بشرتك وسيبيه من 5 – 10 دقايق وبعدين اغسليه بالمية, الوصفة دي بتنضف البشرة وبتطهرها وبتساعد على تفتيحها.
– اخلطي من 2 – 3 معالق كبيرة عصير بنجر مع من 3 – 5 معالق كبيرة ليمون مع كام نقطة مية ورد اخلطيهم كويس مع بعض وبقطنة حطي الخليط على البشرة وسيبيه 10 دقايق وبعدين اغسليه بالمية, الوصفة دي هايلة جدا لتفتيح البشرة وتوحيد لونها وبتدي لون وردي طبيعي للبشرة, وكمان بتساعد جدا في علاج الهالات السودا.
– وممكن غير الماسكات ندخله في نظامنا الغذائي وناكله ده بينعكس على بشرتنا بشكل ايجابي جدا, هنجيب ثمرة بنجر متوسطة نسلقها في المية ولما تستوي هنقطعها شرايح ونعصر عليها نص ليمونة وناكلها, لو انتظمتو على الوصفات دي هتحسوا بفرق كبير جدا في البشرة.
2- البنجر لشفايف وردي:
البنجر من الحاجات الفعالة جدا في التخلص من اللون الغامق على الشفايف وبيديها لون وردي طبيعي, وطريقة استخدامه للشفايف سهلة وبسيطة جدا.
هنجيب البنجر نبشره او نفرمه في الخلاط وناخد منه نضيف عليه كريمة اللبن اللي بنستخدمها في الاكل لحد ما يبقى الخليط متماسك مع بعضه نقدر نفرده على الشفايف, حطي الخليط على الشفايف وسيبيه 20 دقيقة وبعدين اغسليه بالمية, مع الانتظام على الوصفة دي هتدي لون وردي طبيعي للشفايف بشكل دائم.
3- البنجر لخدود وردي:
زي ما البنجر فعال جدا انه يخلي الشفايف وردي كمان ممكن تستخدميه للخدود والبشرة كلها عشان تديها لون وردي طبيعي.
جيبي ثمرتين بنجر حجمهم متوسط واغليهم في المية لحد ما يطروا خالص وبعدين اهرسيهم لحد ما يبقى عندك معجون ناعم ضيفي عليه من 2 – 3 معالق صغيرة نشا, هنحط الخليط على الوش والرقبة نسيبه 20 دقيقة وبعدين نغسله بالمية.
4- البنجر لمنع تساقط الشعر:
البنجر غني بالفيتامينات والبروتين والبوتاسيوم ومضادات الاكسدة وكل العناصر دي بتساعد على تحفيز بصيلات الشعر وبيعزز نمو الشعر وبيمنع تساقطه.
– الوصفة دي هنستخدم فيها ورق البنجر الاخضر هنغلي نص كوباية من الورق في كوباية مية ونسيبهم يغلوا لحد ما الكمية تبقى النص, هنصفي المية وناخد الورق ونضيف عليه معلقة صغيرة من ورق الحنة ” هنلاقيه عند العطار” هنمزج المكونات مع بعض كويس وندلك فروة الراس بالخليط ونسيبه على الشعر 30 دقيقة وبعدين نغسله بالشامبو, مع الانتظام على الوصفة دي هتلاقو نتيجة فعالة جدا وممكن تكرروها مرتين في الاسبوع, وممكن نستخدم ورق البنجر لوحده من غير ورق الحنة.
– وشرب عصير البنجر كمان بيساعد جدا في علاج تساقط الشعر لو انتظمتي على شربه بشكل يومي.
5- البنجر لتلوين الشعر:
البنجر من الحاجات الطبيعية اللي ممكن تدي لون احمر طبيعي للشعر, لو حابه تغيري لون شعرك من غير ما تضريه بالصبغة هتجيبي حنة وتضيفي عليه عصير بنجر وتحطيها على شعرك وسيبيها لمدة ساعة وبعدين اغسلي الشعر.
شوفي كمان فوايد الموز واستخداماته للبشرة والشعر
